MATHI 10 - AMÜSA BAIBEL (BSI)

Riwürü Dhüreanyüh

¹ Jisu-nü mono dhüreanyüh dsibülungcho ko arüh khyang amünyi nbü iipehnung ko dhsara ko füdhsa lüpcho kyangjünung zii jücho.

² Riwürü dhüreanyüh neng tsü hiri lile. Akhudiba tsü Simon (Peter pü dsiba) ko ani Andria; Zebede tsurü Jakob ko ani Johan;

³ Filip ko Bartholomeu; Thomas ko alihmüthsü dhriba Mathi; Alfaeus tsurü Jakob ko Thadaeus;

⁴ Kanan-rü Simon, ko Jisu kihyochüba Judas Iskariot.

Mono Dhüreanyüh Nguchi

⁵ Hiri nyüh dhüreanyüh tsü Jisu-nü yu hiri thülapü müthehcho: “Yangpirü lih la khüdesü tüwü mahkhang Samariarü yangditi la khüdesü tüzüdu.

⁶ Hütsü müli, nührünü achahpehba San, Israel tsutpu yanglang wüng.

⁷ ‘Ninglang yanglih amünyethsa lile, pü thsingyunü wüng!’

⁸ Füdhsarü kyangjüng, asürü kangli rosohng, mübhira kehrü müsachehjüng, ko amünyi nbüti iipehjüng. Nührünü amükangnü ngucho, amükangnü jüng.

⁹ Nührünü hon, taripi mahkhang imüyeng thsinye tühi;

¹⁰ Nührü shilang nengdang shibha, mahkhang fükhüm alaa, jingkhüm mahkhang ja tühi; tunüo anguchirü khyanglü abi dhsütah jünung athsalang.

¹¹ “Khüiri yangdi ko yangdongla nührü khode züdunang, nührü nüyohnyürü khürü yangching, ko nührü mütside hütsüla müdong.

¹² Khode nührü kuh khüdula züdunang, ‘Müwajüng’ pü young.

¹³ Abüdongrü tsünü nührü künyang nüyohkhang nührü amüwa hütsüla lisohng; ta arühnü nührü künyang münüyohkhang, hütsü thali tohlieng.

¹⁴ Khürünü nührü münüyoh mahkhang nührü yu mühnyikhang, hütsü müdüm pehjüde, nührü jingchah asongsong tiipeh tsieng.

¹⁵ Ihnü ajüje yore, yukhaba nyümongla Tsingrangba-nü hütsüla liba nyitsarüti tenülü Sodom ko Gomora la liba nyitsarü te achomang alaa ngunung!

Aronung Dhsümthsedhsümloh

¹⁶ “Nyieng! Ihnü nührü rangfü yola San roh-i müthehre. Nührü mürü roh-i athsehdhsa ko mümüdhrü roh-i alonglüm thsaang.

¹⁷ Kukeng, tunüo nyitsarü khürünü nührü rangnung ko yukhachah nowünung, ko arühnü Sinagog la nührü chah xüpnung.

¹⁸ I khyanglangnü; yangpirüti bete yuzithsasohnung governorti ko yangthsarüti bete yukhanung nührü nowünung.

¹⁹ Khode arühnü nührü yukhanung noronang, tu yonung mahkhang khüta chonung nührü tu tülümxü; bekhyah la nührü khyang jünung.

²⁰ Tunüo achoba tsü nührü mah; ta nührü Au Nbünü nührü khu chore.

²¹ “Jünirünü jünirü süsohnung khakhuchüjünung, ko tpurünü atsurü te hütsüroh-i nguchinung; ko tsuzarünü tpurü nyüm shemüsunung ko arüh süsohnung.

²² I khyanglangnü nyitsarü atümungnü nührü thrünyinung. Ta sünü achangchi rangchonang abi du khümchonung.

²³ Khode arühnü yangdi khüdula nührü dhsümthsenang, yangdi palang tsieng. Ihnü ajüje yore, “Nyitsarü Tsurü müroede nührünü Israel yangdi apüm la nührü nguchi münguchikhangenung.

²⁴ “Adoba tenü azarü adiu mah; abüdongba tenü kulirü adiu mah.

²⁵ Hütsüeko azarü khüdunü athsingyuba kyo kangkhang ko kulibanü abüdongba kyo kangkhang, hütsünü longsübae. Kukhi la athahba te Beelzebul pü dsikhang kuh la lirü telü amütsauba neng mii dsinung!

Sü Drünung

²⁶ “Hütsüeko nyitsarü tüdrü. Ade tuturü rangpo liro hütsü mishanung, ko rang licho apüm müdhesohnung.

²⁷ Amala Ihnü nührü te tu yoro hütsü nührünü atsingsela choung, ko nührünü tu rang yuchiro hütsü kumung chahnü züdeing.

²⁸ Sürünü afü du ma anbülü müpsehnung mükohro, arüh tüdrü, ta Tsingrangba sünü mümehmi la afü ko anbü anyüding changjünung kohro abi drüng.

²⁹ Nühnü paisa khüdunü tpütbhü uza anyüh lihchehle, ta nührü Aunü mümüdhepü tpütbhü uza khüdusü alih la mülongchore.

³⁰ Nührü nengdanglü nührü thah chah kuva mii apüm khicheh lile.

³¹ Hütsüeko tüdrü; tpütbhü uza khütango tenü nührü awüba!

Khrista Khyüchocho ko Dhsonglicho

³² “Khürünü nyitsarü bete Ih chechokhang, Ihnüsü ninglang liba I U bete abi chechonung.

³³ Ta khürünü nyitsarü bete Ih müchechokhang, Ihnüsü ninglang liba I U bete abi müchechonung.

Yangtsa Mah, ta Nohsheng

³⁴ “Limih khyang yangtsa hirochoepü tülüm. Yangtsa mah, ta noh chürosohnung Ih rocho.

³⁵ Atsurünü au nyüm, atsulatpünü atpa nyüm, atsudhre nitpünü atsudhre atpa nyümsohnung Ih rocho;

³⁶ arorüh amütsauba tsü abürü kukhi la lirüti thsanung.

³⁷ “Sünü palu au mahkhang atpa I tenü alaa müinang abi I mono thsanung adekheng mah; Sünü palu tsurü mahkhang atsularü I tenü alaa müinang abi I mono thsanung adekheng mah.

³⁸ Sünü palu khala bipü I khanglang mü-iironang abi I mono thsanung adekheng mah.

³⁹ Sünü palu akang jingchonung müküpnang hütsü changnung; ta sünü I nengdang palu akang changnang hütsü ngulinung.

Jiyü

⁴⁰ “Sünü nührü khyüchoro abinü Ih khyüchore; ko sünü Ih khyüchoro abinü Ih sünü müthehcho abi khyüchore.

⁴¹ Sünü Tsingrangba khyüchoro, riwürü thsachonü abinü riwürü khüdu jiyü ngunung. Sünü amüsarü khyüchoro, amüsarü thsachonü abinü amüsarü jiyü khüdu ngunung.

⁴² Ajüje Ihnü nührü te yore, sünü hiri I mono yola azikyauba khüdu khyang I mono thsachonü kihrü shingo dusü tihnang jiyü nguriri.”