MIKA 5 - AMÜSA BAIBEL (BSI)

¹ Jerusalemrü, nührü athrungrüti nübülung! Ihsa betiko. Arühnü Israelrü langnürü betile!

Bethlehem lanü Yangthsarü Chüronung Nyengchocho

² Abüdongba-nü yore, “Bethlehem Efratha, Juda la nüh yangza yola khüdu, ta nü chahnü Israel nengdang yangthsarü khüdu chüronung, abi jümürü hung lanü ronung.”

³ Hütsünü Abüdongba-nü Abi müyurü tsü, sü abükyü tsurü thsa suronung liro, hütsü müsurode arüh rorüh kheh la pehjünung. Hütsüde yangtsilangnü thali ro arüh nyitsarü Israelrü yola linung.

⁴ Khode abi ronang, abinü Abüdongba-nü jüba tase ko Abüdongba Tsingrangba apu akohbala yangthsanung. Abi müyurüti khümcho linung, tunüo limih chah lirü atümungnü abi mülahcho müdhenung,

⁵ ko abinü yangtsa hironung. Khode Assyriarünü Ihsa lih mahnang ko ihrü tbükhüm thsangnyang züronang, ihrünü athrungrüti arüh te khatanung müthehnung.

Khümchocho ko Khingchicho

⁶ Thsunohrü tase khu arühnü Nimrod lih Assyriarü kohnung, ko kohde arühnü Ihsa yanglih mahnang, Assyriarü khehlanü Ihsa khümchonung.

⁷ Amütrüh Israelrü tsü yucho adrong nengdang longtbaba yingkih ko singdonglidong chah tsingkih kyo linung. Arühnü nyitsarü chah mah ta Tsingrangba chah dümpinung.

⁸ Yuchotila anyingchoti tsü mürong la mahkhang jungchah kihkhünying tsuyongnung yangchicho kyonung: Abinü San yola züdu arüh chah tsohkehrü ko arüh zangzang rehnahre, ko khümchonung lang mühle.

⁹ Israelrünü arüh rorüh kohnung ko arüh atümung changjünung.

¹⁰ Abüdongba-nü yore, “Hütsütade Ihnü nührü kuriti khyümüijünung ko nührü nyübong akhüluba changjünung.

¹¹ Ihnü nührü lih la yangditi thsangnyangjünung ko nührü roshengviti khülusohnung.

¹² Ihnü nührü amongrüti changjünung ko azikehrü mülipü pehjünung.

¹³ Ihnü nührü kyothri ko amüsa lung-dongdi thsangnyangjünung; nührübürünü külüpcho tusü nührünü mümübüchehnung.

¹⁴ Ihnü nührü lih la Ashera tsingranglatpü kyothri thsangnyangjünung ko nührü yangditi changjünung.

¹⁵ Ko Ihnü I yocho mühnyiba yuchoti chah I rihlong chüro rühyangnung.”