MATHI 8 - AMÜSA BAIBEL (BSI)

Jisu-nü Nyüh Khüdu Kyangjücho

¹ Khode Jisu akhang lanü jürocho, nyitsarü adrong abi khanglang iiwücho.

² Hütsütade mübhira kehrü nyüh khüdu abi yanglang ro, mükhukehnü kihchi abi te yocho, “Adirü, nühnü lümkhang, nühnü Ih müsachehjünung kohle.”

³ Jisu-nü akheh müyungchü abi chah thahpo yocho. “Ihnü lümre,” “Nüh müsachehng!” Hütsüdenü nyitsarüba tsü kyangpehcho.

⁴ Hütsüpü Jisu-nü abi te yocho, “Nyieng! Sütesü hi tüyo, ta Bebüba yanglahnü wüng ko abi khyang dhingsohng; ko atümung bete nüh müsachehkopü yuzithsanung nengdang, Mosa-nü mülacho amübü jüng.”

Jisu-nü Adirü Kulirü Kyangjücho

⁵ Khode Jisu Kapernaum la züducho, Roman rothsazirü khüdunü ro abi shirücho ko abi rükungpü kihchicho:

⁶ “Adirü, I kulirü dee dhsangnang mümühachicheh kuh la yüpjole.”

⁷ “Abi kyangjünung Ih ronung” Jisu-nü yocho.

⁸ “Doh adirü” Roman-rü anüchiba tsünü yocho. “Nüh I kulang rosohnung Ihnü müdekheng. Yah yuzeng du jüng ko I kulirü kyangnung.

⁹ Ihsü I pohki rothsarüti lipü I mungthri adirü pohki liba nyüh khüdue. Ihnü nyüh khüdu te, ‘Wüng khang abinü wü ko akhüu te, rung, khang rore ko I kulirü te’ Hi nguching; khang abinü hütsü nguchire.”

¹⁰ Khode Jisu-nü hi yuchicho, abi nyemüyangcho ko abi khanglang iirorüti te yocho, “Ihnü nührü te yore, Israel la hiroh-i yudsi lirü Ihnü müngue.

¹¹ Ihnü nührü te yore, nyüchüro langnü ko nyüzüdu langnü adrong ronung ko ninglang Yanglih thsütila tsü Abraham, Isak, ko Jakob yola pümnung.

¹² Ta alimih yanglih tsurüti tsü amarürah la dhiyohchünung, ko hütsüla arüh ha mütrehkehta tranung.”

¹³ Hütsüpü Jisu-nü anüchiba te tsü yocho, “Kulang wüng, ko nühnü yudsicho roh-i nü nengdang nguchinung.” Ko anüchiba kulirü tsü hütsüdenü kyangpehcho.

Jisu-nü Nyitsarü Adrong Kyangjücho

¹⁴ Jisu-nü Peter kuh la züducho, ko hütsüla Peter nitpü atpa rihminü füdhsa yüpjo ngucho.

¹⁵ Abinü abükyü kheh chah thapücho; ko rihminü abükyü pehjücho, ko abükyünü shemüsu abi dikehcho.

¹⁶ Nyüzeh rode, nyitsarütinü Jisu yang amünyi nbünü rangchoba nyitsarü adrong norocho. Jisu-nü yu khüdunü amünyi nbüti iipehjücho ko füdhsarü atümung kyangjücho.

¹⁷ Abinü hi Isaya azikehrünü, “Abinü Ihsa füdhsa khyücho ko Ihsa dhsara hicho” pü chocho tikehsohnungba nguchicho.

Jisu Iiwünungerüti

¹⁸ Khode Jisu-nü abi mükang sühdi tsü ngucho, abinü amonoti te kihkeh khüulang tsü wünung yuzengjücho.

¹⁹ Yuzeng adorü khüdu abi yang ro yocho, “Adorü, Nüh khüdederü wünang, nüh iironung Ih rungnüm lile.”

²⁰ Jisu-nü abi te lalingcho, “Shirungti lungkhi lile, ko uzati asüp lile, ta Nyitsarü Tsurülü khüdesü aku ngakeh chah mühle.”

²¹ Aparü mono khüdunü abi te yocho, “Adirü, akhu Ih thali wü I U me rangsohng.”

²² Jisu-nü abi te yocho, “Ih iirung,” “ko asücho tsü abürü jangjang dhrürangsohng.”

Jisu-nü Tsingxinyübong Zahsohcho

²³ Jisu-nü kihtang khüdula züducho, ko amonoti abi iiwücho.

²⁴ Dhrongyengnü adrünung tsingxinyübong chürocho ko kihtang tsü amülingyohrü thsacho. Ta Jisulü yüpseh licho.

²⁵ Monotinü wü abi khamüsu yocho, “Ihrü khümchoung, Abüdongba!” “Ihrü achangrüdue!”

²⁶ Jisu-nü yocho, “Nührü tuepü hitoi drüro?” “Nührü yudsi samrale!” Hütsüpü abinü shemüsu nyübong ko kiloh te zahnung yuzengjücho ko longlüm kangcho.

²⁷ Atümungnü nyemüyang yocho. “Nyübong ko kilohnü mii ayu nyinungthsa, hi khütari nyitsarüo!”

Amünyi Nbünü Rangcho Nyüh Anyüh Kyangjücho

²⁸ Khode Jisu-nü kihdi khüulang Gadara limih lang rocho, kongyo langnü nyüh anyüh ro abi mütohcho. Arüh chah adrünung amünyi nbü lichonü sünüsü hütsüba langla mülahkhucho.

²⁹ Khüdupinü arühnü khongcho, “Ihrü chah tu nguchinyüro, nüh Tsingrangba Tsurü? Becho müchienü nüh ihrü khingchinung rocho mah-o?”

³⁰ Hütsü amünyeh shüka atii thütsuthüyong rachicho.

³¹ Ko amünyi nbüti tsünü Jisu te kihchicho, “Nühnü ihrü iipehkhang, shüka atii yola tsü ihrü züdusohng.”

³² Jisu-nü arüh te yocho: “Wüng” ko arühnü chürocho ko shüka atii la züducho. Atii shünü lungdhonglang tsohnah jowü kihdi la tsü dhsangsehkhangcho.

³³ Shüka nyahrü tsünü yangdi lang shang wünü amünyi nbünü rangcho nyitsarü chah tikehcho yukheh apüm yocho.

³⁴ Achotsü yangdila lirü atümung Jisu shirünung wücho; ko khode arühnü abi ngucho, arühnü abi te arüh lih pehjüpü tsinung kihchicho.