MATHI 26 - AMÜSA BAIBEL (BSI)

Jisu Nyüm Arah

¹ Khode Jisu-nü hiri atümung yokacho, abinü amonoti te yocho,

² “Nyümong anyüh lipü, Phungkhu Thsüti ronung nührünü müdhele, ko Nyitsarü Tsurü tsü khala chah hamkehnung khakhuchüjünung.”

³ Hütsüde bebü ayingti ko azibarüti Bebü amungthriba Kaifas kuh la shibülungcho,

⁴ ko Jisu rangnung ko müpsehnung lümchung rang külüpcho.

⁵ “Arühnü yocho, Ihsanü hütsü thsüti shikhela münguchibae” mahkhang yu chüronung.

Bethany la Jisu Müyühjücho

⁶ Jisu Bethany la mübhira kehba Simon kuh la pümcho.

⁷ Jisu Yangtsu pümde, khingkurü khüdu angang athsah axümlichi tuji alabaster füh khüdu jeng bipü ro abükyünü abi thah chah tungkehjücho.

⁸ Monotinü hütsü ngu zichürocho. “Tuepü hi müzangro?” Arühnü tsingdhingcho.

⁹ “Hütsü adrong ngang ipü thsi tsü ailümrü khyang jüba thsako!”

¹⁰ Jisu-nü arühnü yoba tsü müdhe abinü arüh te yocho, “Tuepü khingkutpü tsü longmüziro? Abinü Ite nguchiba hi dee atsae.

¹¹ Ailümrü nührü te lede linung, ta Ihlü nührü te lede mülinung.

¹² Abükyünü Ifü la axümlichi tungkehjüba tsü Ih dhrürangnung rungnümsohre.

¹³ Ade, Ihnü nührü te yore, limih atümunglang khüdederü yuse atsa thsingyunang, abükyü lümkehnung nengdang abükyünü tu nguchicho hütsü yonung.”

Judas-nü Jisu Kihyochünung Nyengchore

¹⁴ Hütsüde mono dhüreanyüh yola, khüdu anengnü Judas Iskariot, bebü ayingti yanglang wüpü

¹⁵ tsingdhingcho, “Ihnü nührü khyang Jisu khakhuchüjükhang, nührünü I khyang tu jünung?” Arühnü taripi thsi sangre abi khyang khi yohjücho.

¹⁶ Hütsütinü Judas-nü arüh khyang Jisu khakhuchüjünung nengdang thsatsa yangchicho.

Jisu-nü Amonoti Yola Phungkhu Tsuyong Tsucho

¹⁷ Bhüpza müyohba hümdhse thsüti adikeh nyümong monotinü Jisu yang ronü tsingdhingcho, “Nü nengdang Phungkhu Thsüti khüde rungnümsohnyüro?”

¹⁸ Abinü arüh te “Yangdi la tsü nyüh khüdu yang wüng, ko abi te young: ‘I bekhyah chihko; nü kuh la Ih ko I monotinü Phungkhu Thsüti müzehnungepü adobanü yore.’ ”

¹⁹ Monotinü Jisu-nü yocho roh-i nguchicho ko Phungkhu Thsüti tsü rungnümcho.

²⁰ Khode nyüzehcho, Jisu ko monoti tsü yangtsunung pümcho.

²¹ Yangtsu chah tsü Jisu-nü yocho, “Ihnü nührü te yore, nührü yola nyüh khüdunü Ih kihyochünung.”

²² Monoti tsü longyüpehcho ko abi te khüdu khüdunü tsingdhingcho, “Hütsü Ih mah-o, Abüdongba?”

²³ Jisu-nü lalingcho, “Sünü tbhü la Ite abi hümdhse dhsangro abinü Ih kihyochüjünung.

²⁴ Amüsa yunü yocho roh-i Nyitsarü Tsurü sünung, ta sünü nyitsarü Tsurü tsü kihyochünang hütsüba nyitsarü nengdang khüta ahohah! Hütsüba nyitsarü tsü müsurojungcho atsau thsako!”

²⁵ Kihyochübong Judas-nü yocho, “Hütsü Ih mah-o?” Jisu-nü lalingcho, “Nüpunü yore.”

Abüdongba Thsüti

²⁶ Arüh yangtsude, Jisu-nü hümdhse khyücho, anengse jücho, chenahcho ko amonoti khyang jonü yocho, “Hi khyüng ko tsung; hi Ifü lile.”

²⁷ Hütsüpü abinü shing khüdu khyücho, Tsingrangba khyang anengse jücho, ko hütsü arüh khyang jücho. Abinü yocho. “Nührü atümung hi yong.”

