MARK 6 - AMÜSA BAIBEL (BSI)

Nazaret la Jisu Mükhyüchocho

¹ Jisu-nü hütsü müdüm pehjücho ko arüh yanglang amonotinü müyang thali wücho.

² Sabath nyümong abinü Sinagog la thsingyunung dikehcho. Hütsüla nyitsarü adrong licho; ko khode arühnü abi yu yuchicho, arüh atümung nyemüyangcho. Arühnü tsingdhingcho, “Abi khüdenü yu hiri ngucho? Abi khyang jüba lümlong hi tuo? Abinü thsayahiya khüta nguchichehro?

³ Abi Mary tsurü, Jakob, Josef, Judas ko Simon-rü amung sing nguchibasü mahrü do? Ajünilarütisü hila lirü mahrü do?” Hütsüta arühnü abi mükhyüchocho.

⁴ Jisu-nü arüh te yocho, “Azikehrü khüdu tsü apu yang la ko jünirüti ko apu kukhi chah khu apümlang hechire.”

⁵ Abinü hütsüla füdhsarü adükeh chah akhehnü thahpo kyangjücho chah khu thsayahiya tusü münguchicho.

⁶ Abi dee nyemüyangcho, tunüo nyitsarüti tsü yudsi mülicho. Hütsüpü Jisu-nü hütsü mükang liba yangdongti lang wü thsingyucho.

Jisu-nü Mono Dhüreanyüh Müthehchücho

⁷ Abinü mono dhüreanyüh tsü dsibülungcho ko arüh nyüh anyüh-nyüh müthehcho. Abinü arüh khyang amünyi nbü michah tase jücho

⁸ ko arüh te yuzengjo yocho, “Nührünü ja khüdu chah khu nührü lang nengdang hümdhse, shibha ko ququ la tusü tühi!

⁹ Sing jingkhüm khüm, ta fükhüm alaa tühi.”

¹⁰ Abinü hisü yocho, “Khüdederü nührü khyüchonang nührü mütsi yingcheh hütsüba kuh la du müdong.

¹¹ Nührü yang khüdula wüde nührü mükhyücho mahkhang nührü yu mühnyikhang, nührü jingchah asongsong tiipeh tsieng. Hütsü arüh nengdang amüzahnung khüdu thsanung!”

¹² Achotsü arühnü wücho ko nyitsarünü arüh münyi lanü lasih thsamülabaepü thsingyucho.

¹³ Arühnü amünyi nbü adrong iipehjücho, ko füdhsarü adrong chah olive tuji müyühjü kyangjücho.

Baptijüba Johan Sücho

¹⁴ Ade Herod yangthsabanü hiri apüm nengdang nyisicho, tunüo Jisu nengkhong tsü apümlang sobhocho. Khürünü yocho, “Baptijüba Johan kangchehli roko! Hütsünü thsayahiya nguchichehnung abi chah zii hi kehre.”

¹⁵ Aparünü yocho, “Abi Elija.” Aparünü yocho, “Abi papade azikehrü yola khüdu kyo, azikehrü khüdue.”

¹⁶ Khode Herod-nü hütsü yuchicho, abinü yocho, “Abi baptijüba Johan-e! Ihnü aku dengcho, ta abi kangchehli roko!”

¹⁷ Herod apunü Johan rangsohcho, ko abinü rahsohpü akhangtikuh la yohpücho. Herod-nü amung Filip nitpü Herodias, sü abinü khyücho, abükyü thsacholanü nguchicho.

¹⁸ Baptijüba Johan-nü Herod te yo du yocho, “Nühnü nü mung nitpü khyünung athsalang mah!”

¹⁹ Hütsünü Herodias-nü Johan nyüm kangcho ko abi kyüsehnyücho, ta Herod lichonü abükyünü mükohcho.

²⁰ Herod-nü Johan drücho, tunüo abinü Johan tsü yuje ko Amüsa nyitsarüepü müdhecho, hütsünü abinü abi khümcho yohpücho. Abi yu yuchi müipi abi khütang jangmüzinye, abinü abi yu nyinyücho.

²¹ Achangkala Herodias thsatsa khüdu ngucho. Hütsü Herod suro nyümong, khode, abinü adirüti, anüchirüti ko Galil la langnürüti atümung nengdang thsüti khüdu jücho.

²² Hütsüla Herodias tsulatpü rocho, ko nyichinü Herod ko abi shirüti künyangsohcho. Achotsü yangthsabanü lazatpü te yocho, “Nüh tu khyünyüro? Nühnü tu khyünyünang Ihnü jünung.”

²³ Anyengchoba adrong abinü abükyü te yocho, “Nühnü tu tsingdhingnang I yanglih achangsho miinü jünung Ihnü yuchümre!”

²⁴ Achotsü lazatpü tsünü chüdu atpa te tsingdhingcho, “Ihnü tu chingnung?” Abükyünü lalingcho, “Baptijüba Johan Thah.”

²⁵ Lazatpü tsünü zah thali yangthsaba yanglang ronü khangcho, “Baptijüba Johan ku tbhü khüdula yohpü ade hila I khyang jüsohnyüre!”

²⁶ Hinü yangthsaba dee wahsohcho, ta abinü abi shirü atümung bete nyengchochonü abükyü te müdhsonglichehcho.

