MATHI 23 - AMÜSA BAIBEL (BSI)

Yuzeng Adorü ko Farisirü Nyüm Amüzahnung

¹ Hütsüde Jisu-nü sühdi te ko amonoti te yocho.

² “Yuzeng dorüti ko Farisirü tsü Mosa yuzeng thsamülanung arüh khyang suh jo lile.

³ Hütsüeko arühnü tu yoro hütsü khyücho bichieng; ta arüh tüithsa, tunüo arühnü docho roh-i münguchire.

⁴ Arühnü bürü khangtung chah mükoh hinungthsa khe amüling dhikehjüre, ta arühnülü hütsüri tronung müyungza khüdusü mümühachire.

⁵ Arüh nguchi atümung nyitsarünü ngusohnung du nguchire. Arüh kikhang la ko bipüm la Amüsa yuyungti shengsheng thrahkeh biba tsü dhing, ko arüh tsü khütoh-inang dhing! Ko arüh shü la khütoh-i mükingkehchonang dhing.

⁶ Arühnü thsütithsünangla ko Sinagog la pümji atsauba du khyünyüre.

⁷ Arühnü yanglongla arüh khyang jengreng drü salüm sohnung mürure ko ‘Adorü’ pü dsisohnyüre.

⁸ Nührü te adorü pü müdsisohbae, tunüo nührü atümung ajünirü due ko adorülü khüdu du lile.

⁹ Ko hiba limih la sütesü nührünü ‘Uwa’ pü tüdsi, tunüo nührü Au khüdu du tsü ninglang lile.

¹⁰ Mahkhang nührü te ‘Langnürü’ pü müdsisohbae, tunüo nührü langnürü khüdu du tsü Mesia tsüe.

¹¹ Nührü yola adiuba khüdu tsü nührü dikehrü thsabae.

¹² Sünü abürü jangjang mülahnang abi azikyah kangnung; ko sünü abürü jangjang azikyah kangnang abi mülahsohnung.

Jisu-nü Arüh Khürah Mülangjüre

¹³ “Nührü ahohah, yuzeng adorü ko Farisirüti! Nührü akhürahrüti! Nührünü aparü khyang ninglang Yanglih wünung trahtri tohtijüre, ko nührübürüsü müzüdu, ko azüdunyürüsü müzüdusohre!

¹⁴ Nührü ahohah, yuzeng adorüti ko Farisirüti! Nührü akhürahrüti! Atangnung anyahli dangkhidangnangre, ta nührünü chomirüti kuthsilü kengchore.

¹⁵ “Nührü ahohah, yuzeng adorüti ko Farisirüti! Nührünü nyüh khüdu lasih thsamülasohnung nengdang kihdi ko limih atümung bong rachire; ko khode abi noronang, nührünü abi tsü nührübürü tenü anyüpilinü münyirü kangsohre!

¹⁶ “Nührü ahohah, nahtoh langnürüti! ‘Khürünü Amübükuhnü yuchümkhang, abi yuchüm tsünü abi rah mühle; ta Amübükuh la liba hon tsünü yuchümkhang, abi rah lilepü nührünü dore.’

¹⁷ Amüsithsa nahtohrüti! Khüiba alaa ayingbao? Hon tsü a mahkhang hon müsa kangsohba amübükuh tsüo?

¹⁸ Nührünü hitasü yore, ‘Khürünü bholunü yuchümkhang, abi yuchüm tsünü abi rah mühle; ta bholu chah amübü tsünü yuchümkhang abi rah lile.’

¹⁹ Khüiba alaa ayingbao? Nührü nahtohrale! Amübü tsü a mahkhang amübü müsa kangsohba bholu tsü o?

²⁰ Hütsünü, khode nyüh khüdunü bholunü yuchümnang, abinü hütsünü ko hütsü chah amübü atümungnü yuchümre;

²¹ ko khode amübükuhnü yuchümnang, abinü hütsünü ko Tsingrangba, sü hütsüla liro, abi nengla yuchümre:

²² Ko khode khürünü ningnü yuchümnang abinü Tsingrangba pümji ko hütsü chah sü pümro abi nengla yuchümre.