²⁸ “Hiba hi I azengtacho shüh lile, khüi adrong mülangpehjünung nengdang khatohcho.

²⁹ Ihnü Tsingrangba Yanglih la cikih asi nührü yola yongnung nyümong tsü müchidelü Ihnü khodesü hiba cikih hi thali müyongnung.”

³⁰ Hütsüpü arühnü khi khüdu thsapü olive zonglang tsicho.

Peter-nü Münyengchonung Jisu-nü Yojungcho

³¹ Hütsüde Jisu-nü arüh te yocho, “Shomülang tsatsa nührü atümungnü Ih pehjüpü tsipehnung, tunüo Amüsa yunü yore, ‘Tsingrangba-nü san nyahrü tsü müpsehnung ko santi tsü tsishonung.’

³² Ta Ih kangchehli roko khanglang, Ih nührü müngu Galil lang wünung.”

³³ Peter-nü Jisu te yocho. “Aparü atümungnü nüh pehjünye, Ihnü khodesü nüh müpehjünung!”

³⁴ Jisu-nü Peter te yocho, “Ihnü nüte yutsatsa yore, shomülang hüna mükhongde, nühnü Ih asangpili münyengchonung.”

³⁵ Peter-nü lalingcho, “Ih nü yola sünungsü thsanye, Ihnü khodesü hütsüta müyonung!” Ko aparü monoti atümung nüsü hütsü roh-i du yocho.

Jisu Gethsemane la Dangkhidangnangcho

³⁶ Hütsüpü Jisu-nü amonoti yola Gethsemane dsiba müdüm yang wücho, ko abinü arüh te yocho, “Ih hütsüla wü dangkhidangnangde nührü hila püm.”

³⁷ Abinü abi yola Peter ko Zebede tsurü anyüh nücho. Abi chah alongri ko lümtohnü jeng,

³⁸ abinü arüh te yocho, “I lasih la alongri tsü dirachonü Ih asünung roh-i due. Hila I yola kukeng lieng.”

³⁹ Abinü khü wüpü, alih la hapkeh dangkhidangnangcho, “Uwa, hi akohnung thsakhang, I chahnü hiba chongcha shing hi khyümüing! Ta I lümcho mah, nü lümcho thsaang.”

⁴⁰ Hütsüde abinü mono asang yanglang thali rocho ko arüh yüpseh ngucho; ko abinü Peter te yocho, “Nührü asang I yola rehtseh khüdu dusü kukeng mülichehba hi tuo?

⁴¹ Nührü athsadsüla mülongnungthsa kukeng ko dangkhidangnang. Anbülü longphile, ta shutsala re müzeh.”

⁴² Anyüpili Jisu-nü wü dangkhidangnangcho, “Uwa, hiba chongcha shing hi Ihnü müyongde mükhyümüichehnung thsakhang, hi nü lümcho thsaang.”

⁴³ Abi adesü thali rocho ko monoti tsü yüpseh ngucho; arühnü arüh nah trah mülichehcho.

⁴⁴ Asangpiusü Jisu-nü arüh pehjüpü wü yu hütsü du tsü yo dangkhidangnangcho.

⁴⁵ Hütsüpü abinü monoti yang thali ro yocho, “Nührü ade yingcheh kyahshang yüpjorü ang? Dhing! Nyitsarü Tsurü tsü münyirü kheh la khakhuchüjünung becho chihko.

⁴⁶ Shemüsung, Ihsanü wünung. Dhing, Ih kihyochüjüba nyitsarü tsü hila lile!”

Jisu Rangcho

⁴⁷ Jisu yu müchozah-e, mono dhüreanyüh yola khüdu Judas tsü ro chihcho. Abi yola bebü ayingti ko azibarütinü müthehcho nohsheng ko singdümpi bipü mülung amülah zeh rocho.

⁴⁸ Kihyochüjübong tsünü amülung khyang amüdhethsa khüdu jücho: “Ihnü süchah be müthsüpnang nührünü khyünyüba tsü abie. Abi rang!”

⁴⁹ Judas-nü müchongkhüti Jisu yang wücho ko yocho, “Tsa lieng, adorü, ko abi chah be müthsüpcho.”

⁵⁰ Jisu-nü lalingcho, “Müyangrü, zahding!” Hütsüde arühnü ro Jisu rangpü rahcho.

⁵¹ Jisu yola yarü nyüh khüdunü anohsheng tohcheh amungthriba bebürü kuliba nangku thsüp-pehjücho.

⁵² Jisu-nü abi te yocho. “Nü noh tsü nohtrüp la thali yohpüng, Sürünü nohsheng bichinang arüh nohshengnü sünung.

