MATHI 19 - AMÜSA BAIBEL (BSI)

Jisu-nü Azaba Nengdang Docho

¹ Khode Jisu-nü hiri chokacho, abinü Galil pehjüpü Jordan Yongkhi khüulang Judea lih lang wücho.

² Sühdi amülah abi khanglang iiwücho, ko hütsüla abinü arüh kyangjücho.

³ Farisirü khürü ronü abi thsadsü yocho, “Nyüh khüdunü yuzi khürü mütangpü anitpü zanung Ihsa yuzengnü mülarü mah-o?”

⁴ Jisu-nü lalingcho, “Adikehti Tsingrangba-nü adhrerü ko khingkurü thrichoepü nührünü Amüsa yu mükhidhingcho do?

⁵ Ko Tsingrangba-nü yocho, ‘Hütsünü adhrerünü au ko atpa pehjüpü anitpü te lümkha linung, ko anyüh tsü khüdu kangnung.’

⁶ Hütsüeko adelü arüh tsü anyüh mah, ta khüdu du. Hütsünü; Tsingrangba-nü tu mükhongsohcho hütsü nyitsarünü müzasohbae.”

⁷ Farisirü-nü abi te tsingdhingcho, “Khang tuepü azanung yuzi thrah anitpü khyang jüpü zanung Mosa-nü mülacho?”

⁸ Jisu-nü lalingcho, “Nührü lasih müküprachonü, Mosa-nü nührü nitpürü zanung amülaba jücho. Ta athridinü hütsü roh-i mah.

⁹ Hütsünü Ihnü nührü te yore, Sünü anitpünü longmülangba tu münguchipü abükyü zanang, ko aparü khingkurü khyünang abinü nahtrahnaxengre.”

¹⁰ Amonotinü abi te yocho. “Dhrelanyü kahla hütsü roh-i likhang, kuh müthricho atsau.”

¹¹ Jisu-nü lalingcho, “Hiba adoba hi atümung nengdang mah, ta hütsü Tsingrangba-nü jücho nyitsarü khyang due.

¹² Adhrerünü kuh müthriba tsü yuzi papa lile: khürü hütsü roh-i nümüsucho; aparü tsü nyitsarünü xangmijücho; ko khürü ninglang Yanglih khyanglangnü kuh müthrire. Sünü hiba adoba khyüchochehro abinü hütsü roh-i nguchisohng.”

Jisu-nü Azarüti Müwajücho

¹³ Nyitsarü khürünü Jisu yang azarüti abi khehnü arüh chah thahpüsohnung ko arüh nengdang dangkhidangsohnung norocho, ta monotinü nyitsarüti tsü yübücho.

¹⁴ Jisu-nü yocho, “Azarüti tsü I yanglang rosohng, arüh tüiti, tunüo ninglang Yanglih tsü hitari yo thsanung.”

¹⁵ Abinü arüh chah akhehnü nyümkeh müwajüpü tsisohcho.

Alibong Dhrezarü

¹⁶ Shikhe khüdu Jisu yang nyüh khüdu ro tsingdhingcho, “Adorü, müchangkaba akang ngunung Ihnü nguchi atsa tu nguchinung?”

¹⁷ Jisu-nü lalingcho, “Atsa nengdang nühnü tuepü Ite tsingdhingro?” “Atsalü nyüh khüdu du lile. Akang langi züdunyükhang yuzengti bichieng.”

¹⁸ “Khüiba yuzeng?” Abinü tsingdhingcho. Jisu-nü lalingcho “Tümüpseh; nahtrahnaxeng tübichi, tüfü; arahkheh la süsü tümülangjü;

¹⁹ nüu ko nü tpa jengreng drüng; ko nühnü nü kurümrü nüpu roh-i müing.”

²⁰ “Ihnü yuzeng hiri atümung bichiko, Dhrezaba tsünü lalingcho. Ihnü apa tu nguchinung dhsütahro?”

²¹ Jisu-nü abi te yocho, “Nüh dekhing kangnyükhang, wüng ko nü licho atümung ieng ko thsi tsü ailümrü khyang jüng, ko ninglang nü kuthsi linung; hütsüpü rung ko Ih iirung.”

²² Khode Dhrezabanü hütsü yuchicho, abinü longyü tsipehcho, tunüo abi dee alirü thsacho.

²³ Hütsüde Jisu-nü amonoti te yocho, “Ihnü ajüje nührü te yore: Alirü nengdang ninglang Yanglih la züdunung dee athsah thsanung.”

²⁴ Ihnü loli yore, “Tbang khi la ut bücheh tsinung thsahcho tenü alirünü ninglang yanglih la züdunung deenü athsah-u thsanung.”

²⁵ Khode monotinü hi yuchicho, arüh nyemüyangsehnü yocho, “Khang, sü du khümchonung?”

²⁶ Jisu-nü arüh chah dhingkeh lalingcho, “Hiba hi nyitsarü nengdang amükohnung, ta Tsingrangba nengdanglü apüm akohnung.”

²⁷ Hütsüde Peter-nü lalingcho, “Dhing,” “Ihrünü apüm pehjüpü nü khanglang iirochoe. Ihrü tu ngunungo?”

²⁸ Jisu-nü arüh te yocho. “Ihnü nührü te ajüje yore, khode Nyitsarü Tsurü tsü Shang Asi la abi ahechi pümji la pümnang, hütsüde nührü I khanglang iirorüti dhüreanyüsü yangthsarü pümji chah pümpü, Israel hung dhüreanyüh michah yangthsa thsanung.

²⁹ Ko sürünü I khyanglangnü kuh mahkhang amung-ani mahkhang afü-ani mahkhang au mahkhang atpa mahkhang tsuzarüti mahkhang luphiyongphi pehjücho, thsihpinü alaa ngunung ko müchangkaba akang jünung.

³⁰ Ta ade akhurü adrong akanung, ko ade akarü adrong akhu kangnung.