MATHI 24 - AMÜSA BAIBEL (BSI)

Amübükuh Thsangnyangnung Choyohcho

¹ Jisu Amübükuh pehjüpü tsichi yade, amonotinü abi yang ronü kuh nengdang tsü thongu yocho.

² Abinü yocho “Ho, nührünü hiri atümung tsa du ngule. Ihnü hi nührü te yore: hila lung khüdu mii ajojila müjonung; arüh apüm trümnyangpehnung.”

Dhsümthsedhsümloh ko Chongcha

³ Jisu olive zong la pümde, monoti tsü abi yang rang ronü tsingdhingcho, “Hi atümung khode tikehnung ihrü te young, ko nüh ronung ko limih changkanung bekhyah tu amüdhethsa linung.”

⁴ Jisu-nü lalingcho, “Müzahng ko sükhyangsü nührü tüthsüyohchüsoh.

⁵ Nyitsarü adrongnü I nengla ronü yonung, ‘Mesia tsü Ih-e’ ko arühnü adrong thsüyohchünung!

⁶ Nührünü amünyeh ko ashula khata yuva yuchinung; ta müci türohcho. Hiri tikehnung, ta hütsü achangka mah.

⁷ Yuchoti khüdunü khüdu te khatanung, ko yanglih khüdunü khüdu iichitanung. Apümlang yangkongthsükong ko alihyo zingba linung.

⁸ Hiri atümung tsü azarü surode akhudiba mikhung kyo linung.

⁹ “Hütsüde nührü rangnü khingchisohnung ko süsohnung khakhuchüjünung. I khyanglangnü amüi tsurü atümungnü nührü thrünyinung.

¹⁰ Hütsüde adrongnü arüh yudsi pehjünung; arüh khüdunü khüdu itsutanung ko khüunü khüu thrünyitanung.

¹¹ Hütsüde arahkheh azikehrü adrong chüronung ko nyitsarü adrong thsüyohchünung.

¹² Hütsüta amünyi bholonung ko nyitsarü adrong amüi rü-ü kangnung.

¹³ Ta sünü achangchi rangchonang abi khümchonung.

¹⁴ Ko hiba ninglang yanglih nengdang yuse atsa limih apümlang amüi tsurü atümung te yuzithsanung thsingyunung; hütsüpü achangka tsü ronung.

Athrünyinung Adrünung

¹⁵ “Nührünü ‘Athrünyinung adrünung’ khüi nengdang azikehrü Daniel-nü chocho hütsü ngunung. Hütsü Amüsa müdüm chah yanung. (Akhirünü müdhenungba: hi adüzü tunang nyichehng!)

¹⁶ Hütsütade sürü Judea la liro arüh azonglang tsieng.

¹⁷ Sü kumungchah liro abi arüh kuh la licho kohro khyünung tüjowü.

¹⁸ Sü luh la liro abinü ashü khyünung thali tüwülung.

¹⁹ Hütsüri nyümongla khingkurü sürü fü müdengro ko akhunga liba atpati nengdang khütoh-i adrünung thsanung!

²⁰ Nührü tsichi nyümong tsü tsingkangde mahkhang Sabath nyümong mütikehnung Tsingrangba te kihchieng!

²¹ Tunüo hütsüba nyümongla thsamütsa tsü limih thripü chünye yingcheh tikeh rocho tenü dee alaa thsanung, mahkhang hütsü kyo khodesü mütikehnung.

²² Ta Tsingrangba-nü nyümong adrong khipehjüko; hütsüta müthsalang, süsü mükhümchonung. Ta abi athrochehrüti khyanglangnü Tsingrangba-nü nyümongti tsü khipehjünung.

²³ “Hütsüde khürünü nüte, ‘Dhing, Mesia tsü hila lile!’ Mahkhang, abi hütsüla lilepü yokhang, hütsü tüyudsi.

²⁴ Tunüo arahkheh Mesia ko arahkheh azikehrüti chüronung; kohkhang, arühnü Tsingrangba athrochehrüti mii thsüyohchünung nengdang thsayahiya ko anyemüyangnung nguchinung.

²⁵ Nyieng! Ihnü nührü te amüngunü hi yopehko.

²⁶ “Mahkhang, khürünü nührü te, Dhing, abi lipilih la tsü lile, hütsülang tüwü; mahkhang, ‘Dhing, abi hila rang pümlepü yokhang, hütsü tüyudsi.’

