MARK 7 - AMÜSA BAIBEL (BSI)

Jümürü Adoba

¹ Farisirü ko yuzeng adorüti khürü, Jerusalem lanü sürü rocho arühnü Jisu mükang shibülungcho.

² Arühnü amono khürü kheh mümütsahpü tsuyong ngucho, hütsü, arühnü Farisirü-nü yocho roh-i mümütsahcho.

³ (Tunüo, Farisirü ko Jihudarü atümungnü, arüh jümürünü doba yangthsa du tsü bichicho: Athsalangnü kheh mümütsahkhang arühnü mütsuyongcho;

⁴ mahkhang shithsachahnü hirochoba akhu müthsütohkhang tusü mütsucho. Ko apa yuzengsü adrong bichicho, athsalangnü shing, füh imüyeng mütpah-tbhü ko yüpji thsütohthsülanung.)

⁵ Hütsünü Farisirü ko Yuzeng adorütinü Jisu te tsingdhingcho: “Tuepü nü monotinü Ihsa jümürünü docho roh-i müthsapü kheh mümütsahpü tsuyongro?”

⁶ Jisu-nü arüh te lalingcho, “Isaya-nü nührü nengdang choyohba tsü khüta athsalango! Nührü akhürahrüti, abinü thrahcho roh-isü: “Tsingrangba-nü yore, hiri nyitsarünü abe dunü I jengreng drüre; ta arüh lasihlü I tenü ashu za lile.

⁷ Ih mübünung arüh nengdang tu adhsütah mühle, tunüo arühnü nyitsarünü külüpcho yuzeng Tsingrangba yuzeng roh-i dore.

⁸ “Nührünü Tsingrangba yuzeng pehjüpü nyitsarünü dochoti nyire.”

⁹ Jisu-nü mütozah yocho, “Nührünü docho bichinung nengdang Tsingrangba yuzeng mürinung dee sihthsale.

¹⁰ Tunüo Mosa-nü yuzengjücho, ‘Nü tpa ko nüu jengreng drüng, Sünü atpa mahkhang au chokehcholanang abi süsohnung.’

¹¹ Ta nührünü nyüh khüdunü atpa mahkhang au trochehnung lipü ta ‘Hiba hi Korban’ (khüi adüzü, hi Tsingrangba yoe) pü yo dore,

¹² hütsü abinü au mahkhang atpa tronung lanü yatire.

¹³ Hitari nührünü aparü te doba tsünü Tsingrangba yu tsü amükang kangsohre. Ko hiroh-i apasü adrong nührünü nguchire.”

Nyitsarü Münyisohba Kohro

¹⁴ Hütsüpü Jisu-nü anyüpiu amülung tsü abi yang dsinü yocho, “Nührü atümungnü Ite nyieng ko nyichehng.

¹⁵ Amilangnü nyitsarü chah züdu münyisohnung tu mühle. Ta nyitsarü chahnü chürochonü du abi münyijüre.”

¹⁶ Khürü ayuchinung nangkhi tpehkhang abinü nyieng!

¹⁷ Khode abinü amülung tsü pehjüpü kuh la züducho, amonotinü hütsü adüzü young pü tsingdhingcho.

¹⁸ “Nührü aparü tenü tu anyicheh-uba mah, Jisu-nü arüh te yocho, Nührünü münyichehrü ang? Amilangnü nyitsarü chah züduchonü abi mümünyijünung,

¹⁹ tunüo hütsü lasih yang müzüdure ta ami la züdure, ko afü lanü tsire.” (Hi yoba tsü Jisu-nü tsuyongba apüm atsubaepü yore.)

²⁰ Jisu-nü mütozah yocho, “Nyitsarü khüdu chahnü tu chüroro hütsünü abi münyijüre.

²¹ Amünyi lümlong khüinü amümüsa nguchisohnung abinü nonü kengchonung, müpsehnung,

²² nahtrahnaxengnung, müruthsanung, ko amünyi langkhüru nguchinü thsüyohchüba, saying mütsa, nahmoh, müthsamünyü, künyangküshi ko amüsithsa,

²³ hiri amünyi apüm ayonglangnü chürore ko nyitsarü münyijüre.”

Khingkurü Khüdu Yudsi

²⁴ Hütsüpü Jisu-nü pehjü lurü lang Tyre yangdi amünyeh rocho. Abinü kuh khüdula züducho ko sü khyangsü abi hütsüla lilepü mümüdhesohnyücho, ta abinü rang mülichehcho.

²⁵ Khingkurü khüdu, sü tsulatpü chah amünyi nbü licho, abinü Jisu nengdang yuchipü khüdupinü ro ajingte mükhukehcho.

²⁶ Khingkutpü tsü yangpilarü, Syria la Foenicia lih la surocho. Abükyünü Jisu te atsulatpü chahnü hiba amünyi nbü tsü iipehjüng pü kihchicho.

²⁷ Ta Jisu-nü lalingcho, “Ihsalü akhudi azarü tsü yangtüpnung. Azarü tsuyongnung khyo füza khyang jünung athsalang mah.”

²⁸ Abükyünü lalingcho, “Adirü, füzanüsü tsingthsang pohki liba azarü nyingchonyingdalü tsure!”

²⁹ Hütsünü abükyü te Jisu-nü yocho, “Hütsü alalingba khunü nü kulang thali wüng, nü tsulatpü chahnü amünyi nbü tsü tsipehpü ngunung!”

³⁰ Abükyünü kulang wücho ko azarü tsü chongnong chah amünyi nbü tsü tsipehpü yüpjo ngucho.

Nangtbeng-Mongdongrü Nyüh Khüdu Kyangjücho

³¹ Jisu-nü hütsüpü Tyre lih pehjüpü Sidon khu Galil kihdi lang yangdi dhüre khunü wücho.

³² Nyitsarü khürünü abi yang anangtbeng ko amongdongrü nyüh khüdu noro abi chah akhehnü thahpüjüng pü kihchicho.

³³ Achotsü Jisu-nü amülung yolanü amüleng nücheh, anangkhi la amüyungza thsirangjücho, ko amüjü müchokeh abi müle la thahpüjücho.

³⁴ Jisu-nü ninglang dhingkehchü asah müshücho, ko abi te yocho, “Efatha, khüi adüzü, Khangthrung!”

³⁵ Hütsüde tsünü abinü yuchinung kohcho, amüle küshiba khyümüipehcho, ko tu adhsangthsi mülipü chotanung kohcho.

³⁶ Hütsüpü Jisu-nü sütesü müyonung yuzengjücho; ta alaa abinü yatili, alaa du arühnü chochicho.

³⁷ Ko ayuchirü atümung dee nyemüyangcho. Arühnü züdecho, “Abinü khüta atümung tsa kangsohro! Abinü nangtbengrüsü yuchisohre ko amongdongrüsü chochehsohre!”