MARK 8 - AMÜSA BAIBEL (BSI)

Jisu-nü Hajar Müyü Yangtüpcho

¹ Tunyah mülipü apa amülung amülah khüdu shibülungcho. Khode nyitsarüti tsü atsunung tusü mülicho, Jisu-nü amonoti dsinü yocho,

² “Ihnü hiri nengdang dhsa lümre, tunüo arüh Ite nyümong asang liropü ade atsunung tusü mühle.

³ Ihnü arüh müyangtüp-pü tsisohkhang arüh langla kongsehnung, tunüo khürülü lang ashulanü rocho lile.”

⁴ Amonotinü abi te tsingdhingcho, “Khüde lipilih hila nyitsarü hitoi yangtüpnung tsuyongnung ngunung?”

⁵ Jisu-nü arüh te tsingdhingcho, “Nührü hümdhse khütoi liro?” Arühnü lalingcho, “Hümdhse dhünyeh.”

⁶ Abinü amülung tsü alih la pümnung mülacho. Hütsüpü abinü hümdhse dhünyeh tsü bipü, Tsingrangba khyang anengse jücho, ko chenah amonoti khyang chahlanung jücho; ko arühnü chahlajücho.

⁷ Arüh kheh la nguh nümnümsü azikyah licho. Jisu-nü hiri nengdangsü anengse jüpü arüh khyang chahlanung jücho.

⁸ Nyüpüm müipi mi jeng tsucho, ko hütsüla nyüh hajar müyü-o licho.

⁹ Hütsüpü monotinü nyingchonyingda loh dhünyeh jeng khyübülungcho. Jisu-nü nyitsarü tsü shishosohpü

¹⁰ zahnü amonoti te kihtang khüdu chah küdupü Dalmanutha lih lang tsicho.

Farisirü-nü Thsayahiya Nengdang Tsingdhingcho

¹¹ Farisirü khürü ro Jisu te rehtamüsucho. Arühnü abi xohsohnyü abi te abi Tsingrangba chahnüepü müdhenung thsayahiya khüdu nguchingpü tsingdhingcho.

¹² Ta Jisu-nü asah soh müshüpü yocho, “Tuepü chünye nyitsarütinü thsayahiya yangchiro? Ihnü yore, hiri nyitsarü khyang hitari yuzi müjünung!”

¹³ Abinü arüh pehjücho, ko kihtang la züdupü shemüsu kihkeh khüulang wücho.

Farisirü ko Herod-rü Bhüpza

¹⁴ Monotinü hümdhse kükyo hinung nbüchücho ko kihtang la arüh te hümdhse khüdu du licho.

¹⁵ Jisu-nü arüh müzahsohnü yocho, “Nyieng, Nührünü Farisirü ko Herod-rü bhüpza nengdang müzahmükieng.”

¹⁶ Arühnü arüh yola thüptanung dikehrü, “Abinü hi Ihsa hümdhse mülichonü yore.”

¹⁷ Jisu-nü arühnü yoba tsü müdhe arüh te tsingdhingcho, “Tuepü hümdhse mülicho nengdang nührünü chotaro? Nührünü ade yingcheh mümüdhe mahkhang münyichehrü ang? Nührü lasih hitoi müküprü ang?

¹⁸ Nahtse kehpü müngurü ang? Nangku kehpü müyuchirü ang? Mülümchehrü mah-o?

¹⁹ Ihnü nyüh hajar münga nengdang hümdhse chenahbasü. Nührünü anyingcho loh khütoi khyübülungcho?” Arühnü lalingcho, “Loh dhüreanyüh.

²⁰ “Ko Ihnü hümdhse dhünyeh nyitsarü hajar müyü nengdang chenahde, Nührünü nyingchonyingda loh khütoi jeng khyübülungcho?” Jisu-nü tsingdhingcho. Arühnü lalingcho, “Loh dhünyeh.”

²¹ Abinü arüh te yocho, “Ade yingcheh nührünü münyichehrü ang?”

Bethsaida la Nahtohrü Khüdu Kyangjücho

²² Arühnü Bethsaida lang rocho, khüde Jisu yang nahtohrü nyüh khüdu noro abi chah thahpüjüng pü kihchicho.

²³ Jisu-nü nahtohba tsü akhehnü shüripü yanglanü nümüi tsicho. Anahtse la tsü müjü müchokehjüpü, Jisu-nü abi chah akhehnü thapo tsingdhingcho, “Nühnü ade lango münguo?”

²⁴ Nyitsarüba tsü tsungmüsupü yocho, “Ho, Ihnü nyitsarü ngule, ta arüh singdong kyo tsehchi ngure.”

²⁵ Jisu-nü anyüpiu nyitsarüba nah la tsü thahpücho. Adelü abinü dhingkeh dhingcho, anahtse tsa kangcho ko lüpcho tsidsa ngucho.

²⁶ Hütsüpü Jisu-nü kulang müthehchü yocho, “Yang la tsü thali tüzüdu.”

Peter-nü Jisu Nengdang Mishacho

²⁷ Hütsüpü Jisu ko amonoti Kaisaria Filipi yangdongti lang wücho. Langla abinü arüh te tsingdhingcho, “Nyitsarünü Ih süepü yoro?”

²⁸ Arühnü lalingcho, “Khürünü nüh tsü baptijüba Johan epü yore; khürünü Elija, khürünü azikehrü yola khüduepü yore.”

²⁹ Abinü arüh te tsingdhingcho, “Khang nührünü khüta! Nührünü Ih süero?” Peter-nü lalingcho, “Nüh Mesia tsüe.”

³⁰ Hütsüde Jisu-nü yuzengjonü yocho, “I nengdang sütesü tüyo.”

Jisu-nü Apu Chongchanung ko Sünung Nengdang Chocho

³¹ Hütsüpü Jisu-nü amonoti te thsingyunung dikehcho: “Nyitsarü Tsurü dee chongchabae, azirüti, bebü ayingti ko yuzeng adorütinü abi mükhyüchonung. Abi süsohnung, ta nyümong asang khanglang kangli ronung.”

³² Abinü arüh te hi dee tsidsa yocho. Hütsünü Peter-nü abi nükhu yübüchicho.

³³ Ta Jisu-nü ximüla amonoti chah dhingnü Peter yübüchi yocho, “Satan, I tenü shehkhung, Nü lümcho tsü Tsingrangba chahnü müro ta nyitsarü chahnüe!”

³⁴ Hütsüde Jisu-nü amülung ko amonoti abi yanglang dsinü yocho, “Khürünü I khanglang ronyükhang, abinü apu nbüchüpehbae, ko apu khala dhipü Ih iirung.

³⁵ Tunüo sünü palu akang khümchonyüro hütsü changnung; ta sünü I nengdang ko Yuse atsa nengdang akang changnang hütsü khümchonung.

³⁶ Nyitsarü khüdunü limih apüm jingchopü apu akang changkhang abi lango jingchorü mah-o? Khodesü mah!

³⁷ Apu akang ngulinungthsa abinü ajühnung tusü mühle.

³⁸ Hiba Tsingrangba mümüdheba ko amütsa nyümongla sünü Ih ko I thsingyuba mihmüxüpnang, Nyitsarü Tsurünüsü Au ahechi la amüsa ninglangrü yola rode, abi nengdang mihmüxüpnung.”