MATHI 16 - AMÜSA BAIBEL (BSI)

Thsayahiya Khüdu Chingcho

¹ Farisirü ko Sadukirü khürü Jisu thsadsünyo abi yang rocho ko arühnü thsayahiya khüdu ngusohngpü tsingdhingcho.

² Ta Jisu-nü lalingcho, “Nyüzeh rode, nührünü yorü, tsingnyü tsanung, tunüo ning mohle.

³ Ko anyangnyü mütoh nührünü yorü, ‘Tsing ronunge, tunüo ning mohle ko marürahle.’ Ningchah dhingnü nührünü tsingnyü yochehre, ta hiri bekhyah nengdanglü nührünü müyochehre!

⁴ Hiba shang hi khüta amünyi ko Tsingrangba mümüdhero! Nührünü Ite thsayahiya khüdu nengdang tsingdhingrü ang? Müngusohnung! Nührü khyang ngusohnung thsayahiya tsü, Jona thsayahiya due.” Hütsüpü abinü arüh pehjüpü tsipehcho.

Farisirü Ko Sadukirü Bhüpza

⁵ Khode monoti tsü kihbekhüm khüulang chihcho, arühnü atsunung lango dusü hinung nbüchücho.

⁶ Jisu-nü arüh te yocho, “Farisirü ko Sadukirü bhüpza nengdang müzahng.”

⁷ Arühbürü yola chota dikehcho, “Ihsanü tsuyongnung tu mühicho chahnü abinü hi yore.”

⁸ Arühnü yoba tsü Jisu-nü müdhe arüh te tsingdhingcho, “Tuepü tsuyongnung tu mühlicho nengdang nührü yola chotaro? Nührü yudsi hitoi aikyah-o?

⁹ Ade yingcheh nührünü münyichehrü ang? Ihnü nyüh hajar münga nengdang hümdhse münga chenahbasü mülümchehrü mah-o? Loh khütoi nyingcho?

¹⁰ Ko nyüh hajar müyü nengdang hümdhse dhünyehsü khüta? Loh khütoi nyingcho?

¹¹ Ihnü nührü te tsuyongnung nengdang chorü mah pü khüta münyichehro? Farisirü ko Sadukirü Bhüpza nengdang nührü jangjang müzahng!”

¹² Hütsüde monoti tsünü abinü müzahsohba tsü tsang la yohba bhüpza nengdang mah ta Farisirü ko Sadukirü adoba nengdang yorepü nyichehcho.

Peter-nü Jisu Nengdang Mishacho

¹³ Jisu Kaisaria Filipi yangdi münyeh rode, abinü amonoti te tsingdhingcho, “Nyitsarütinü Nyitsarü Tsurü tsü süepü yoro?”

¹⁴ Arühnü lalingcho. “Khürünü baptijüba Johan, khürünü Elija, ko aparünü Jeremia mahkhang azikehrü aparü khüduepü yore.”

¹⁵ Ko abinü arüh te tsingdhingcho, “Khang, nührünü Ih süepü yoro?”

¹⁶ Simon Peter-nü lalingcho, “Nüh Mesia, akang liba Tsingrangba Tsurü.”

¹⁷ Jisu-nü lalingcho. “Johan tsurü Simon, nüh amüwa thsaang!” “Tunüo hiba yuje hi shutsa khu mah, ta ninglang liba I U-nü nü khyang jücho lile.

¹⁸ Hütsüeko Ihnü nüte yore, Peter: nüh lung, ko hiba lung michah Ihnü I Lithro külüpnung, ko asü nüsü khodesü mükohnung.

¹⁹ Ihnü nü khyang ninglang Yanglih azihsing jünung; nühnü limih la tu rahnang hütsü ninglang rahnung, ko nühnü limih la tuturü lehchehnang hütsü ninglang sü lehchehnung.”

²⁰ Hütsüde Jisu-nü amonoti te abi tsü Mesia epü sütesü müyonung yuzengjücho.

Jisu-nü Abi Chongchanung ko Sünung Choyohcho

²¹ Hütsü shikhe tinü Jisu-nü amonoti te khohcheh yonung dikehcho, “Ih Jerusalem lang wübae ko azirüti, bebü ayingti, ko Yuzeng adorüti chahnü akhingchi amülah ngunung. Ih süsohnung, ta nyümong asang khanglang Ih kangcheli ronung.”

²² Peter-nü abi nükhupü yübünung dikehcho, “Tsingrangba-nü hi yatieng, Abüdongba” abinü yocho. “Khodesü hütsü nü chah mütikehnung!”

²³ Jisu-nü ximüla Peter te yocho, “I tenü shehkhung, Satan! Nüh I nengdang amüthikehsing khüdu lile, tunüo nü lümlong hi Tsingrangba chahnü mah, ta nyitsarü chahnü lile.”

²⁴ Hütsüde Jisu-nü amonoti te yocho, “Khürünü I khanglang ronyükhang, ajangjangthsa rahsehng, ko palu khala dhipü Ih iirung.

²⁵ Tunüo sürünü palu akang khümchonyüro hütsü changnung; ta sürünü I nengdang palu akang changnang hütsü ngunung.

²⁶ Nyüh khüdunü limih atümung jingchopü apu akang changkhang tu jingchonung? Mahkhang nyitsarü khüdunü abi akang müli tu jünung?

²⁷ Tunüo Nyitsarü Tsurü Au ahechi la abi riwürüti te ronung thsale, hütsütade abinü nyitsarü müipi khyang palu nguchi aichi jiyünung.

²⁸ Ihnü nührü te ajüje yore, Nyitsarü Tsurü yangthsarü kyo rocho müngudelü müsünung nührü yola khürü hila lile.”