MESHÜ 1 - AMÜSA BAIBEL (BSI)

Jerusalem Alongri.

¹ Nyitsarünü jeng liba Jerusalem-sü, khüta naying kangcho! Khüdupi limihnü dhichibasü, ade chomilarü kyo lile; Yangdi yola ahechibasü ayurü kangko.

² Abükyünü müyüp trare; Amüchüp la nahshükih threh, Ahi shangrüti yola abükyü tbachijünung süsü münying. Ashangrütinü abi kihyochüko ko atümungnü ade abi nyümre.

³ Judarü ayurü kangko, khing yangtsilang notsiko. Bürü lih la arüh lire, arüh lih-epü dsinung mülipü, Arorühnü mükangtiko, tsichehnung lang mühle.

⁴ Amüsa nyümong Amübükuh yang mübünung süsü mürore. Hütsüla khi thsalarüti chongchare, ko bebürüti rühchire. Yangdi tbükhümti adeng yale, ko Zion alongrila lile.

⁵ Arorühnü kohchehko; arüh tasela abükyü bichire. Abüdongba-nü abükyü münyi khütango ngang khingchiko; Arüh tsuzarüti rang hitsiko.

⁶ Jerusalem ahechi tsü ahi kohro khüdu kangko. Langnürüti tsü akongchonü re müzehba shümüshü kyo kangko. Shu-iirü bete tside kyo arüh tase tsikhangko.

⁷ Ade changpü nayingseh lile, Jerusalem-nü papade ahechi lümchehre. Abükyü arorüh kheh la khülude, atrorü süsü mülicho; Arorühnü abükyü khülucho ngu münyüjücho.

⁸ Abükyü jengreng changko; tbhüdeng thrüchahchüpehko. Abükyünü rühchi ashahchonü aromih rangre. Jerusalem abükyü münyi dirachonü abükyü athrünyinungkeh kangko.

⁹ Abükyü mümüsaba tsü abükyü longmishü chah kehcho; abükyü müngu nengdang tu mülüm. Abükyü khüluba tsü adrünung thsacho; Sünüsü abükyü mütbachijücheh. Abükyü rorütinü kohcho, ko abükyünü Abüdongba te Yanglilüm shulüm züdecho.

¹⁰ Abükyü rorünü abükyü kuthsi apüm kengchoko. Abüdongba-nü yangpirüti züdunung yatiba amübükuh la tsü mii züducho abükyünü ngucho.

¹¹ Abükyü müyurütinü atsunung yangchide rühchire; Arühnü arüh kuthsi arüh akang linung tsuyongnung ngang mülihtare. “I chah dhing, Abüdongba” Yangdinü züdere: “I thsamütsa dhing.”

¹² “I chah dhing pü abükyünü alahkhurü atümung te züdere!” Abüdongba-nü Abi zichürode I chah hirojüba adhsa, “I dhsacho kyo sünüsü müdhsadhing.

¹³ “Abinü amilangnü, Ifü yonglang trüpba michang müthehcho. Abinü I khyang zeng thsapüjücho ko alihlang Ih nojürocho. Hütsüpü abinü mütozah tohdhsa linungla Ih thrüchahchüpehcho.

¹⁴ “Abinü I münyi apüm khyübülungre ko rahrütare; Abinü hütsüri I hong la lahsohre, ko hütsünü niiyehchonü I re müzehsohre. Abüdongba-nü arorüh kheh la Ih jücho, ko arüh bete Ih müyacheh.

¹⁵ “Abüdongba-nü I rothsarü atümung chah müthsamünyükehjüko; Iyo dhrezarüti changjünung abinü rothsarü mülungo müthehko. Shükusih nyehsingla shükusih kyo abinü I nyitsarüti nyehtpahko.

¹⁶ “Hütsü khu I nahshükih threhre. Sünüsü Ih mütbachijücheh; sünüsü I re müzehsoh. Arorühnü Ih kohchehko; I nyitsarü süsü münying.

¹⁷ “Ihnü I kheh müyungchüre, ta sünüsü Ih mütronung. Abüdongba-nü Ih nyüm apümlangnü arorüh dsire; Arühnü athrünyi kohro khüdu kyo Ih bichire.

¹⁸ “Ta Abüdongba yuje lile, tunüo Ihnü Abi yu münyiko. Nührü müyurü atümungnü Iyu nyieng; ko I adhsa dhing. I nyitsarü dhreza lazarü rang kümtsiko.

¹⁹ “Ihnü I shangrüti te dsicho, ta arühnü Ih mütrocho. Bebürü ko langnürütinü akang linung tsang yangchi; Yangdi tungtela sücho.

²⁰ O Abüdongba, I chongcha dhing, tunüo I nbü chongcha lile! I münyi nengdang I lasih thsangnyang longrire. Yanglongla amüpsehba lile; kuh yonglang mii asüba lile.

²¹ “I rühchicho nyidhing; I tbachijürü süsü mühle. Nühnü I chah athsangnyang hirojüchonü I rorüti künyangre. Nüh anyengchocho nyümong hirojüng; Ih kyo I rorüti tsü dhsasohng.

²² “Arüh mütsacho nengdang arüh mülangjüng; I münyi ngang Ih khingchicho kyo arühsü khingching. Chongchachonü Ih rühchire, ko I müci dhsangnangre.”