MATHI 4 - AMÜSA BAIBEL (BSI)

Jisu Thsadsücho

¹ Hütsüpü motsingnü thsadsüsohnung nengdang Anbünü Jisu lipilih lang nowücho.

² Nyümong yüre ko romang yüre kongko khanglang, Jisu yangcho.

³ Hütsüde motsing tsünü abi yang ro yocho, “Nüh Tsingrangba Tsurükhang, lung hirinü hümdhse kangsohnung yuzeng jüng.”

⁴ Ta Jisu-nü lalingcho, “Amüsa yunü yore, ‘Nyitsarünü hümdhse dunü akang mülicheh, ta Tsingrangba belanü chürocho yutse mükhunü.’ ”

⁵ Hütsüpü motsingnü Jisu tsü Amüsa yangdi Jerusalem lang nowücho, ko Amübü kumung athsenguba chah pümsohcho,

⁶ ko abi te yocho, “Nüh Tsingrangba Tsurükhang, nü jangjangthsa tsohchoung, tunüo Amüsa yunü yore: “‘Tsingrangba-nü nü nengdang abi riwürüti khyang yuzeng jünung, nü jing mii lung chah mümüthinungthsa, arüh khehlanü nüh wüpchonung.’ ”

⁷ Jisu-nü lalingcho, “Ta Azengtacho nüsü yore, ‘Nühnü Abüdongba nü Tsingrang tüthsadsü.’ ”

⁸ Hütsüpü motsingnü Jisu tsü azong athseng khüdu yang nowücho ko abi te limih yanglihti ko arüh ahechi atümung ngusohcho.

⁹ Motsing tsünü yocho, “Nühnü mükhukeh Ih mübükhang, hi atümung nü khyang Ihnü jünung.”

¹⁰ Hütsüde Jisu-nü lalingcho, “Tsipehng, Satan! Amüsa yunü yore, ‘Abüdongba nü Tsingrang mübüng ko abi du dikehng!’”

¹¹ Hütsütade motsing tsünü Jisu pehjücho; ko riwürütinü ro abi rükucho.

Galil la Jisu-nü Anguchi Dikehcho

¹² Khode Johan akhangtikuh la rangyohkopü Jisu-nü yuchicho, abinü Galil lang tsipehcho.

¹³ Abinü Nazaret la müpümpü, Zubulun ko Naftali lih Galil kihdi müshüm liba Kapernaum lang alinung wücho.

¹⁴ Hiba hi Isaya azikehbanü chochoba tikehsohnung nengdang nguchicho:

¹⁵ “Zebulun ko Naftali lih, kihdi langla, Jordan kikeh khüulang, Galil, yangpirü lih!

¹⁶ Amala lirütinü atsingse amülah khüdu ngunung. Asürü lih amala lirüti michah atsingse vijünung.”

¹⁷ Hütsütinü Jisu-nü abi yusi thsingyunung dikehcho: “Nührü münyi lanü ximülaang, tunüo ninglang Yanglih amünyethsa lile!”

Jisu-nü Ngu Rangrü Nyüh Müyü Dsicho

¹⁸ Jisu-nü Galil kihdi bekhüm tung tside, abinü ngu rangrü jüninyü Simon (Peter pü dsiba) ko, ani Andria, kihdi la yojehnü ngu rang ngucho.

¹⁹ Abinü arüh te yocho, “Ih iirung, ko Ihnü nührü nyitsarü rangrü kangsohnung.”

²⁰ Hütsütade tsünü arühnü arüh yojeh pehjüpü abi iiwücho.

²¹ Abinü khü wüpü aparü jüninyü, Zebede tsurüti, Jakob e Johan nyüh arüh au Zebede te kihtang la yojeh müthsüchi ngucho. Jisu-nü arüh dsicho.

²² Hütsüde tsünü arüh kihtang ko arüh au pehjüpü abi iiwücho.

Jisu-nü Do Thsingyucho ko Kyangjüre

²³ Jisu-nü Galil apüm bongnü, Sinagog la donü, ninglang Yanglih Yuse Atsa thsingyu, ko dhsara ko füdhsa alang papa kehrü kyangjü wücho.

²⁴ Ko abi nengdang Yusi tsü Syria limih apümlang sobhocho. Achotsü nyitsarünü abi yang füdhsarü ko dhsara alang papa kehrü: amünyi nbünü rangrü, füyüm zehrü, ko dsidsisürü norocho, ko Jisu-nü arüh atümung kyangjücho.

²⁵ Ko Galil lanü ko yangdi dhüre lanü, Jerusalem, Judea, ko Jordan khüulang liba lih lanü abi khanglang sühdi iiwücho.