MESHÜ 2 - AMÜSA BAIBEL (BSI)

Abüdongba -nü Jerusalem Khingchinung

¹ Abüdongba-nü zichüro Zion shütisohcho. Ninglangrü ahechi tsü Abinü athsangnyang kangsohcho. Abi zichüro nyümong, Abinü Amübükuh mii mükhichi.

² Abüdongba-nü Juda la yangdong apüm achomang müli changsohcho. Ko arüh roshengviti tphahtsujücho. Abinü yanglih ko athsarüti michah ashah hirojücho.

³ Abi zichüronü Abinü Israel tase shüchijücho; Arorüh rode Abinü ihrü mütronyücho. Lüpcho thsangnyangjo Abinü Ihrü nyüm michang kyo zichürocho.

⁴ Abinü arorüh kyo khichi ihrü chah thsalu miikehjücho; Abinü ihrü alongdi atümung müpsehcho. Hiba Jerusalem la ihrünü adhsa hi mütohko.

⁵ Arorüh khüdu kyo Abüdongba-nü Israel changsohko; Roshengvi ko yangthsaba pümji thsangnyangpehjüko. Abinü Judarü michah mükyangba alongri hirojüko.

⁶ Ihrünü Abi mübüba Amübükuh Abinü zangzang kengnahjüko; Abinü Amüsa nyümongti ko amünyümong changkapehjüko. Yangthsaba ko bebüba anyüdingnü Abi zii müdheko.

⁷ Abüdongba-nü Apu bholu ko Amübükuh thrüchahchüpehjüko; Abinü arorüh khyang tbü khülusohcho. Ihrünü khüdupi künyang mübüba müdümla arühnü helo thsare.

⁸ Abüdongba-nü Zion tbü tsü khülusohnung dhrongchehpehko; Riri changsohnung Abinü kihchehpehko. Ade roshengvi ko tbü anyüding thsangnyang khülu lile.

⁹ Tbükhüm alih la sühnah lile, azihsing zangzang müpnah lile. Yangthsaba ko adirüti ade yangtsila lile. Yuzeng adelü müdore, ko azikehrüti Abüdongba chahnü müngucheh mühle.

¹⁰ Jerusalem azirütinü, arüh thah chah tavi kangkeh ko müyahshü müpipü alih la sahmüthsa pümre. Lazarünü arüh romih alih la mükhurangre.

¹¹ Atrachonü Ih nyilapehko; I nbü longrire. I nyitsarü changsohcho ngu awahchonü Ih kyahko. Yangdi tungtela azarü ko akhungarüti sütüre.

¹² Ayang axochonü arühnü atparü te trare; Arüh lerohpehcho kyo yanglongla arüh khülure, Ko arüh atparü kheh la khai süre.

¹³ O Jerusalem, amüi Jerusalem, Ihnü tu yonung? Ihnü nüh khüta tbachijünung? Süsü hi kyo müdhsadhing. Kihjü kyo nüh achangba arangcheh lile; akohnung alongdi tu mühle.

¹⁴ Azikehrünü arahkheh chah khu tu müyonung; Nü lasih thsamülanung tu adhsütah mülepü arühnü nüh kihmüla nü münyi müyümtijücho.

¹⁵ Yangdi lahkhurünü müthsamünyüre. Jerusalem khüluchochah arühnü arüh thah ngah münyodhingre. “Hi amüinung yangdisü mah-o? Hi limih akünyangsü mah-o?”

¹⁶ Nü rorüh atümungnü müthsamünyüre ko nüh thrünyi dhingre. Arühnü naking hingkeh yorü, “Ihrünü hütsü changjüko! Ihrünü khengyeng yaba nyümong sü chünye lile!”

¹⁷ Achangkathsa Abüdongba-nü tu lümcho hütsü nguchiko: Abinü papade Ihsa te müzahsohcho kyo, müchomangpü Ihsa changjüko. Abinü arorüh khyang Ihsa michah akünyang ko akoh jüko.

¹⁸ O Jerusalem, nührü tbü tsatsa tsünü Abüdongba te züdesohng. Ama tsingse nührü nahshükih tsü yongkhi kyo pohsohng; Meshü ko atrachonü nührü jangjang kyahng!

¹⁹ Müyüpnü Abüdongba te züde du züdeing; Nü tsuzarü chah chomang pü nü lasih apüm shünü kihchieng, Yanglongla azarüti kongseh süre!

²⁰ O Abüdongba, Nühnü tuepü Ihrü chah hita dhsümthsero? Khingkurütinü arühnü müiba tsuzarü shuh tsure! Bebürüti ko azikehrüti Amübükuh lanü müpsehre!

²¹ Aza-azi atümung yanglongla so jole, Arorüh nohshengnü dhrezarü ko lazarü kyüsehko. Nührünü zichüro nyümong müchomangpü arüh kingthrümko.

²² Nühnü I mükang arorühti thsüti tsunung dsiyohko, Ko Nü zichüro nyümong süsü mütsiphunung. Ihnü müiseh kangba I tsurüti arühnü kyüsehko.