⁵³ Ihnü I U te atronung dsikhang abinü khüdupinü ninglang riwürüti hajar dhüreanyüh chah keh müthehnung kohlepü nührünü mümüdhe ang?

⁵⁴ Hütsütakhang, Amüsa yu khüinü hi tikehbaepü yoba tsü khüta tikehnung?”

⁵⁵ Hütsüde Jisu-nü sühdi te yocho, “Ih Afühashirü khüdu kyo Ih rangnung nohsheng ko singdümpi biko ronungthsa kangcho ang? Amübükuh la Ih nührü te nyümong mükhu donü pümcho, ko nührünü Ih mürang.

⁵⁶ Ta hiri atümung tikehba tsü Amüsa yula azikehrütinü aronung nengdang tu thrah licho hütsü tikehre.” Hütsüde monoti atümungnü abi pehjüpü tsipehcho.

Jisu Ashimükhong Bete

⁵⁷ Jisu rangrütinü abi amungthriba bebü Kaifas kuh yang nowücho, khüde Yuzeng adorüti ko azibarüti müjang shibülungnü licho.

⁵⁸ Peter-nü bebü amungthriba kuhbe chiinü ahongkoh thü-thü iiwücho. Abinü kuhbe chii züducho ko tu tikehnang müdhenung nengdang anyahrüti yola pümcho.

⁵⁹ Bebü ayingti ko ashimükhong atümungnü Jisu süsohnung nengdang abi nyüm yuzi khürü yangchicho;

⁶⁰ ta nyitsarü adrongnü abi nyüm arahkheh yuzi jünyesü, arühnü tusü müngucho. Achangkala nyüh anyüh mütrahkeh küro

⁶¹ yocho, “Hiba nyitsarünü yocho, ‘Ihnü Amübükuh hi tphüpü nyümong asang khanglang thali thsachehnung kohle.’ ”

⁶² Bebü amungthribanü shemüsu Jisu te yocho, “Nüh nyüm yuzi jübala tsü nüh alalingba tu mülirü ang?”

⁶³ Ta Jisu-nü ciisü müthsacho. Anyüpiusü Bebü amungthribanü abi te yocho, “Nühnü akang liba Tsingrang nengla yuchümnung Ihnü yore: Nüh Tsingrangba Tsurü, Mesia tsü a mahro, ihrü te young.”

⁶⁴ Jisu-nü abi te lalingcho, “Nüpunü yore. Ta Ihnü nührü atümung te yore; Tunyah mülipü nührünü Nyitsarü Tsurü Akohbong tsalang pümpü ninglang nyükhi la rolang ngunung!”

⁶⁵ Hi yochonü bebü amungthribanü apu shü rehnah yocho, “Müthsamünyüko! Ihsanü yuzi alaa tu müdhsütah! Nührünü ade tsatsa abinü Tsingrangba müthsamünyücho yuchiko!

⁶⁶ Nührü alümcho tuo?” Arühnü lalingcho, “Abi mülangko ko abi süsohbae.”

⁶⁷ Hütsüde arühnü aromih chah müchohkehjücho ko abi chah shingcho; ko abi chah tangrünü

⁶⁸ yocho, “Mesia. Nü chah shingba tsü sünang ihrü te young!”

Peter-nü Jisu Münyengchocho

⁶⁹ Peter kubete pümde bebü amungthriba kulilarü khüdu abi yangro yocho, “Nühsü, Galilrü Jisu yola lichoe.”

⁷⁰ Ta abinü arüh atümung bete münyengchonü yocho, “Nüh tu nengdang chorünang Ihnü mümüdhe.”

⁷¹ Ko abi dongkhu tside, aparü kulilarü khüdunü abi ngu müshüm yarü te yocho, “Hivihi Nazaret-rü Jisu yola lichoe.”

⁷² Anyüpiusü abinü hütsü münyengchonü lalingcho, “Ihnü yuchümre, Ihnü hütsüba nyitsarü tsü mümüdhe!”

⁷³ Azachah lipü hütsüla yarüti Peter yang rocho. “Ajüje nüh arüh yola khüdue. Tunüo nü yuvanü müdhere!”

⁷⁴ “Hütsüde Peter-nü apu chah chokehcholanü yuchümcho! Ihnü hütsüba nyitsarü tsü mümüdhe!” Hütsüde hüna khongcho,

⁷⁵ ko Jisu-nü “Hüna mükhongde nühnü asangpili Ih müchechonung” pü yocho Peter-nü lümchehcho. Ko abinü dongkhu chüdunü khah-a tracho.