MISHACHO 1 - AMÜSA BAIBEL (BSI)

¹ Hiba vakha hi Jisu Khrista mishacho nengdang thrahcho lile. Tu zah tikehnung liro hütsü abi dikehrüti te müdhesohnung Tsingrangba-nü hi mishacho. Jisu Khrista-nü apu ninglang riwürü müthehnü hiri hi abi dikehrü Johan te müdhesohcho,

² ko Johan-nü abinü ngucho apüm yocho. Tsingrangba chahnü yusi ko Jisu Khrista-nü mishacho yuje nengdang abi yudsi tsü hi thsacho.

³ Vakha hi sünü khiro, choyoh yu hi sünü yuchiro ko hütsüla thrah zehcho bichiro arüh amüwa thsaang! Tunüo hiri apüm tikehnung bekhyah amünyethsa lile.

Lithro Dhünyeh yang Salüm Yu

⁴ Johan chahnü Asia lih la liba Lithro dhünyeh yanglang: Tsingrangba sü liro, sü licho, ko sü aronung liro, abi chahnü ko yangthsaba pümji bete yaba anbü dhünyeh chahnü,

⁵ ko Jisu Khrista sü longlangchehba yuzi aukhuba, asücho lanü kanglibong ko yangthsarüti michah yangthsabong, abi chahnü achomang ko atbachi nührü te lieng. Abinü Ihsa müire ko abi sücho khu Ihsa münyi lanü lehchehko

⁶ ko abi Tsingrang ko Au dikehsohnung abinü Ihsa bebürüti yanglih khüdu külüpjüko. Jisu Khrista te müchangkapü ahechi ko zii thsaang! Amen.

⁷ Dhing, abi nyükhi michah role! Nyitsarü müipinü ko abi chah thrarü nüsü abi ngunung. Liküpnü abi me tranung. Hütsüta tikehnung!

⁸ “Abüdongba Akohbong Tsingrang sü liro, sü licho ko sü aronung liro abinü yore, Ih Alfa ko Omega.”

Jisu Khrista Münguchehcho

⁹ Ih Johan, nührü jünirü, ko Jisu mono khüdu roh-i abi yanglih nyitsarüti yang roba chongcha rangchobala trümtarü khüdu. Ihnü Tsingrangba yu ko Jisu-nü mishaba yuje nengdang sobhocho ngang Ih Patmos mütro la pehcho.

¹⁰ Abüdongba nyümongla tsü Ih Anbünü jengcho ko rühti yuva kyo I khanglangnü chotacho yuva amülah khüdu Ihnü yuchicho.

¹¹ Yuva tsünü yocho, “Nühnü tu nguro hütsü thrahng ko Efesia, Smerna, Pergamum, Thyatira, Sardis, Filadelfia, ko Laodicea hiri yangdi Lithro dhünyeh yang mühehng.”

¹² Hütsüde Ite chotaba tsü dhingnung Ihnü ximülacho, ko Ihnü hon dsi müdongsing dhünyeh ngucho,

¹³ ko arüh yola nyitsarü kyo khüdu bongri-fükhüm khümpü, ko hon-nü adreng dsipü ngucho.

¹⁴ Abi kuva shunbüh mahkhang shurü roh-i athru, ko abi nahtse mihmüle kyocho;

¹⁵ Ajing imüyeng riri sehcho kyo, ko abi sahkoh tsü kihsasa yuva kyo khongcho.

¹⁶ Abi kheh tsalang chenghi dhünyeh bicho ko abi be lanü anyülangpü noh khüdu chürocho. Abi romih tsü nyüthung nyü kyo visacho.

¹⁷ Ihnü abi ngude, ajingte Ih asücho kang khülucho. Abinü I chah akheh tsalangnü nyümkeh yocho, “Tüdrü! Ih adikeh ko achangka.”

¹⁸ Ih akang libong! Ih sücho, ta ade lede nengdang akang lile. Asüba ko asürü limih azihsing I kheh la lile.

¹⁹ Hütsüeko, nühnü tu ngucho, ade liba ko akhanglang tikehnungti anyüding nengdang thrahng.

²⁰ Nühnü I kheh tsalang chenghi dhünyeh ko hon dsi müdongsing dhünyeh nguba adüzü tsü hi lile: Chenghi dhünyeh tsü Lithro dhünyeh riwürüti ko dsi müdongsing dhünyeh tsü Lithro dhünyeh.