MARK 9 - AMÜSA BAIBEL (BSI)

¹ Ko abinü mütozah yocho, “Ihnü nührü te yore, Tsingrangba yanglih zii la roba müngudelü müsünung hila khürü zehle.”

Tühri Mülicho

² Nyümong dhüroh khanglang Jisu-nü abi yola, Peter, Jakob ko Johan nüpü arüh müleng azonglang tuwücho. Arühnü dhingyade, Jisu chah amülichi chürocho,

³ ko abi jengki limih la shü thsürünüsü thru müthsüchehnungthsa dee athru kangcho.

⁴ Hütsüde mono asang tsünü Mosa ko Elija nyühnü Jisu te chotachi ngucho.

⁵ Peter-nü Jisu te yocho, “Athsingyurü, Ihsa hila libahi khütoh-i atsa! Ihsanü shükuh asang thsanung; nü nengdang khüdu, Mosa nengdang khüdu ko Elija nengdang khüdu.”

⁶ Abinü tu lalingnungnang mümüdhecho, tunüo arüh khura drüsehcho.

⁷ Hütsüpü nyükhi ro anbükhümnü arüh phaticho, ko nyükhi la tsünü yuva khüdu rocho, “Hiba hi Ihnü müiba Tsurü, abi yocho nyieng!”

⁸ Arühnü zah dhingmükangcho; ta Jisu chah khu süsü müngucho.

⁹ Arüh azong lanü jürode, Jisu-nü arüh te yuzengjo yocho, “Nyitsarü Tsurü asücho lanü kangli mürode nührünü tu ngucho hütsü sütesü tüyo.”

¹⁰ Arühnü abi yuzeng nyicho, ta arühbürü yola hütsü nengdang chotacho, “Asücho lanü kangchehliba hi tuo?”

¹¹ Ko arühnü Jisu te tsingdhingcho, “Tuepü yuzeng adorütinü Elija akhu ronungepü yoro?”

¹² Abinü lalingcho, “Elija tsü yuje lüpcho rungnümnung akhu ronung. Ta tuepü Azengtachonü Nyitsarü Tsurü dee chongchabae ko mükhyüchobaepü yoro?

¹³ Ta Ihnü nührü te yore, Elija tsü ropehko ko Azengtachonü abi nengdang yocho roh-i abi chah nyitsarünü khyünyücho nguchiko.”

Amünyi Nbü Licho Azarü Khüdu Kyangjücho

¹⁴ Khode arühnü anyingcho monoti yanglang rocho, arühnü mülung amülahnü arüh mükangti arüh te yuzeng adorütinü yurehta ngucho.

¹⁵ Khode nyitsarütinü Jisu ngucho, arüh dee nyemüyangcho, ko shang wünü abi mütohcho.

¹⁶ Jisu-nü monoti te tsingdhingcho, “Nührü tu nengdang arüh te rehtaro?”

¹⁷ Amülung yola nyüh khüdunü lalingcho, “Athsingyurü, Ihnü I tsurü nüh yang noro lile, tunüo abi chah amünyi nbü lile ko yu müchochehre.

¹⁸ Khodederü anbü tsünü abi rangnang alih la khülu abe lanü müjümüphi chüro, aha mütrehkehta ko afü apüm kürahkürah kangre. Ihnü nü monoti te hiba anbü tsü iipehsohnung tsingdhingcho, ta arühnü mükoh.”

¹⁹ Jisu-nü arüh te yocho, “Nührü yudsi müliba nyitsarüti! Khütoi chah Ih nührü te linung? Azaba tsü I yanglang norung!”

²⁰ Arühnü abi Jisu yanglang norocho. Anbü tsünü Jisu nguyeng, azaba tsü yüyümingmingsohcho, hütsünü alih la khülutsu, abe lanü müjümüphi chüro chichicho.

²¹ Jisu-nü au te tsingdhingcho, “Khode tinü hitaro?” Abinü lalingcho, “Azadenü.”

²² “Adrongpi amünyi nbünü abi süsohnung michang ko kih la dümyohchüko. Nühnü kohkhang chomangpü ihrü rükung!”

²³ Jisu-nü yocho, “Nühnü kohkhang! Sünü yudsinang abi nengdang apüm akohnung.”

²⁴ Au tsünü khüdupinü züdecho, “Ihnü yudsire, ta mükükyü. Alaa yudsi linung Ih troung!”

²⁵ Jisu-nü amülung tsü abi yanglang shündhün rocho müdhepü, amünyi nbü te yuzeng jonü yocho, “Mongdongsohba anbü, azaba chah tsünü chürung. Ihnü yuzengjüre ko khodesü abi chah thali tüzüdu!”

