MATHI 15 - AMÜSA BAIBEL (BSI)

Jümürü Adoba

¹ Hütsüde Farisirü ko Yuzeng adorü khürü Jerusalem lanü Jisu yang ronü abi te tsingdhingcho,

² “Tuepü nü monotinü Ihsa jümürü adoba mübichiro? Tunüo arühnü kheh mümütsahpü tsuyongre!”

³ Jisu-nü lalingcho, “Tuepü nührünü Tsingrangba Yuzeng mühnyipü nührübürü adocho du bichiro?

⁴ Tunüo Tsingrangba-nü yocho, ‘Nü tpa ko nüu jengreng drüng’ ko ‘sürünü atpa mahkhang au chokehcholanang abilü süsohbae.’

⁵ Ta nyüh khüdu atpa mahkhang au trochehnungthsa lango likhang, ‘Hiba hi Tsingrangba yoe’

⁶ atpa mahkhang au jengreng drünung adhsütah mühlepü nührünü yore. Hiroh-i nührübürü adoba bichinyülangnü nührünü Tsingrangba Yuzeng mükhichire.

⁷ Nührü akhürahrüti! Isaya-nü nührü nengdang choyohba tsü khütoh-i yujeo!

⁸ “Hiri nyitsarünü abe dunü I jengreng drüre, ta arüh lasih I tenü ashu za lile.

⁹ Arüh nengdang Ih mübünung tu adhsütah mühle, tunüo arühnü nyitsarünü külüpcho yuzeng Tsingrangba yuzeng roh-i dore!”

Nyitsarü Münyisohba Kohro

¹⁰ Hütsüpü Jisu-nü amülung tsü abi yanglang dsinü yocho, “Nyieng ko nyichehng!

¹¹ Be la tu züduro hütsünü nyitsarü khüdu münyijürü mah; ta tu be lanü chürorü hütsünü abi münyijüre.”

¹² Hütsütade monoti ro abi te yocho, “Nühnü yoba yu tsünü Farisirü müthikehsorepü nühnü mümüdheo?”

¹³ Jisu-nü yocho, “Ninglang liba I U-nü müchisicho apüm rohpehnung”

¹⁴ “Arüh nengdang tülümxü! Arüh anatohrü langnürüti; ko khode anatohrünü anatohrü lang nonang, anyüding yongroh la thungyohnung.”

¹⁵ Peter-nü yocho, “Hiba yukita ihrü te tsidsa young.”

¹⁶ Jisu-nü arüh te yocho, “Ade yingcheh nührüsü aparü tenü athsehdhsaulü mah.

¹⁷ Nührünü hi münyichehrü do? Tu be lanü tsuyohchüro hütsü ami la züdure ko afü lanü tsire.

¹⁸ Ta abe lanü tu chüroro hütsü lasih lanü chürore, ko hirinü nyitsarü khüdu münyijüre.

¹⁹ Tunüo lasih lanü amünyi lümlong, müpsehnung, nahtranahxengnung, mabomashinung, fühnung, arahkheh chonung ko nyüpmüsehnung chürore.

²⁰ Hirinü nyitsarü münyisohre. Ta kheh mümütsahpü tsuyongchonü nyitsarü khüdu mümünyijüre.”

Khingkurü Khüdu Yudsi

²¹ Jisu-nü hütsü müdüm pehjüpü Tyre ko Sidon lih yang wücho.

²² Kanan-larü khüdu hütsüla licho abi yang ronü züde yocho, “David Tsurü! Ite chomang! I tsulatpü amünyi nbünü dee khingchi lile.”

²³ Ta Jisu-nü abükyü te yu khüdusü müyocho. Ko amonotinü ro abi te kihchicho, “Abükyü tsü tsipehsohng! Abükyünü dee bolo Ihsa khanglang rore!”

²⁴ Hütsüde Jisu-nü lalingcho, “Ih achahcho san, Israelrü nengdang du müthehcho.”

²⁵ Hitade khingkutpü tsü ronü ajing chah mükhukeh yocho, “Ih troung, adirü!”

²⁶ Jisu-nü lalingcho, “Azarü tsuyongnung khyo füza bete thohpehnung athsalang mah.”

²⁷ “Hütsü yuje, adirü, abükyünü lalingcho; ta füzanü mii palu abüdongrü tsingthsang chahnü khatohcholü tsure.”

²⁸ Hütsüde Jisu-nü abükyü te lalingcho, “Nüh yudsi arangcheh liba khingkurü khüdue! Nübükyünü khyünyücho roh-i tikehsohng.” Ko hütsütade tsünü atsulatpü kyangpehcho.

Jisu-nü Nyitsarü Adrong Kyangjücho

²⁹ Jisu-nü hütsü pehjüpü Galil kihdi tung wücho, ko abinü akhang khüdu chah tuwü pümcho.

³⁰ Sühdi amülah abi yang jingjahrü, nahtohrü jahloh-hilohrü, amongdongrü, ko füdhsarü apa adrong noro Jisu jingte yohpüjücho, ko abinü arüh kyangjücho.

³¹ Amongdongrünü yu chocho, jahloh-hilohrü kyangcho, jingjahrünü tsehcho, ko anahtohrü ngusohcho ngude, nyitsarüti tsü nyemüyangcho ko arühnü Israelrü Tsingrang neng secho.

Jisu-nü Nyüh Hajar Müyü Yangtüpcho

³² Jisu-nü amonoti abi yanglang dsinü yocho, “Ihnü hiri nyitsarü nengdang dhsa lümre, tunüo arüh Ite nyümong asang liropü ade atsunung tusü mühle. Ihnü arüh müyangtüp-pü mütsisohnyüre, tunüo arüh langla sütünung.”

³³ Monotinü abi te tsingdhingcho, “Nyitsarü hitoi yangtüpnung tsuyongnung lipilih hila khüde ngunung?”

³⁴ “Nührü hümdhse khütoi liro?” Jisu-nü tsingdhingcho. Arühnü lalingcho, “Hümdhse dhünyeh, ko nguh nümnüm azikyah.”

³⁵ Hütsüpü Jisu-nü sühdi tsü alih la pümsohcho.

³⁶ Hütsüpü abinü hümdhse dhünyeh ko nguh tsü bipü; Tsingrangba khyang anengse jücho, ko chenah amonoti khyang jücho; ko amonotinü chahla jücho.

³⁷ Arüh atümung kükyo tsucho. Hütsüpü monotinü arüh tsunying loh dhünyeh jeng khyübülungcho.

³⁸ Khingkurü azarü mükhipü yangtsurü adhrerü dunü hajar müyü thsacho.

³⁹ Hütsüpü Jisu-nü nyitsarüti tsisohpü, kihtang khüdula züdupü Magadan lih lang wücho.