MATHI 22 - AMÜSA BAIBEL (BSI)

Kukang Thsütinü Yukitacho

¹ Adesü Jisu-nü yukitaba bichi nyitsarüti te chotacho.

² “Ninglang Yanglih tsü hi kyole. Shikhe khüdu yangthsarü khüdunü atsudhre nengdang kukangba thsüti rungnümcho.

³ Thsüti la dsiyohrüti dsinung nengdang abinü apu kulirüti müthehcho, ta arühnü müronyücho.

⁴ Hütsünü abinü apa kulirüti hiba yusi hipü shirü yang müthehcho: ‘I thsüti rungnüm lile; I yo misüpung ko anyünyehba misüza müpsehko, ko apüm rungnüm lile. Thsütilang rung!’

⁵ Ta adsiyohba shirüti tsünü nangyüthsa palu nguchilang tsicho: khüdunü luhlang tsicho, khüdunü anguchilang tsicho,

⁶ aparüti tsünü kulirüti rangpü lahcho, ko arüh müpsehcho.

⁷ Yangthsaba tsü zichürocho; hütsünü abi rothsarü müthehchünü kulirü müpsehrüti tsü müpsehcho ko arüh yangdi tahpehjücho.

⁸ Hütsüde abinü akulirüti dsinü yocho, ‘kukangba thsüti rungnüm lile, ta Ihnü dsiyohrütinü hütsü ngunung müdekheng.

⁹ Hütsüeko yanglonglang tsü wüng ko nührünü khütoi shirünang thsüti lang tsü dsiyohng.’

¹⁰ Achotsü kulirütinü yanglonglang tsü wünü atsa amütsa arühnü shirücho atümung nübülungcho ko kukangba kuh tsü nyitsarünü jengcho.

¹¹ “Yangthsaba tsü shirüti dhingnung züducho ko abinü kukangba shü mümüpipü nyüh khüdu ngucho.

¹² Yangthsabanü abi te tsingdhingcho, ‘I müyang, kukangba jengki mükhyüpü nüh khüta hila zürocho?’ Ta nyitsarüba tsünü tu mülalingcho.

¹³ Hütsüde yangthsabanü kulirüti te yocho, ‘Ajing akheh rahng, ko kubelang amarürah la dhichehchüpehng. Hütsüla abi tranung ko ha mütrehkehtanung.’ ”

¹⁴ Ko Jisu-nü zika yocho, “Adrong dsire, ta azikyah du throchehre.”

Alihmüthsü Jünung Nengdang Atsingdhingba

¹⁵ Farisirü-nü wünü atsingdhingbanü Jisu xohsohnung arah külüpcho.

¹⁶ Hütsüde arühnü arüh mono khürü ko Herod mülung lanü khürü abi yanglang müthehchü yocho. “Adorü, Nühnü yuje yorepü Ihrünü müdhele. Nühnü nyitsarü nengdang Tsingrangba lümcho yuje tsü, nyitsarünü tu lümro hütsü mülümxüpü dore, tunüo nühnü nyitsarü tsah müdhingre.

¹⁷ Khang ihrü te young, nühnü tu lümro? Kaisar khyang alihmüthsü jünung tsü Ihsa yuzeng nyümrü mah-o?”

¹⁸ Ta Jisu-nü arüh arah amütsa tsü müdhecho, hütsünü abinü yocho, “Nührü akhürahrüti! Tuepü nührü Ih xohsohnung müküpro?

¹⁹ Alihmüthsü jünung nengdang thsi tsü Ite ngusohng!” Arühnü abi khyang thsi tsü hirojücho,

²⁰ ko abinü arüh te tsingdhingcho, “Hi sü tsah ko sü nengo?”

²¹ “Kaisar” arühnü lalingcho. Hütsüde Jisu-nü arüh te yocho, “Khang, tu Kaisar yo, hütsü Kaisar khyang jüng, ko tu Tsingrangba yo hütsü Tsingrangba khyang jüng.”

