MATHI 18 - AMÜSA BAIBEL (BSI)

Sü Adiubao?

¹ Hütsü shikhela tsü monotinü Jisu yang ro tsingdhingcho, “Ninglang Yanglih la sü adiubao?”

² Achotsü Jisu-nü azarü khüdu dsiro, arüh bete yasohcho,

³ ko yocho, “Ihnü ajüje nührü te yore, nührü mülichi azarü roh-i mükangde, ninglang Yanglih la nührü khodesü müzüduchehnung.

⁴ Sünü apu jangjang azarü hiroh-i longlüm kangnang abi ninglang Yanglih la adiuba.

⁵ Ko sünü I nengla hitari azarü khyüchonang, abinü Ih khyüchore.

Amünyi Yang Athsadsü

⁶ “Khürünü hiri azarüti yudsila müthikehsohkhang, hütsüba nyitsarü nengdanglü ahong la anyehsing lung arangcheh hohchingpü kihdi asoh la dhsangsehcho atsau.

⁷ Nyitsarü yudsi changsohnung kohroti liba limih tsü khüta adrünung! Hitari lede tikehnung, ta sünü hütsüri tikehsohnang abi nengdang khütoh-i adrünung!

⁸ “Nü kheh mahkhang nü jingnü nü yudsi changsohkhang, hütsü kyüsahpehng! Nü kheh anyüding ko nü jing anyüding kehpü müchangkaba michang la dhiyohchünung tenü nü kheh khüdu mahkhang nü jing khüdu mükehpü akang lang züdunung nü nengdang atsau.

⁹ Ko nü nahtsenü nü yudsi changsohkhang, hütsü hehcheh pehng! Nü nahtse anyüding kehpü mümehmi la dhiyohchünung tenü nü nahtse khüdu kehpü akang lang züdunung nü nengdang atsau.

Achahpehba San Yukitacho

¹⁰ “Hiri azarüti süsü mükhimüngu müthsanung müzahng. Ihnü nührü te yore, ninglang arüh riwürüti tsü ninglang liba I U jingte lede lire.

¹¹ Tunüo Nyitsarü Tsurü tsü achahcho khümchonung rocho.

¹² “Nyüh khüdu san thsih khüdu licho arüh yola khüdu chahde abinü tu nguchinungepü nührünü lümro? Abinü apa kurepü düku tsü akhang la yangtsu pehjüpü achahba san tsü yangchi wünung.

¹³ Ihnü nührü te yore, abinü khode hütsü ngunang, amüchahcho kurepü düku tenü hiba san khüdu nengdang abi alaa akünyangu thsanung.

¹⁴ Hütsü roh-i ninglang liba nührü Aunü hiri azarüti khüdu dusü müchahsohnyüre.

Amünyi Shitpahba Jünirü

¹⁵ “Nü jünirünü nüh nyüm amünyi shitpahkhang, abi yang wüng ko abi thsamehcho tsü ngusohng. Ta hütsü rangnü nühjü kahla du nguching. Abinü nüte nyikhang nühnü nü jünirü jingchoko.

¹⁶ Ta abinü nüte mühnyikhang, nü yola aparü khüdu mahkhang anyüh nüng, hütsüpü Amüsa yunü yocho roh-i, mülangjücho atümung yuzi anyüh mahkhang asang zeh changkanung.

¹⁷ Ko abinü arüh te mühnyikhang, hütsüpü du Lithro atümung te young. Achangkathsa, abinü Lithro te mühnyikhang, abi müyudsirü mahkhang alihmüthsü dhrirü khüdu roh-i khiching.

Yaticho ko Mülacho

¹⁸ “Hütsüeko Ihnü nührü atümung te yore: Limih la nührünü tu yatinang ninglangsü yatinung, ko limih la nührünü tu mülanang ninglangsü mülanung.

¹⁹ “Adesü Ihnü nührü te yore: Limih la khode nührü nyüh anyünü lango nengdang müjangnü kihchinang, ninglang liba I U-nü nührü nengdang nguchinung.

²⁰ Tunüo khüde I nengla anyüh mahkhang asang aroh shibülungnang, hütsüla Ih arüh yola lile.”

Mülang Müpehjüba Kulirünü Yukitacho

²¹ Hütsüde Peter-nü Jisu yang ro tsingdhingcho, “Abüdongba, I jünirünü Ih nyüm amünyi shitpah du shitpahkhang, Ihnü abi te khüdopili mülangpehjünung? Dhünyehpi ang?”

²² Jisu-nü lalingcho. “Dhünyehpi mah, ta nyührepi dhünyehpili,

²³ tunüo ninglang Yanglih tsü hi kyole. Shikhe khüdu yangthsarü khüdunü akulirü thsi-hümnung dhrongchehcho.

²⁴ Abinü khidhingnung dikehchide, abi te thsi million adrong teerü khüdu norocho.

²⁵ Kulibong tsü athsite sahxah mülicho, hütsünü yangthsabanü athsite sahnung atsurü anitpü zeh ayurü roh-i inung yuzengjücho.

²⁶ Hütsüde kulibong tsünü yangthsaba jingte mükhukeh, ‘Ite hari rangchoung; Ihnü apüm sahnung’ pü kihchicho.

²⁷ Yangthsabanü chomang lümcho, hütsünü abinü thsite tsü pehjüpü abi müthehcho.

²⁸ “Hütsüpü kulibong tsü yanglonglang wücho ko müjang kulirü sünü abi khyang denari thsih khüdu jünung licho abi shirücho. Abinü abi rangcho ko ahong la liyehpü yocho, ‘I khyang jünung kehba tsü sahng!’

²⁹ Amüyang kulibong tsünü mükhukeh kihchicho, ‘Ite hari rangchoung, ko Ihnü sahnung!’

³⁰ Ta abinü mühnyicho; ko abinü müsahde abi arangyoh kuh la yohpücho.

³¹ Khode kulirü aparünü atikehcho tsü ngucho, arüh dee mükünyangcho ko yangthsaba yang wü abi te atümung yocho.

³² Achotsü abinü kulibong tsü dsiro yocho, ‘Nüh amükhyu kulirü! Nühnü Ite kihchichonü, nühnü sahnung kehcho atümung Ihnü nüte pehjücho.

³³ Ihnü nüte chomangcho roh-i, nühnüsü nü müyang kuliba te chomangba thsako.’

³⁴ Yangthsaba tsü dee zichürocho, ko abinü kulibong tsü ajühnung licho atümung müsahkhangde khingchinung akhangti kulang müthehcho.”

³⁵ Ko Jisu-nü zika yocho. “Nührü atümungnü, nü lasiking lanü nü jünirü khyang mülang müpehjükhang, ninglang liba I U nüsü hütsü roh-i bichinung.”