²⁶ Anbü tsünü khongnü, azaba tsü alaa yüyümingming pehjüpü chürocho. Azaba tsü asücho roh-i kangcho ko atümungnü yocho, “Abi süko!”

²⁷ Ta Jisu-nü azaba tsü akhehnü marepü khamüsucho, ko abinü yamüsucho.

²⁸ Jisu kuh la züdupü khanglang, amonotinü abi te rang tsingdhingcho, “Khütacho Ihrünü hütsü mü-iipehchehcho?”

²⁹ Jisu-nü lalingcho, “Hitarilü dangkhidangnang chah khu tunüsü mükohre.”

Jisu-nü Apu Sünung Nengdang Thali Chocho

³⁰ Jisu ko amonotinü hütsü müdüm pehjücho ko Galil khu tsicho. Jisu-nü abi khüde lirünang sü khyangsü mümüdhesohnyücho,

³¹ tunüo abi monoti thsingyu licho: “Nyitsarü Tsurü tsü münyirü khyang khakhuchüjünung ko arühnü abi müpsehnung. Tanye nyümong asang lipü abi kangchehli ronung.”

³² Ta arühnü abinü thsingyuba tsü tu adüzünang münyichehcho, ko arühnü abi te tsingdhingnungsü drücho.

Sü Adiubao?

³³ Arühnü Kapernaum lang rocho, ko kuh yonglang züduko khanglang Jisu-nü amonoti te tsingdhingcho, “Nührü langla tu nengdang rehtacho?”

³⁴ Ta arühnü abi te mülalingcho, tunüo arühnü langla arüh yola sü adiubao pü rehtacho.

³⁵ Jisu-nü pümpü amono dhüreanyüh tsü dsinü yocho, “Sünü akhunyüro apu jangjangthsa atümung tenü aka ko kulirü kangbae.”

³⁶ Hütsüde abinü azarü khüdu arüh bete yasohcho. Abinü abi chah khyahripü arüh te yocho,

³⁷ “Sünü I nengla azarü hitari khüdu khyüchonang Ih khyüchore; ko sünü Ih khyüchoro, Ih du khyüchorü mah, ta sünü Ih müthehcho abisü khyüchore.”

Sünü Ihsa Münyümro Abi Ihsa Lahpi Lile

³⁸ Johan-nü abi te yocho, “Athsingyurü, nyitsarü khüdunü nü nengla amünyi nbü iipehchoba Ihrünü nguko, ko Ihrünü abi iiticho, tunüo abi Ihsa mülung yola müzeh.”

³⁹ Jisu-nü arüh te yocho, “Abi tüiti” Tunüo I nengla thsayahiya nguchirü sünüsü Ih nyüm müchonung.

⁴⁰ Tunüo sünü Ih münyümro abi Ihsa lahpi lile.

⁴¹ Sünü I khyanglangnü nührü khyang kih shingo dusü tihnang ajingcho ngunungepü Ihnü nührü te yutsatsa yore.

Amünyi yang Athsadsü

⁴² “Khürünü hiri azarü yudsi la müthikehsohkhang, hütsüba nyitsarü nengdanglü ahong la anyehsing lung arangcheh hohchingpü kihdi la dhsangsehcho atsau.

⁴³ Ko nü khehnü nüh müthikehsohkhang, hütsü kyüpehng! Akheh anyüh kehpü mümehmi la züdunung tenü, akheh khüdu mükehpü akang lang wünung atsau.

⁴⁴ Hütsüla arüh tsuba müci tsü khodesü müsünung, ko michang tsü mümehnung.

⁴⁵ Ko nü jingnü nüh müthikehsohkhang, hütsü kyüpehng. Jing anyüding kehpü mümehmi la züdunung tenü, ajing khüdu mükehpü akang lang wünung atsau.

⁴⁶ Hütsüla arüh tsuba müci tsü khodesü müsüre, ko arüh tahba michang tsü khodesü mümehre.

⁴⁷ Ko nü nahtsenü nüh münyisohkhang, hütsü hehcheh pehng. Nahtse anyüh kehpü mümehmi züdunung tenü, nahtse khüdu mükehpü Tsingrangba yanglih la züdunung atsau.

⁴⁸ Hütsüla ‘arüh tsuba müci tsü khodesü müsünung, ko arüh tahba michang tsü khodesü mümehnung.’

⁴⁹ “Mihnü kangmübü müsachehcho kyo nyitsarü müipi michangnü müsachehnung.

⁵⁰ “Mih tsü atsa; ta amüsüp tsü changkhang, nühnü hütsü khüta thali müsüpsohnung? “Nührü yola shangrü thsaba amüsüp lieng ko khüdunü khüdu te yangtsa la lieng.”