²³ “Nührü ahohah, yuzeng adorüti ko Farisirüti! Nührü akhürahrüti! Nührünü axümlichi singvarova, thungwi, jira ko tonia hiri lanü mii Tsingrangba khyang dhüre nohlüm jüre, ta atungte Yuzeng adoba adüzünü yuje, yanglilüm ko yuje choba thrüchahchüpehre. Apa tsüsü müthrüchahchüpehpü hirisü bichibae.

²⁴ Anatoh langnürüti! Nührünü sümüza thsengchehpehre, ta ut-lü münyüyohchüre!

²⁵ “Nührü ahohah, yuzeng adorüti ko Farisirüti! ‘Nührü akhürahrüti’ Nührünü nührü shing ko tbhü amichah thsütohre, ta ayonglanglü shükhatoh ko palu nengdang du lümbanü jeng lile.

²⁶ Anatoh Farisirü! Shing ayonglang tsü akhu thsütohng, hütsükhang amichah mii müsanung!

²⁷ “Nührü ahohah, yuzeng adorüti ko Farisirüti! Nührü akhürahrüti! Nührü athrunü münohcho kong kyole, khüiba amilang adhingnung atsah atsa ta ayonglang asürü rühlungrü ko asühcho menü jeng lile.

²⁸ Hütsü roh-i amichahlü atümung te nührünü tsarü roh-i, ta ayonglanglü akhürah ko amünyinü jeng lile.

Jisu-nü Arüh Akhingchi Choyohcho

²⁹ “Nührü ahohah, yuzeng adorüti ko Farisirüti! Nührü akhürahrüti! Nührünü azikehrüti kong adhingtang ko amüsarüti kong seyah münohre.

³⁰ Ko nührü jümürüti chichah nührü lirelang, arühnü nguchiba ko azikehrüti müpsehcho roh-i münguchiba thsakopü nührünü yore.

³¹ Hütsünü nührübürü jangjangthsa nührü azikehrü müpsehrü tsurütiepü yuzi jüre!

³² Khang, nührü jümürütinü tu dikeh yohpüjücho hütsü thümjüng!

³³ Nührü mürüti ko mürü tsurüti! Mümehmi züdunung mülangjücho lanü tsiphunung nührünü khüta longdiro?

³⁴ Hütsüeko Ihnü nührü te yore, Ihnü nührü yanglang azikehrüti, müdhemüthehrü ko adorüti müthehnung; nührünü arüh khürü müpsehnung, aparü hamkehnung ko khürü Sinagog lanü xüpnah yangdi khüdu lanü khüdu chii tsehchinung.

³⁵ Achangkathsa, achomükeh Abel müpsehcho chahnü dikehpü Tsingrangba kuh ko bholu nyüh kahla nührünü müpsehba Berakia tsurü Zekaria chii achomükeh nyitsarüti müpsehchoba akhingchi apüm nührü chah küdunung.

³⁶ Ihnü nührü te yutsatsa yonung; hiri atümung müpsehcho akhingchi tsü hiba shang chah küdunung!

Jerusalem Nengdang Jisu Amüi

³⁷ “Jerusalem, Jerusalem! Azikehrüti müpsehba Tsingrangba-nü nührü yang müthehcho yusi hirüti kengsehba. Hünanü abükyü za aqo pohki nübülungcho roh-i, Ihnü khütopi nührü atümung shüptinyücho, ta nührünü I khyang müshüptisoh!

³⁸ Hütsüeko nührü Amübükuh thrüchahchüpehnung ko adeng lisohnung.

³⁹ Ihnü nührü te yore, ‘Abüdongba nengla sü roro abi müwajüngpü müyode, ade tinü nührünü Ih thali müngunung.’ ”