MIKA 7 - AMÜSA BAIBEL (BSI)

Israelrü Athsangnyang Saying

¹ Alongdi mühle! Singdong chah asih ko shükusih shü chah shükusih nying mükeh nguba yangseh liba nyitsarü khüdu kyo Ih lile. Shükusih apüm ko anyiyah ngurüsih apüm laakhangpehko.

² Alih la yuje chorü süsü nying mühle, Tsingrangba te yocho nyirü süsü mühle. Atümung müpsehnung thsatsa khüdu yingrü amüthsi. Ajünirü khüdunü khüdu nyihrü amüthsi.

³ Arüh atümung amütsa nguchinungla axangcheh. Adirüti ko yukharünü pohsa chingre. Adirünü arüh mükhyahcho chochire, ko arühnü trümta chungre.

⁴ Arüh yola atsauba ko yuje choba tsü mii zengdong kyo amii mühle. Tsingrangba-nü arüh khingchinung azikehrü khu müzahsohcho nyümong tsü ro chihko. Ade arüh lümdhama lile.

⁵ Nü kurümrü chah tüyudsi mahkhang nü shangrü chah tülonglang. Nühnü nü nitpü te mii tu yoro müzahmükieng.

⁶ Chünye atsurünü au adohrü kyo bichire, atsulatpürünü atpa nyümre, ko atsurü nitpürünü anii atpati te yübütare; nyüh khüdu arorüh tsü apu kukhirü du lile.

⁷ Ta Ihlü Abüdongba khengyengnung; Ihnü I akangcheh Tsingrang chah longlang yingnung. I Tsingrang-nü Ite nyinung.

Abüdongba -nü Akangcheh Hirore

⁸ Ihrü rorüti ihrü michah tüzümükhümnung tu mühle. Ihrü khüluko, ta ihrü thali shemüsunung. Ihrü ade amarürah la lile, ta Abüdongba-nü ihrü khyang atsingse jünung.

⁹ Ihrünü Abüdongba nyüm amünyi shitpahko, hütsünü ade azachah ihrünü Abi rihlong te rangchobae. Ta achangkala Abinü Ihsa phikhümnung ko thsamehrü müchongchijünung. Abinü Ihsa atsingse yang noronung; Abinü Ihsa khümchocho Ihsanü ngunung.

¹⁰ Hütsüde Ihsa rorüh sürünü Ihsa te, “Nührü Tsingrang Abüdongba tsü khülo” pü tsingdhingbarü tsünü hi ngu ashah khyünung. Ihrünü arüh kohcheh, yanglongla chongbong dhrümchicho roh-i Ihsanü ngunung.

¹¹ Jerusalemrü, yangdi tbü külüpchinung becho chihko. Hütsüde nührü lurü jakehnung.

¹² Nührü yang nührü nyitsarü nyüchürolang Assyria lanü, kihjinglang Ijip lanü, Eufrates mükyah lanü ko ashula liba kihdi ko azongti lanü ronung.

¹³ Ta hütsüla lirü mütsachonü alih tsü lihpi kangnung.

Abüdongba -nü Israelrü Müi Lümcho

¹⁴ O Abüdongba, Nühnü throchehcho Israelrü san-nyahrü nüh kang. Arüh akungaselih la papa linye, arüh mükangmüla asu lih lile. Papade kyo arüh Bashan ko Gilead ngah la wü lamungsohng.

¹⁵ Abüdongba, Nühnü Ijip lanü ihrü nüchehde thsayahiya nguchicho kyo, ihrü te thsayahiya nguchi ngusohng.

¹⁶ Yuchotinü hi ngu tase khütang zehnye suzahnung. Nyemüyangseh arühnü arüh be hümnung ko arüh nangkhi thsitinung.

¹⁷ Arühnü mürü kyo asongsongla chichinung; arühnü arüh roshengviti lanü drü dhridhriseh ronung. Arühnü drüseh Ihsa Tsingrang Abüdongba yanglang ronung.

¹⁸ O Abüdongba, Nüh kyo tu Tsingrang mühle; Nühnü nying lirü Nü müyurü mülang pehjüre. Ledelü Nü zichüro mülire, ta Nühnü ihrü te Nü müthrehba amüi ngusohre.

¹⁹ Nühnü thali khüdupi Nü yanglilüm ngusohng. Nühnü ihrü münyi Nü jing pohki dhrümchi kihdi jongnah lang müthehnung!

²⁰ Nühnü papade ihrü jümürü te nyengchocho kyo, Abraham ko Jakob shümtsurü te Nüh yuje choba ko amüthrehba amüi ngusohnung.