MESHÜ 3 - AMÜSA BAIBEL (BSI)

Akhingchi, Lasih Thsamülaba ko Alongdi

¹ Tsingrangba-nü khüta khingchinung müdhejung liba nyitsarü tsü Ih lile.

² Abinü Ih amarürah asoh-u asoh-ula züdusohcho.

³ Ko thali-thali Ite müchomangpü lahcho.

⁴ Abinü I lerohpehjücho, Ko I rüh thsangnyangjücho.

⁵ Abinü alongri ko adhsangthsi akhangtila Ih yohpücho.

⁶ Abinü Ih asüba amarürah la khing lisohcho.

⁷ Abinü ixilihnü Ih rahcho; atsichehnung lang müliba arangyohrü tsü Ih licho.

⁸ Ihnü arüku ching züdenye, Tsingrangba-nü münyire;

⁹ Ih tsehde lülohsohre; I ximülacho apümlang lung tbünü Ih yatire.

¹⁰ Abinü Ih shühmü khüdu kyo yingre; ko I chah kangdi kyo tsohkehre.

¹¹ Abinü lang khu Ih iicho, Ih zangzang rehnahpü pehcho.

¹² Abinü singthsalu hehkeh I chah miicho.

¹³ Abinü Ifü la atbüdengnü soh kyarangjücho.

¹⁴ Nyitsarünü mükhyang Ih münyodhingre; Ih arüh münyüdong kangko.

¹⁵ Tsuyongnung mülih Abinü I khyang akha chongcha du jücho.

¹⁶ Abinü I romih alih la müpchijücho ko I ha lihzala thungchijücho.

¹⁷ Ihnü tsayeng liba atbachi ko akünyang tsü tunang nbüchüpehcho.

¹⁸ I akang anyahli mülinung; Abüdongba chah I alongdi kingkako.

¹⁹ I adhsa ko kushirü müliba shulüm, lümdhingba tsü, müyüh akha kangko;

²⁰ Ihnü hütsü nengdang lüm du lümre ko I nbü kyahsehpehko.

²¹ Ta Ihnü lango hi lümchehde alongdi thali rore:

²² Abüdongba müthrehba amüi ko achomang müzahre.

²³ Nyangnyü mükhu arüh asi, Nüh longlangchehba arangcheh.

²⁴ Abüdongba tsü I licho apüm, hütsünü Abi chah longlangre.

²⁵ Abüdongba tsü Abi chah longlangrü atümung te atsa.

²⁶ Hütsünü Ihsa akangcheh yingnung atsauba tsü, Ihsanü rangcho Abi yingnung.

²⁷ Ko kunu bekhyah hiba arangcho nyichonung tsü atsauba.

²⁸ Khode Ihsa chongchanang, rangcho anayingla nabi pümbae.

²⁹ Ihsanü longlüm kangbae, tunüo adesü alongdi linung kohle.

³⁰ Lahnye ko nyüpmüsehnye, Ihsanü rangchobae.

³¹ Abüdongba tsü yanglilüm ko lede nengdang Ihsa müpehnung.

³² Abinü Ihsa chah alongri hirojünung kohle, ta Abi amüi tsü yuje ko adrengdreng.

³³ Ihsa longri mahkhang dhsasohchola Abi akünyang mühle.

³⁴ Akhangtila Ihsa anbü changcho Abüdongba-nü müdhele.

³⁵ Abinü jücho Ihsa athsalang müngucho Abinü müdhele.

³⁶ Yukhachah yuje müchocho Abinü müdhele.

³⁷ Abüdongba lümcho du lede tikehre.

³⁸ Abinü mülachola du atsa ko amütsa anyüding tikehre.

³⁹ Ihsa münyi ngang Ihsa khingchide tuepü Ihsanü longmüsünung?

⁴⁰ Ihsanü Ihsa akang thsadsünung ko Abüdongba yang ximülanung.

⁴¹ Ihsanü ninglang Tsingrangba te lasih khangthru dangkhidangnangnung:

⁴² “Ihrünü amünyi shitpahko ko nyümko, O Abüdongba nühnü ihrü mülang müpehjü.

⁴³ “Nühnü ihrü iiro kyüsehcho; Nü yanglilüm Nü rihlongla rangpücho.

⁴⁴ Ihrü dangkhidangnangnü mükhakhuchehnungthsa nyükhi pohki Nüh müshütipehcho.

⁴⁵ Nühnü ihrü limih sehnyeh kangsohcho.

⁴⁶ “Ihrü rorütinü ihrü nyüpmüsehko ko münyüjücho.

⁴⁷ Ihrü achangba ko athsangnyang khu role; Ihrü dhsürü ko adrüla lile.

⁴⁸ I müyurü changcho ngu I nahshükih yongkhi roh-i pohre.

⁴⁹ Abüdongba-nü ninglangnü dhingchahchü Ihrü müngude;

⁵⁰ I nahshükih yongkhi roh-i müpohzah pohnung.

⁵¹ Yangdi la khingkurüti chah tikehcho ngude, I lasih thsangnyangcho.

⁵² “I thrünyinung alanglang müliba rorütinü Ih uza kyo xohsohre.

⁵³ Arühnü Ih shukuh la akangnü rangyohchücho ko lungnü chingtipehcho.

⁵⁴ Kihnü Ih tingti rocho ko Ih sünungthsalepü lümcho.

⁵⁵ “Shukuh jongnah lanü, O Abüdongba, Ihnü nüte züdecho.

⁵⁶ Ko I züdecho nyijüngpü kihchide Nühnü yuchicho.

⁵⁷ Nühnü Ite lalingcho ko tu müdrünung yocho.

⁵⁸ “Abüdongba, Nühnü Ih iichonung rocho ko I kang khümchocho.

⁵⁹ Ih khüm; Ih nyüm amülanglang nguchicho nühnü müdhele.

⁶⁰ I rorünü Ih thrünyicho ko Ih nyüm rah külüpcho nühnü müdhele.

⁶¹ “O Abüdongba, Ih nyüpmüsehcho nühnü yuchiko; arüh rah apüm nühnü müdhele.

⁶² Mükhyang arühnü I nengdang chota arüh lümchung külüpre.

⁶³ Anyangnyünü maa arühnü Ih münyodhingre.

⁶⁴ “O Abüdongba, arüh nguchi ngang arüh khingching;

⁶⁵ Chokehcholaang ko achangbanü arüh jengjüng!

⁶⁶ Arüh iijowüng ko alih lanü arüh wohpehng!”