MATHI 11 - AMÜSA BAIBEL (BSI)

Baptijüba Johan Chahnü Yusi Hirüti

¹ Khode Jisu-nü amono dhüreanyüh te hiri thülakacho, abinü hütsü müdüm pehjücho ko amünyeh yangditila thsingyunung ko donung wücho.

² Khode Baptijüba Johan-nü akhangtikuh lanü Khrista-nü nguchicho yuchicho, abinü amono khürü Jisu yang wüsohcho.

³ Arühnü Jisu te tsingdhingcho, “Johan-nü ronungeba tsü nüh a aparü khüdu longdinung, ihrü te young.”

⁴ Jisu-nü lalingcho, “Thali wüng ko nührünü tu yuchiro ko nguro hütsü Johan te young:

⁵ Nahtohrünü ngunung kohre, jingjahrünü tsehchehre, mübhira kehrü müsachehjüre, nangtbengrünü yuchire, asürü kanglisohre, ko yusi atsa tsü ailümrü te thsingyure.

⁶ Sürünü I nengdang mütütohnyünyehro arüh amüwanung!”

⁷ Johan monoti tsichiyade, Jisu-nü sühdi te abi nengdang chocho: “Khode nührünü lihpi la Johan yang wücho, nührünü tu dhingnyo wücho? Thohva nyübongnü fülüpcho dhingwücho mah-o?

⁸ Nührü tu dhingnung wücho? Jengki thsachehpü yacho nyüh khüdu dhingnung wücho mah-o? Hütsü kyo khyürü tsü yangthsarü kuh la lire!

⁹ Ite young, nührü tu dhingnung wücho? Azikehrü ang? Ho yuje, ta nührünü azikehrü tenüsü awüu nguko.

¹⁰ Tunüo Johan sü nengdang Amüsa yunü hita yore: ‘Tsingrangba-nü yocho, Ihnü nü bekhu nü lang khangthrusohnung I yusi hirü müthehnung.’

¹¹ Ihnü nührü te yutsatsa yore, khingkurüti chahnü surocho yola Johan Baptijüba tenü adiuba sü müchüro; ta sü Ninglang Yanglih la azauba liro abi tsü Johan tenü adiuba.

¹² Johan bekhyah lanü chünye yingcheh ninglang Yanglih tsü kengtare, ko amüküprünü hütsü kengchore.

¹³ Johan bekhyah chii azikehrüti ko Mosa Yuzengnü hiba Yanglih nengdang chocho;

¹⁴ Ko nührünü arüh yusi tsü yudsiekhang, Johan tsü aronung liba Elija tsüe.

¹⁵ Nührü nangkhi tpehkhang nyieng!

¹⁶ “Ihnü chünye nyitsarü hi tu te müjangdhingnung? Arüh shithsachah pümrü azarüti kyole. Mülungo tsünü aparü te tsü züdere,

¹⁷ ‘Ihrünü kulangwü khi thsajücho, ta nührünü münyiichi! Ihrünü meshü khi thsacho, ta nührünü mütra!’

¹⁸ Khode Johan rocho, abinü kongcho ko cikih müyongcho, ko atümungnü yocho, ‘Abi chah amünyi nbü lile!’

¹⁹ Khode nyitsarü Tsurü rocho, abinü tsuyongcho, ko atümungnü yocho, ‘Nyitsarü hi dhing! Amünyomüra ko yongmücharü alih müthsü dhrirü ko münyirü shangrü!’ Ta Tsingrangba lümlong tsü yuje-epü anguchinü ngusohre.”

Müyudsirü Yangditi

²⁰ Jisu-nü thsayahiya adrong nguchiba yangditi la nyitsarünü arüh münyi lanü lasih müthsamülacho, achotsü hütsüri yangditi abinü yübücho.

²¹ “Nüh ahohah, Korazin! Nüh ahohah, Bethsaida! Nührü chah thsayahiya nguchiba roh-i tsü Tyre ko Sidon la nguchire langlü, amüngunü arühnü müyahshü müpipü tavi su lasih thsamülapü liba thsako!

²² Ajüje Ihnü nührü te yore, Yukhaba nyümongla Tsingrangba-nü nührü tenü Tyre-rü ko Sidon-rü te achomang alaa ngusohnung!

²³ Ko nührü nengdanglü, Kapernaum! Nührü jangjang ning chii dhimüsunyücho mah-o? Nührü mümehmi la dhiyohchünung! Nührü chah thsayahiya nguchicho roh-i Sodom la nguchire langlü, hütsü chünye yingcheh liba thsako!

²⁴ Yukhaba nyümongla nührü tenü Sodom-rü te achomang alaa ngusohnung!”

I Yanglang Rung ko Kyahshang

²⁵ Hütsü shikhela Jisu-nü yocho, “Uwa, ning ko alih Abüdongba! Nühnü lümlong lirü ko amüdherü tenü rangpücho amümüdherü te ngusohcho nengdang Ihnü nü nengsere.

²⁶ Ho, Uwa, hi nühnü khyünyücho thsacho.

²⁷ “I U-nü I khyang atümung jüko. Au chah khu sünüsü atsudhre mümüdhe, ko atsudhre chah khu ko sürü yola abi mishanung atsudhrenü throchehchoti chah khu sünüsü Au mümüdhe.

²⁸ “Nührü akherü ko bha müling hirüti, atümung I yanglang rung, ko Ihnü nührü khyang akyahshang jonung.

²⁹ Nührünü I hongzih khyüng ko hütsü dhieng, ko I chahnü nyichoung, tunüo Ih alonglüm ko künale; ko nührünü akyahshang ngunung.

³⁰ Tunüo I hongzih tsü amüla, ko I bha tsü yingyale.”