MATHI 17 - AMÜSA BAIBEL (BSI)

Tühri Mülicho

¹ Nyümong dhüroh khanglang Jisu-nü abi yola Peter, Jakob ko Johan nüpü, arüh müleng azong athseng chah tuwücho.

² Arühnü dhingyade, Jisu chah amülichi rocho: aromih nyü roh-i tsingsecho, ko abi jengki aririkeh thruthoh kangcho.

³ Hütsüde mono asang tsünü Elija ko Mosa nyüh Jisu te chotachi ngucho.

⁴ Hütsünü Peter-nü Jisu te yocho, “Abüdongba, Ihsa hila liba hi khütoi atsao! Nühnü lümkhang, Ihnü hila shükuh asang thsanung, nü nengdang khüdu, Mosa nengdang khüdu ko Elija nengdang khüdu.”

⁵ Abi chota yade, nyükhi atsingse khüdunü arüh shüticho ko nyükhi la tsünü yuva khüdunü yocho, “Hiba hi Ipu amüiba Tsurü, sü chah I long kyangre, abi yocho nyieng!”

⁶ Khode monoti tsünü yuva tsü yuchicho, arüh adrüchonü arüh romih alih la thsürangcho.

⁷ Ko Jisu-nü ro arüh chah thahpo yocho, “Yamüsung, tüdrü!”

⁸ Hütsüde arühnü tsungmüsu dhingcho ko Jisu chah khu hütsüla süsü müngucho.

⁹ Arüh azonglangnü jürode, Jisu-nü arüh te yuzengjo yocho, “Nyitsarü Tsurü asücho lanü kangchehli mürode, nührünü nguba müngucheh hi nengdang, sütesü tüyo!”

¹⁰ Hütsüde monotinü Jisu te tsingdhingcho, “Tuepü Yuzeng dorütinü Elija akhu ronungepü yoro?”

¹¹ Jisu-nü lalingcho, “Elija tsü yuje akhu ronung ko abinü lüpcho rungnümnung.

¹² Ta Ihnü nührü te yore, Elija tsü ropehko ko nyitsarünü abi müdhingchehpü abi chah arüh thsanyücho thsa bichiko. Hütsü kyo Nyitsarü Tsurüsü arühnü mütsa bichinung.”

¹³ Hütsüde abinü baptijüba Johan nengdang arüh te chorepü monotinü nyichehcho.

Amünyi Nbünü Rangcho Azarü Kyangjücho

¹⁴ Khode arühnü sühdi yang thali rocho, nyüh khüdu Jisu yang ronü ajing chah mükhukehcho,

¹⁵ ko yocho, “Adirü, I tsudhre te chomang! Abi füyüm kehle, ko abi khütang khingchire ko adrongpi michang la ko kih la abi khüluyohre.

¹⁶ Ihnü nü monoti yanglang abi norocho ta arühnü abi mükyangjücheh.”

¹⁷ Jisu-nü lalingcho, “Nührü yudsi müliba ko thsamehba nyitsarüti! Khütoi chah Ih nührü te linung? Khütoi chah Ihnü nührü te rangchonung? Azaba tsü Ih yang norung!”

¹⁸ Jisu-nü amünyi nbü khyang tsü yuzengjücho ko azaba chahnü tsipehcho ko hütsüde tsünü abi kyangpehcho.

¹⁹ Hütsüde monotinü Jisu yang rang ro tsingdhingcho. “Ihrünü khütacho amünyi nbü tsü mü-iipehchehcho?”

²⁰ “Hütsü nührü yudsi mükükyüchonüe” Jisu-nü lalingcho. “Ihnü ajüje nührü te yore, nührü yudsi xehnyi tse toh-i dusü likhang, nührünü hiba akhang te yonung kohnung, ‘Hilanü hütsüla wüng!’ Ko hütsüla wünung. Nührünü lüpcho kohnung!”

²¹ Ta hitarilü dangkhidangnang ko kongcho dunü iipehnung kohre.

Jisu-nü Abi Sünung Nengdang Thali Chocho

²² Khode monoti atümung Galil la shibülungcho, Jisu-nü arüh te yocho, “Nyitsarü Tsurü tsü nyitsarü kheh la jünung thsako,

²³ arühnü abi müpsehnung; ta nyümong asang khanglang abi kangchehli ronung.” Monoti tsü dee mükünyangpehcho.

Amübükuh Amüthsüh

²⁴ Khode Jisu ko amonoti Kapernaum lang rocho, amübükuh müthsüh dhrirütinü Peter te ro yocho, “Nührü adobanü amübükuh amüthsüh jüro müjüro?”

²⁵ “Jüre” Peter-nü lalingcho. Khode Peter kuh la tsü züducho, Jisu-nü akhu chota yocho, “Simon, nü alümcho tuo? Hiba limih yangthsarü khyang amüthsüh sünü jüro? Shutsakhungrünü a mahkhang yangpirütinüo?”

²⁶ “Yangpirütinü.” Peter-nü lalingcho. “Khang tsale” Jisu-nü lalingcho. “Hütsü adüzü shutsakhungrünülü müjübae.

²⁷ Ta Ihsanü hiri nyitsarüti mümüthikehsohnyüre. Hütsüeko kihdi lang tsü wüng ko nguh xohsing khüdu tsayohchüng. Ko akhudi xohba nguh tsü tphahchehng, ko abe la shekel khüdu nührü nengdang amübükuh müthsüh jüxah zehnung. Hütsü khyo arüh khyang Ihsa kuh müthsüh jüng.”