MATHI 5 - AMÜSA BAIBEL (BSI)

Azong Chah Thsingyucho

¹ Jisu-nü sühdi tsü ngu akhang khüdu chah tuwücho, ko hütsüla pümcho. Amonotinü abi mükang shibülungcho,

² ko abinü arüh te donung dikehcho:

Amüwanung

³ “Sürü anbüla müdsimükuro arüh amüwanung; tunüo ninglang Yanglih arüh yo!

⁴ Sürü me traro arüh amüwanung; tunüo arüh tbachijünung.

⁵ Sürü longlümro arüh amüwanung; tunüo arühnü Tsingrangba-nü nyengchocho ngunung!

⁶ Sürü Amüsaba nengdang yangxoro arüh amüwanung; tunüo arüh longxosohnung!

⁷ Sürünü chomangro arüh amüwanung; tunüo arühnü achomang ngunung.

⁸ Sürü lasih müsaro arüh amüwanung; tunüo arühnü Tsingrangba ngunung!

⁹ Sürünü yangtsa külüpro arüh amüwanung; tunüo arüh Tsingrangba tsurüti dsinung!

¹⁰ Sürü Amüsaba nengdang dhsümthsero arüh amüwanung; tunüo ninglang yanglih arüh yo!

¹¹ “Nührü I mono thsacho ngang khode nyitsarünü nührü müchümükehnang ko dhsümthsedhsümlohnang ko nührü nyüm arahkheh apüm yonang nührü akünyangnung.

¹² Künyang ko longphieng, tunüo ninglang nührü khyang jiyü arangcheh yohpüjü lile. Nührü müngu azikehrütisü hiroh-i dhsümthsedhsümlohcho.

Mih ko Atsingse

¹³ “Nührü alimih mih. Ta mih tsü amüsüp changpehkhang, thali müsüpsohnung lang tusü mühle. Hütsü amii müli kangre, hütsü thohpehpü nyitsarünü dhrümchire.

¹⁴ “Nührü alimih atsingse, akhangchah liba yangdi khüdu mümüyümticheh.

¹⁵ Sünüsü dsi tahkehpü loh pohki müyohpüre; ta dsi vihsingla vihpüre, hütsünü kuh la lirü atümung khyang vijüre.

¹⁶ Hütsüroh-i nührü atsingse tsü nyitsarü atümung bete visasohng, hütsüta arühnü nührü nguchi atsa ngu ninglang liba nührü Au hechinung.

Yuzeng Nengdang Docho

¹⁷ “Ih Mosa yuzeng ko azikehrütinü docho changjünung rochoepü tülüm. Ih hütsüri changjünung rocho mah, ta tikehsohnung rocho.

¹⁸ Ning ko alih müchangde ashingkehcho azauba mahkhang yuzeng yola azauba khüdu dusü mütikehpü mükhutsinung.

¹⁹ Hütsünü, sürünü hiri yuzeng azauba khüdu dusü thsangnyangro, ko aparü tesü hütsüroh-i nguchinung thsingyuro, ninglang yanglih la azauba thsanung. Adesü, sürünü yuzeng nyiro ko aparü tesü hütsüroh-i nguchinung thsingyuro, ninglang Yanglih la arüh adiuba thsanung.

²⁰ Hütsüeko Ihnü nührü te yore, yuzeng athsingyurü ko Farisirü tenü nührü yudsi ahou müthsakhang, nührünü ninglang Yanglih la khodesü müzüdunung.

Ziichüroba Nengdang Docho

²¹ “Jümüchah yocho nührünü yochiko, ‘Tümüpseh; sünü müpsehnang abi yu khanung.’

²² Ta adelü Ihnü nührü te yore: sünü jünirü te ziichüronang abi yu khanung, sünü jünirü te ‘Nüh tulamüyoh’ pü yonang abi ashimükhong bete noronung, ko sünü jünirü te ‘Adongmücho adohrü’ pü yonang abi mümehmi dhsürüla linung.

²³ Hütsüeko mübüji chah nü Tsingrang khyang lango mübünungthsa yade, nü jünirünü nüh nyüm lango lilepü lümchehkhang,

²⁴ amübüji te nü jiyü tsü yohpülieng, ko wünü nü jünirü te akhu tsataang, hütsüpü du thali ro Tsingrangba khyang nü mübü tsü jüng.

