MESHÜ 5 - AMÜSA BAIBEL (BSI)

Yanglilüm Nengdang Kihchicho

¹ O Abüdongba, ihrü chah tu tikehcho lümchehng; Ihrü chah dhing, ko ihrü ashah müdheing.

² Ihrü kuthsi shirü kheh la zehle; Ihrü kuh la shuparü lile.

³ Ihrü tpurüti arorühnü kyüsehkhangko, ko ade ihrü atpati chomilarü kangko.

⁴ Ihrü yongba kih ngang sahnung kangko; Ihrünü atahnung sing lihnung kangko.

⁵ Gadu mahkhang ut kyo ihrü dsere; Ihrü kyahre, ta mükyahshangsohre.

⁶ Akang linung tsuyongba yangchi, Ihrünü Ijip ko Assyria lang chingkihchingnang wücho.

⁷ Ihrü jümürütinü amünyi shitpahcho, ta ade arüh sopehko, ko arüh münyi ngang ihrü dhsare.

⁸ Ayurünü ihrü michah yangthsare, ko arüh khehlanü sünüsü ihrü mükhümchocheh.

⁹ Ihrü akang ngang tsuyongba ngure, tunüo atümunglang amüpsehrünü jeng lile.

¹⁰ Ayangchonü rihmi chürosohre, Ihrü küp taphi kyo adhsa lile.

¹¹ Zion khang lanü ihrü nitpürü te khing thsangnyangko, Judarü yang atümungla khingnü ihrü tsularü te thsangnyangko.

¹² Ihrü langnürüti nowü xohsehjüko; ashirüti khyang jengreng müjü.

¹³ Ayurüti kyo dhrezarü khingchi fürü thsüsohcho; Azarüti khyang singnah hisohcho.

¹⁴ Adelü yangdi tbükhüm la ashirü müpüm, ko dhrezarütinü khi müthsa.

¹⁵ Ihrü akangla akünyang tsipehko; Awahnü nyiichiba mülihko.

¹⁶ Ihrü künyang liba tusü münying. Ihrünü amünyi shitpahko, ko ade ihrü ahohah.

¹⁷ Ihrü lasih dhsare ko nahshükih khu hariri ngure.

¹⁸ Tunüo Zion Khang thrüchahchüpehko, ko apehchola rangfü rachile.

¹⁹ Ta O Abüdongba, Nüh lede yangthsare, ko achangka chii yangthsanung.

²⁰ Tuepü ihrü hitoi nyahli pehjüro? Nühnü ihrü thali mülümchehnung do?

²¹ Ihrü Nüh yang nüli rung, Abüdongba! Ihrü nüli rung! Papade ihrü ahechi thali jüng.

²² Nühnü lede nengdang ihrü pehcho do? Nü zichüroba münyehlirü do?