MATHI 28 - AMÜSA BAIBEL (BSI)

Kangchehli Rocho

¹ Sabath nyangnyü khüu, tsingsede, Mary Magdalin ko aparü Mary kong tsü dhingnung wücho.

² Dhrongyengnü alihyo zingcho; ko Abüdongba riwürü khüdu ninglangnü jüro lung tsü zehpehpü hütsü michah pümcho.

³ Adhingnung ningmüla müjang ko abi shü shurü roh-i athru thsacho.

⁴ Anyahrüti tsü khura drüchonü dhridhriseh asücho roh-i kangcho.

⁵ Ninglang Riwürü tsünü khingkurüti te chota yocho, “Nührü tüdrü,” “Jisu sü hamkehcho nührünü abi yangchirepü Ihnü müdhele.

⁶ Abi hila mühle; abinü yocho roh-i, abi kangli roko. Hila rung ko abi yüpcho la dhing.

⁷ Zah wüng ko amonoti te young, ‘Abi asücho lanü kangchehli roko ko ade abi nührü müngu Galil lang wüle; hütsüla nührünü abi ngunung!’ Ihnü nührü te tu yocho lümchehng.”

⁸ Achotsü arühnü zah kong tsü pehjücho, ko drünye ta akünyangnü jeng amonoti te yonung shang wücho.

⁹ Dhrongyengnü Jisu-nü arüh shirücho ko yocho, “nührü te atbachi lieng.” Arühnü ro abi jing chah marehnü abi mübücho.

¹⁰ “Jisu-nü arüh te yocho, tüdrü, wüng ko I jünirüti te Galil lang wüng ko young ko hütsüla arühnü Ih ngunung.”

Anyahrü Yusi

¹¹ Khingkurüti tsü tsichi yade, kong nyahrü rothsarü khürünü yangdi lang tsü thali wü bebü ayingtite atikehcho apüm yocho.

¹² Bebü ayingtinü azibarütite shirücho ko arah külüpcho; arühnü rothsarüti khyang tsü thsi khütango jünü

¹³ yocho, “Ihrü yüpjode, amonoti amala ronü me tsü fotsipehchoepü nührünü young.

¹⁴ Ko hi governor-nü yuchikhang, Ihrünü nührü tsü yuje-epü kihchonung, ko nührü hütsü nengdang tu lümxünung mühle.”

¹⁵ Anyahrüti tsünü thsi tsü khyücho ko arüh te yocho kyo nguchicho. Hütsünü hiba yusi tsü Jihudarünü chünye chii dangchire.

Jisu Amonoti te Chüro Ngusohcho

¹⁶ Mono dhürekheh tsü Galil la liba, Jisu-nü arüh te yochoba azonglang tsü wücho.

¹⁷ Khode arühnü abi ngucho, arühnü abi mübücho, ta khürünülü tütohnyünyehcho.

¹⁸ Jisu-nü arüh münyehthsa ronü arüh te yocho, “Ninglang ko limih la I khyang tase atümung jüko.

¹⁹ Hütsüeko yucho apümlang wüng, ko arüh I mono kangsohng: Au, Atsurü ko Anbü Amüsa nengla arüh baptijüng.

²⁰ Ko Ihnü nührü te tuturü mülacho apüm bichinung arüh te young, ko limih müchangde Ih nührü yola lede zeh linung.”