MIKA 2 - AMÜSA BAIBEL (BSI)

Ailümrü Sehchirü Suro

¹ Sürünü müyüpseh lümchung amütsa chungrü arüh ahohah! Anyangnyü tsingsede, arühnü amütsa chungba tsü nguchire.

² Arühnü luh khyünyükhang, kengcho khyüre; kuh khyünyükhang, arühnü khyüdure. Sü kukhi mahkhang kuthsi khümcho mühle.

³ Hütsünü Abüdongba-nü yore, “Nührü michah achangba hirojünung küdangle, ko hütsülanü nührünü mütsiphunung. Nührü chongchala licho nührübürünü müdhenung, hütsükolü nührünü müthsehmüla mütsehnung.

⁴ Khode hütsü tikehnang, nyitsarünü nührü changcho tsü yukheh kang adüzüthsa bichinung, ko nührü chah tikehcho achongcha arühnü khi tang thsanung: “Ihrü riri changko! Abüdongba-nü ihrü lih khyüko, Ko ihrü kümtsirü khyang jüko.”

⁵ Hütsünü, khode alih tsü Abüdongba müyurü khyang thali jünung chii ronang, hütsüde nührü süsü nohlüm müngunung.

⁶ Nyitsarünü Ite thsingyu yocho, “Ihrü te tüthsingyu. Hütsütari nengdang tüthsingyu. Tsingrangba-nü ihrü ashah mükhyüsohnung.

⁷ Israelrü chokehchola küduko pü nührünü lümrü do? Abüdongba-nü rangchokacho mah-o? Abinü yuje hitari nguchinung do? Athsalang nguchirü te Abinü tsa müchotarü do?”

⁸ Abüdongba-nü lalingcho, “Nührünü arorüh kyo I müyurü bere. Arühnü khata langnü kuh lalü khümchonungepü lüm thalire, ta nüh hütsüla akhanglangnü fükhüm tsü phungcheh fühnung yingre.

⁹ Nührünü kuh lanü I müyularü iipehre, ko Ihnü müwajüba tsuzarü rang khyüjüre.

¹⁰ Shemüsung ko tsieng; hila adelü akhümcho mühle. Nührü münyinü hiba müdüm hi chokehchola changsohko.

¹¹ “Arühnü arahkheh azikehrü sürünü, ‘Nührü nengdang yongkha ko Amüchaba kükyo linung pü choyohrü du khyünyüre.’

¹² “Ta Ihnü nührü Israelrü amütrüh müjang nübülungnung. San akuhlang thalicho kyo Ihnü nührü nübülungnung. San-nü jeng liba angah kyo, nührü lih tsü thali nyitsarü adrong jeng linung.”

¹³ Tsingrangba-nü arüh khyang lang khangthrujo, yangtsi lanü arüh nüchehnung. Arühnü yangdi tbükhüm rohphoh tsinung. Arüh yangthsaba, Abüdongba apunü arüh nüchehnung.