MIKA 1 - AMÜSA BAIBEL (BSI)

¹ Juda la Jotham, Ahaz ko Hezekia yangthsarü longde, Abüdongba-nü Moreshet yangdi lanü Mika khu yusi hi jücho. Abüdongba-nü Samaria ko Jerusalem nengdang hiri apüm Mika te mishacho.

Samaria ko Jerusalem Meshücho

² Hi nyieng, nührü yucho apüm; hi nyieng, limih chah lirü atümung! Akohba Abüdongba-nü nührü nyüm yuzi jünung. Nyieng! Abinü ninglangrü amübükuh lanü chore.

³ Abüdongba Abi Amüsa alichahnü role; Abi jüronung ko azong khang chah rachinung;

⁴ Hütsüde michang la xa shenahcho kyo, Abi pohki azongti shenahnung. Akhang chahnü kih pohchocho kyo angah la tsü tungchahchünung.

⁵ Hi apüm Israelrünü münyi shitpah ko Tsingrangba nyüm yacho ngang tikehnung. Israelrünü nyüm yacho sü mütangnung? Samaria yangdi abükyü! Juda la kyothri mübüba tsü sü mülango? Jerusalem abükyü!

⁶ Hütsünü Abüdongba-nü yore, “Ihnü Samaria jungchah sehnyeh bhüm khüdu shükusih khyümnungthsa kangsohnung. Ihnü yangdi sehnyeh angah la pohyoh bhümsohnung ko yangdi yangphi tsü adeng josohnung.

⁷ Thsidi kyothri apüm müpzangzangjünung, amübükuh nahtrahnaxenglarü khyang jücho lüpcho michangnü changjünung, ko hütsüla kyothri apüm rüsahkünang bhüm pehjünung. Samariarünü hiri apüm abükyü mabomashi nengdang khyübülungcho ko ade arorühnü apümlang mübünung hütsüri hitsinung.”

⁸ Hütsüde Mika-nü yocho, “Hi nengdang Ihnü longri meshünung. I alongri ngusoh Ihnü jingshüh ko tbhüdeng rachinung. Ihnü rangfü kyo tranung ko ostrich kyo khongnung.

⁹ Samaria madhsa mükyangnung, ko Juda sü hütsü kyo tikehnung thsako; ko achangba tsünü I müyurü liba Jerusalem tbükhüm chihko.”

Arorüh Jerusalem Chihnyo rocho

¹⁰ Ihrü amükoh ngucho Gath la ihrü rorüh te tüyo; nü tracho arüh khyang tüngusoh. Beth Leafra-rü tavi la suchi nührü dhsacho ngusohng.

¹¹ Nührü Shafir-rü, yangtsilang tbhüdeng ko ashah khyo wüng. Zanan la lirünü arüh yangdi lanü müchürochehre. Bethezel-rü tra yuchide, hütsüla atsikehchah mülepü nührünü müdhenung.

¹² Marot-rünü arüku nengdang longphiseh yingre, tunüo Abüdongba-nü achangba tsü Jerusalem amünyethsa hiroko.

¹³ Nührü Lakish la lirütinü kuri chah nyübong akhüluba hohching. Nührünü Israelrü ithsa Jerusalem amünyi shitpahsohcho.

¹⁴ Ko ade, Judarünü Moreshet yangdi te aza yu young. Israel yangthsarütinü Akzib yangdi lanü arüku müngunung.

¹⁵ Maresha-rü, Abüdongba-nü nührü yang mahnung rorüh arorüh kheh la jünung. Israelrü akurahrütinü wü Adullam la lungkhi la rangnung.

¹⁶ Judarü, nührünü müiba tsuzarü meshü nührü thah hehpehng. Nührü jangjang hogon kyo aku riri kang tunüo nührü tsuzarü nührü tenü za yangtsilang notsinung.