MIKA 3 - AMÜSA BAIBEL (BSI)

Mika-nü Israel Langnürü Mülangjücho

¹ Nyieng, nührü Israel yangthsarüti! Yujeba nengdang nührünü müci jünung athsalang.

² Ta nührünü atsa thrünyire ko amütsa müire. Nührünü I nyitsarü akangnü aküp khohre ko arüh chahnü shutsa tsehchore.

³ Nührünü I müyurü tsupehko. Nührünü arüh küp khohre, arüh rüh khyahnahjüre, ko shuh chongnungba kyo arüh thsüpnahre.

⁴ Nührünü Abüdongba te züdenung becho chii role, ta Abinü nührü te mülalingnung. Nührünü kihchicho abinü mühnyinung, tunüo nührünü amünyi nguchiko.

⁵ Azikehrütinü, khürünü lango jükhang arüh te yangtsa nyengcho, ko sürünü tu müjüro arüh te chita rolepü yo I müyurü kihyochüko. Hiri azikehrü te Abüdongba-nü yore,

⁶ “Azikehrüti, nührü nyümong khunung thsale; nührü nyü züdule. Nührünü I müyurü nümülacho nengdangnü, adelü nührünü azikehrü müngucheh müngunung, ko nührünü choyohnung mükohnung.”

⁷ Sürünü choyohcho arüh ashah khyünung. Arüh mükhimüngunung, tunüo Tsingrangba-nü arüh kihchicho mülaling.

⁸ Ta I nengdanglü, Abüdongba-nü Abi anbü ko zii khu jengjüko, ko yuje ko müci mülahnü Israelrü münyi nengdang chonung.

⁹ Ite nyieng, nührü Israel yangthsarüti, nührünü yujeba tsü thrünyire ko yuje tsü amüthsalang kangsohre.

¹⁰ Nührünü Tsingrangba yangdi Jerusalem tsü müpsehba ko yuje mücho chah dümpipü külüpre.

¹¹ Yangthsarünü pohsa khyüre, bebürünü thsi ngang Yuzeng changnah yore, azikehrünü thsi ngang müngucheh yore, ko arüh atümungnü ihrü te Abüdongba zehlepü yore. Arühnü yore, “Ihrü chah tu mütikehnung, Abüdongba ihrü te lile.”

¹² Hütsünü nührü thsacholanü, Zion tsü luh kyo xünahnung, Jerusalem sehnyeh kang changnung, ko Amübükuh akhang tsü mürong kangnung.