²⁷ Hütsünü abinü Johan ku hironung anyahrü khüdu zah müthehcho. Anyahrü tsünü akhangti kulang wücho, ko Johan ku dengcho;

²⁸ ko tbhü khüdula hütsü hiro lazatpü khyang jücho, ko abükyünü hütsü khyo atpa khyang jücho.

²⁹ Khode monotinü hütsü yuchicho, arühnü ro me tsü hiwünü dhrürangcho.

Jisu-nü Hajar Münga Yangtüpcho

³⁰ Riwürüti thalicho ko Jisu te shirütacho, ko arühnü tuturü nguchicho ko thsingyucho apüm abi te yocho.

³¹ Hütsüla nyitsarü drongra wüli-rolichonü Jisu ko amonoti tsuyongnungsü bekhyah müngucho. Hütsünü abinü arüh te yocho, “Ihsalü khüdenang anayingchah nührü azachah kyahshangnungthsa wünung.”

³² Achotsü arühnü anaying yang kihtang khüdu lanü shemüsucho.

³³ Ta, nyitsarü adrongnü arüh tsicho ngucho, ko khüdupinü arüh tsüpcho; hütsünü yangdi atümung lanü Jisu ko amono müngu jingnü shang wü chipehcho.

³⁴ Khode Jisu kihtang la tsünü chürocho, abinü hiba sühdi tsü ngucho, ko alasih la arüh müi lümcho, tunüo arüh anyahrü müliba santi kyocho. Achotsü abinü arüh te lang adrong thsingyunung dikehcho.

³⁵ Khode nyüzeh rocho, monotinü ro abi te yocho, “Hi dee münuko, ko hiba hi anaying müdüm-e.

³⁶ Mükangmüshü yangdongti lanü arüh jangjang lango dusü lii tsusohnung müthehchüng.”

³⁷ Jisu-nü lalingcho, “Nührünü uthring arüh khyang lango atsunung jüng.” Arühnü tsingdhingcho, “Arüh tüptinung nengdang Ihrünü wü denari thsih anyüh peh hümdhse lisohnyürü mah-o?”

³⁸ Jisu-nü arüh te tsingdhingcho, “Nührü kheh la hümdhse khütoi liro? Wüpü dhing.” Khode arühnü alicho tsü ngucho, arühnü abi te yocho, “Hümdhse münga ko Ngusü anyüh lile.”

³⁹ Hütsüpü Jisu-nü amonoti te nyitsarü atümung amülungmülung changnah zanu michah tsü pümsohnung yocho.

⁴⁰ Hütsünü arühnü achung-achung, thsih-thsih ko dhünyang-nyangnü pümsohcho.

⁴¹ Ko Jisu-nü hümdhse münga ko ngu anyüh tsü bipü ninglang dhing, Tsingrangba khyang anengse jücho. Abinü hümdhse tsü chenahcho ko nyitsarüti khyang chahla jünung amonoti khyang jücho. Abinü ngu anyüh tsüsü arüh atümung khyang changnah jücho.

⁴² Arüh müipinü tsucho ko mi jengcho.

⁴³ Hütsüpü monotinü ngu ko hümdhse anyingcho loh dhüreanyüh jeng khyübülungcho.

⁴⁴ Ayangtsurü tsü adhrerü dunü hajar münga thsacho.

Jisu-nü Kih Michah Tsehcho

⁴⁵ Hütsüde tsünü Jisu-nü amonoti kihtang la züdusohcho ko sühdi tsü shishosohde, abi müngu kihkeh khüulang Bethsaida lang tsichi yasohcho.

⁴⁶ Nyitsarüti te aza yu yopü abinü azonglang dangkhidangnangnung tuwücho.

⁴⁷ Khode nyüzeh rocho, kihtang tsü kihdi longla licho, ko Jisu müleng akung la tsü licho.

⁴⁸ Abinü amonoti tsü kihtang tbheng tsiyachah tsü kheseh ngucho, tunüo arüh tsü nyübong nyümnü tbheng tsiyacho, hütsünü asang ko dhüroh bekhyah kahla anyangnyü abi arüh yang kih michah tseh rocho. Abi arüh lahkhu tsinung thsacho,

⁴⁹ ta arühnü abi kih michah tsehchi ngucho. Arühnü hütsü “Amünyi nbüe” pü lüm khongcho.

⁵⁰ Abi ngude arüh atümung nehcho. Jisu-nü arüh te zah chota yocho, “Müci zieng, Ih-e, tüdrü!”

⁵¹ Hütsüpü abinü arüh yola kihtang la züducho, ko nyübong tsü zahpehcho. Monoti tsü dee nyemüyangcho,

⁵² tunüo arühnü nyüh hajar münga yangtüpba tsü münyichehpü arüh lasih la hütsü mürangxahcho.

Jisu-nü Genesaret la Füdhsarü Kyangjücho

⁵³ Arühnü kihdi tsü kehcho ko Genesaret lih ro chihpü hütsüla arüh kihtang xohchingpücho.

⁵⁴ Arüh kihtang la tsünü chüroyeng, nyitsarütinü hütsü Jisuepü tsüpcho.

⁵⁵ Hütsünü, hütsükung lirü atümung tsohkhuta, abi khüdederü lilepü yuchinang, arühnü abi yang füdhsarü arüh yüpji lanü hirocho.

⁵⁶ Ko khüdederü Jisu wücho, yang la, yangdila mahkhang yangza la, nyitsarünü füdhsarü yanglong la noronü, abi shüyo chah dusü thahpüsohng pü kihchicho; ko sürünü hütsü thahpücho arüh kyangcho.