²⁷ Tunüo Nyitsarü Tsurü tsü ningmüla khüinü ning atümung khu nyüchürolangnü nyüzüdu chii tehro hütsü roh-i ronung.

²⁸ “Khüde asücho me liro, hütsüla hogonti shibülungnung.

Nyitsarü Tsurü Roba

²⁹ “Hütsü thsamütsa nyümongti khukhangyeng, nyü tsü mapehnung ko chonunü müvipehnung, ning chahnü chenghiti trümchonung, ko adukah la liba tase tsü arüh lang lanü shehmüinung.

³⁰ Hütsüpü ningchah Nyitsarü Tsurü roba amüdhethsa chüronung; ko limih la yuchoti atümungnü Nyitsarü Tsurü ninglang nyükhi la zii ko ahechi amülah te jüro ngude tranung.

³¹ Rühti arangcheh mehnung, athrochehrüti alih achangka khüulangnü khüulang chii nübülungnung nengdang abinü ariwürüti limih jongnah müyülang müthehnung.

Ngurüsing Khu Anyichoba

³² “Ngurüsing khunü nührü khyang anyichoba khüdu jüsohng. Khode ajengzati müyah kangnü anu chüro ava thümlangnang, nührünü müyü amünyethsa rolepü müdhere.

³³ Hütsü kyo, khode nührünü hiri atümung ngunang, bekhyah tsü amünyethsa lile, ko ronung thsako pü nührünü müdhenung.

³⁴ Ihnü yuje nührü te yore, hiri atümung mütikehkhangde hiba shang hi mükhutsinung.

³⁵ Ning ko alih khutsinung, ta I yu khodesü mükhutsinung.

Nyümong ko Bekhyah tsü Sünüsü Mümüdhe

³⁶ “Ta hütsüba nyümong ko bekhyah tsü khode ronungnang sünüsü mümüdhe. Au chah khu ninglang riwürüti mahkhang Atsurü nüsü mümüdhe.

³⁷ Nyitsarü Tsurü roba tsü Noa chichah tu tikehcho hütsü kyo linung.

³⁸ Kihmülüm müngu, hütsüri nyümongla nyitsarünü tsunü ko yongnü, khingkurü ko adhrerü xengyangpitanü Noa singkong la züdu nyümong chii licho.

³⁹ Ta kihmülüm ro arüh atümung wohchi tsi yingcheh tu tikeh yacho hütsü arühnü mümüdhecho. Nyitsarü Tsurü rodesü hütsü kyonung.

⁴⁰ Hütsütade nyüh anyüh luh khüdula yuthsah yanung: khüdu notsinung ko khüdu pehjünung.

⁴¹ Khingkurü nyüh anyüh thsang khüdula fürü thsü yanung: khüdu notsinung ko khüdu pehjünung.

⁴² “Hütsüeko müzahng, tunüo tu nyümongla nührü Abüdongba ronungnang nührünü mümüdhe.

⁴³ Kuh abüdongba tsünü aführü ronung bekhyah tsü müdherelang, abinü nyahnung ko aführü tsünü abi kuh la rohphoh müzürosohnung.

⁴⁴ Hütsüeko nührüsü lede rungnüm du libae, tunüo nührünü mülongdi liba shikhe khüdula Nyitsarü Tsurü ronung.

Longlangchehba ko Longmülangchehba Kulirü

⁴⁵ “Khang, longlangchehba ko lümpisa kulirü tsü süo? Hütsü abüdongba-nü sü khyang kulirü aparüti khyang akyang tsuyongnung jünung nyümkehjüro abi tsüe.

⁴⁶ Abüdongba kulang rode akuliba tsü hütsü roh-i nguchi ngurelang, hütsüba kulibong tsü khüta akünyangnung!

⁴⁷ Ajüje Ihnü nührü te yore, Abüdongba tsünü hütsüba kulibong tsü abi kuthsi apüm müshosohnung.

⁴⁸ Ta abi tsü kulirü amütsa thsakhang, apunü Abüdongba tsü anyahli müronungepü lümnü,

⁴⁹ müjang dikehrü chah lahnung ko yongmücharü yola tsuyongnung dikehnung.

⁵⁰ Hütsüde Abüdongba tsü abinü mülongdiba ko abinü müdhe müliba shikhe nyümong khüdula ronung.

⁵¹ Abüdongba tsünü abi tphahchehchüpehnung ko akhürahrüti yola zehsohnung. Hütsüla abi tranung ko ha mütrehkehtanung.