MIKA 6 - AMÜSA BAIBEL (BSI)

Israel Nyüm Khiyu

¹ Israel nyüm Abüdongba khiyu nyieng. Shemüsung, O Abüdongba, ko Nü khiyu tsü hirung; Nühnü choba tsü azongti ko akhangti khyang yuchisohng.

² Nührü azongti, nührü achangka müli alih müdongkehji, Abüdongba Abi müyurü nyüm khiyu khüdu lile. Abinü Israel nyüm mülangjüba khüdu hironung.

³ Abüdongba-nü yore, “I müyurüti, Ihnü nührü te tu nguchicho? Ih nührü nengdang bhamüling khüdu thsacho do? Ite laling.

⁴ Ihnü nührü Ijip lanü nüchehcho; Ihnü nührü ayurü suro lanü khümchocho; Ihnü nührü nünung Mosa, Aron ko Miriam müthehcho.

⁵ Müyurüti, Moab-rü yangthsaba Balak-nü nührü te tu nguchinung chungcho ko Beor tsurü Balaam-nü tu lalingcho lümdhing. Akacia lanü Gilgal langla tu tikehcho lümchehng. Hiri lümdhing ko Ihnü nührü khümchonung tu nguchicho hütsü nührünü nyichehnung.”

Abüdongba -nü Tu Dhsütahro

⁶ Ihnü ning Tsingrang, Abüdongba mübünung rode tu hironung? Ihnü Abi khyang trüp mübünung misüza atsauba tsü hironung do?

⁷ Ihnü San hajarnü hajar mahkhang mütungkaba tuji hirochonü Abüdongba künyangnung mah-o? I münyi ngang I tsurü aukhuba amübü jünung mah-o?

⁸ Mah, Abinü Ihsa te tu atsa hütsü yoko. Abinü Ihsa chahnü khangba tsü hi: Yujeba tsü nguchinung, müthrehba amüi ngusohnung, ko Ihsa Tsingrang te kehta linung.

⁹ Abüdongba drünung tsü lümlong azeh. Abinü yangdi te züdecho, “Nyieng, yangdila shibülungrüti!

¹⁰ Nyitsarünü amütsati kuh la arühnü yuje mücho khyübülungcho kuthsi lile. Arühnü Ihnü thrünyiba yuje mücho hoba bichire.

¹¹ Ahosing yuje mücho bichirü khyang Ihnü khüta mülangpehjünung?

¹² Nührü alirütinü ailümrü nyüpmüsehre, ko nührü atümung arahkhehrüti lile.

¹³ Hütsünü nührü münyi ngang Ihnü nührü changjünung ko thsangnyangjünung dikehpehko.

¹⁴ Nührünü tsunung, ta longmünyüpnung ko yang du linung. Nührünü kohro rohcho khyünung, ta hütsüri riki müyohpüchehnung; nührünü azikyah riki yohpünye hütsü khatala Ihnü thsangnyangjünung.

¹⁵ Nührünü shunung, ta müxasahnung. Nührünü tuji nyehnung, ta mübichichehnung. Nührünü yongkha münohnung, ta khodesü hütsü müyongnung.

¹⁶ Hiri tikehnung tunüo yangthsaba Omri ko atsudhre yangthsaba Ahab nyüh nguchi amütsa nührünü iithsa nguchicho. Nührünü mütozah arüh lümchung iiwücho. Hütsünü Ihnü nührü changjünung ko atümungnü nührü müchümükehnung. Apümlang nyitsarütinü nührü mülangjü bichinung.”