²⁵ “Khürünü yuzengnü nüh mülangjü nüh yukhajilang nowükhang, yukhajilang müwüdenü abi te khiyu tsü tsidsa pehng. Nüh hütsülang tsü nowükhang, abinü nüh yukharü kheh la jünung, arühnü nüh anyahyehrü khyang jünung, ko nüh akhangtikuh la rangyohnung.

²⁶ Ihnü nührü te yore, nühnü akhang tsü müsahkhangdelü nüh hütsüla linung.

Nahtrahnaxeng Nengdang Docho

²⁷ “Hiroh-i yocho nührünü yuchiko, ‘Nahtrahnaxeng tübichi.’

²⁸ Ta adelü Ihnü nührü te yore: sünü khingkurü chah mükhyah dhingnang abükyü te lasih la nahtrahnaxengre.

²⁹ Hütsüeko nü nah tsalangbanü nüh münyisohkhang, hütsü hehcheh pehng! Mümehmi la nü füpüm shünü dhiyohchünung tenü nahtsenaha khüdu changcho atsau.

³⁰ Nü kheh tsalangbanü nüh münyisohkhang, hütsü kyüsah pehng! Mümehmi la nü füpüm shünü wünung tenülü jingkhehrü khüdu changcho atsau.

Zaba Nengdang Docho

³¹ “Hisü yoko, ‘Sünü anitpü pehnang abükyü khyang azaba yuzi athrahcho jüsohng.’

³² Ta adelü Ihnü nührü te yore: sünü anitpünü longmülangba tu münguchipü, abükyü zanang, ko abükyü xenglikhang abinü nahtrahnaxengsohre; ko sünü abükyü khyonang abisü nahtrahnaxengre.

Tsuyuchüm Nengdang Docho

³³ “Jümüchah yocho nührünü yuchiko, ‘Anyengchocho tüthsangnyang, ta Abüdongba te nührünü tu tsuyuchümcho hütsü nguching.’

³⁴ Ta adelü Ihnü nührü te yore: nühnü lango nyengchode tsuyuchüm tüthsa. Ninglang dangchi tüyuchüm, tunüo hütsü Tsingrangba pümji;

³⁵ alih sü tüdangchi, tunüo hi abi jing jükehsing; Jirusalemsü tüdangchi, tunüo hi adibong yangthsaba yangdi.

³⁶ Nü thah tangchi nüsü tsuyuchüm tüthsa, tunüo nühnü kuva khüdu dusü athru mahkhang anyah mükangchesoh.

³⁷ ‘Ho’ mahkhang ‘Mah’ du young, nühnü lango dusü alaa yokhang hütsü amünyi chahnü lile.

Rühyangba Nengdang Docho

³⁸ “Hi yochoba nührünü yuchiko, ‘Nahtse müli nahtse, ko aha müli aha.’

³⁹ Ta adelü Ihnü nührü te yore: nüte amütsa nguchirü te rüh tüyang. Khürünü nü müchüp tsalangthring tangkhang, fülilangsü tangsohng.

⁴⁰ Ko khürünü nü pümkhüm khyünyonü yukhajilang nüh nowükhang, abi khyang nü shü mii khyüsohng.

⁴¹ Ko khürünü abi bha lutri khüdu hisohnyükhang, hütsü lutri anyüh hijüng.

⁴² Khürünü nüte lango chingkhang, abi khyang hütsü desahng; khode khürünü nüte lango nyanyünang, abi khyang nyasohng.

Arorüh Müiba

⁴³ “Hi yochoba nührünü yuchiko, ‘Nü shangrü müing, ko nü rorüh thrünyieng’

⁴⁴ Ta adelü Ihnü nührü te yore: nü rorüh müing ko nü dhsümthserü nengdang dangkhidangnangjüng.

⁴⁵ Hütsünü nührü ninglang liba Au tsurüti kangnung. Tunüo abinü atsarü ko amütsarü anyüding michah apu nyü thsakehjüre, ko atsa nguchirü ko amütsa nguchirü michah tsing rosohre.

⁴⁶ Nührü müirü te du nührünü müikhang, tuepü Tsingrangba-nü nührü jiyünung? Alih müthsü dhrirü nüsü hütsülü nguchire!

⁴⁷ Ko nührünü shangrü te du chotakhang aparü tenü alaa tu nguchicho? Müyudsirü nüsü hütsülü nguchire!

⁴⁸ Nührü Au ninglang liba dekhingcho roh-i nührüsü dekhing lieng!