²² Khode arühnü hi yuchicho, arüh nyemüyangcho; ko arühnü abi pehjüpü tsipehcho.

Kangchehliba Nengdang Atsingdhingba

²³ Hütsü nyümong tsü Sadukirü khürü Jisu yang ronü nyitsarü asücho lanü kangchehli müronungepü yocho.

²⁴ Arühnü yocho, “Adorü, Nyüh khüdu atsurü müliko sopehkhang, aninü chomitpü tsü khyübae ko anyünü azarü nümüsuba tsü amung asuu tsurü roh-i khichinung Mosa-nü yocho.

²⁵ Ade, hila arüh jünirü dhünyeh licho. Aziba tsü kukangcho ko azarü mülipü sopehcho, ko abinü chomitpü tsü ani khyang pehjücho.

²⁶ Hütsü roh-i tsü ani anyüuba chahsü ko achangkathsa arüh dhünyehding chah tikehcho.

²⁷ Achangkala, khingkutpü tsüsü sücho.

²⁸ Khang, asürü kangliroba nyümongla, abükyü tsü sü nitpü thsanung? Tunüo arüh atümungnü abükyü tsü khyücho.”

²⁹ Jisu-nü arüh te lalingcho, “Nührü khütoi thsamehro! Hi nührünü Amüsa yu ko Tsingrangba zii mümüdhechonüe.

³⁰ Tunüo khode asürü kangchehli ronang, arüh ninglanglih la riwürüti kyo linung ko kuh mükangnung.

³¹ Khang, asürüti kangchehli rode: Tsingrangba-nü nührü te tu yocho hütsü mükhidhing ang? Abinü yocho,

³² ‘Ih Abraham Tsingrang, Isak Tsingrang, ko Jakob Tsingrang.’ Abi asürü Tsingrang mah, ta akang liba Tsingrang.”

³³ Khode sühdi tsünü hi yuchicho, abinü docho la arüh nyemüyangcho.

Yuzeng Adiu

³⁴ Khode Farisirü-nü Jisu-nü Sadukirü sah müthsasohpü yuchicho, arüh müjang rocho,

³⁵ ko arüh yola Yuzeng adorü nyüh khüdunü atsingdhingba khüdunü Jisu xohsohnung müküpcho.

³⁶ Abinü tsingdhingcho, “Adorü, Yuzeng yola khüiba adiuo?”

³⁷ Jisu-nü lalingcho, “‘Nü lasih apümnü, nü nbü apümnü, ko nü lümlong apümnü Abüdongba nü Tsingrang müing.’

³⁸ Hiba hi adiuba ko ayingba yuzeng tsü lile.

³⁹ Anyüuba Yuzeng ayingba tsü hi: ‘Abürü müicho roh-i nü kurümrü müing.’

⁴⁰ Mosa Yuzeng atümung ko azikehrüti adoba atümung Yuzeng hinyi chah du ngakeh lile.”

Mesia Nengdang Atsingdhingba

⁴¹ Khode Farisirü khürü müjang shibülungcho, Jisu-nü arüh te tsingdhingcho.

⁴² “Nührünü Mesia nengdangsü tu lümro? Abi sü chahnü trahchocho?” Arühnü lalingcho, “Abi David chahnü.”

⁴³ Jisu-nü tsingdhingcho, “Khang, tuepü abi te Abüdongba, pü dsinungthsa anbünü David thsüchicho?” David-nü yocho:

⁴⁴ “Abüdongba-nü I Büdongba te yocho: Ihnü nü rorüti nü jing pohki müyohpüde I tsalangthring püm.

⁴⁵ David-nü mii abi te, Abüdongba, pü dsikhang Mesia tsü khütapü David chahnü trahchocho thsanung?”

⁴⁶ Sünüsü Jisu khyang alalingba tu müjüchehcho, ko hütsü nyümong tinü sünüsü abi te adelü tu tsingdhingnung müci mümülahcho.