MATHI 3 - AMÜSA BAIBEL (BSI)

Baptijüba Johan-nü Thsingyuba

¹ Hütsütade Baptijüba Johan ro Judea lipilih la thsingyunung dikehcho.

² Abinü yocho, “Nührü münyi lanü ximülaang, tunüo Ninglang Yanglih amünyethsa lile!”

³ Isaya azikehbanü yoba nyitsarü tsü Johan hi sü nengdang abinü yocho: “Nyüh khüdunü lipilih la züdecho yuva, ‘Abüdongba lang rungnüm; Abi lang müchongkhüti külüpm!’”

⁴ Johan Jengki ut nbühnü külüpcho; abinü shuküpnü akih rümcho, ko abi tsuyongnung tsü khengqu ko thsakukih thsacho.

⁵ Abi yanglang Jerusalem lanü, Judea lih atümung lanü, ko Jordan yongkhi amünyeh yangdongti lanü nyitsarüti rocho.

⁶ Arühnü arüh münyi nyengchocho, ko abinü arüh Jordan yongkhi la baptijücho.

⁷ Khode Johan-nü Farisirü ko Sadukirü adrong baptisohnung abi yanglang rochi ngucho, abinü arüh te yocho, “Nührü mürüti, Tsingrangba-nü müthehnung liba akhingchi lanü tsichehnung sünü nührü te yocho?

⁸ Nührü münyi lanü ximülakopü ngusohnungthsa nguching.

⁹ Ko Abraham tsü nührü jümürüepü yochonü nührü akhingchi lanü tsiphunungepü tülüm! Ihnü nührü te yore, Tsingrangba-nü lung hiri khyüpü Abraham tsurüti chürochehsohle!

¹⁰ Singdong ara lanü re pehnung püh tsü tikehpo lile; asih atsa müsihba singdong müipi retsunung ko michang la yohnung.

¹¹ Nührü lasih thsamülacho amüdhethsa Ihnü nührü kih la baptijüre, ta sü I khanglang ronung liro abinü nührü Anbü Amüsa ko michang la baptijünung. Abi I tenü dee adiu; Ihlü abi jingkhüm hinungsü müdekheng.

¹² Fürü apüm winung abi kheh la müro biyale. Abinü abi shih la fürü hibülungnung, ta abinü mayülü khodesü mümehba michang la tahpehnung.”

Jisu Bapticho

¹³ Hütsütade Johan khyang baptisohnungba Jisu Galil lanü Jordan yang rocho.

¹⁴ Ta Johan-nü abi alümcho mülichisohnung müküpcho. Johan-nü yocho “Ih uthring nühnü baptijüba khüli; nüh Ih yang rorüh ang?”

¹⁵ Ta Jisu-nü lalingcho, “Ade nengdanglü yah thsaang. Tunüo Ihsanü hita Tsingrangba-nü khyünyücho apüm nguchinung.” Achotsü Johan-nü hepü nguchicho.

¹⁶ Jisu bapti yeng, abi kih lanü chürocho. Hütsüde ning khangthrucho, ko abinü Tsingrangba nbü mümüdhrü roh-i jüro abi chah pümcho ngucho.

¹⁷ Ko dhing ninglangnü yuva khüdunü yocho, “Hiba hi Ihnü müiba Tsurü, sü chah I long kyangre.”