MARK 4 - AMÜSA BAIBEL (BSI)

Mashurünü Yukitacho

¹ Jisu-nü thali Galil kihdi müshüm thsingyunung dikehcho. Amülung tsü sühdirachonü abinü kihtang khüdu chah küducho ko hütsüla pümcho. Kihtang tsü kih michah ko amülung tsü kihbekhümla yacho.

² Abinü arüh te lang adrong thsingyunung yukitaba bichi yocho:

³ “Nyieng! Nyüh khüdu mashunung wücho.

⁴ Abinü majüh tsü shude, khürü langthsilang longcho, ko uzati ro hütsü tsupehcho.

⁵ Khürü alih dee mülicho lungsüh la longcho. Alih tsü jengpachonü majüh tsü zah surocho.

⁶ Ko khode nyü chüro anu chah tsü hecho; ara tsü soh mürayohtsichonü, anu tsü zah mükupehcho.

⁷ Majüh khürü zengtrung yola longcho, hütsü zide anu tsü khüpsehcho, ko hütsüri tsünü asih müjücho.

⁸ Ta majüh khürü alih asu la longcho, ko anu chinü ko zinü asih sihcho: khürü chah asih sangre, rohre ko thsih sihcho.”

⁹ Ko Jisu-nü zika yocho, “Sü ayuchinung nangkhi tpehro abinü nyieng!”

Yukitaba Alümcho

¹⁰ Khode Jisu anehbi licho, ayu yuchirü khürü mono dhüreanyüh yola müjang ro yukitaba tsü changnah young pü tsingcho.

¹¹ Jisu-nü arüh te yocho, “Nührü khyanglü rang liba Tsingrangba yanglih tsü jüko, ta aparü sürü amilang liro, atümung te yukitaba dunü yore,

¹² hütsünü du, “Arühnü angulü ngunung, ta müdhingchehnung; ayuchilü yuchinung, ta münyichehnung. Hütsüta müthsarelang arühnü Tsingrangba yang ximülanung, ko abinü arüh mülangpehjünung.”

Jisu-nü Yukita tsü Changnah Yore

¹³ Hütsüpü Jisu-nü arüh te tsingdhingcho, “Nührünü yukitaba hi münyichehrü mah-o? Khang khüta, nührünü yukitaba khüdu dusü nyichehnung?

¹⁴ Mashurü tsünü Tsingrangba yusi tsü shure.

¹⁵ Nyitsarü khürü langthsilang longba majüh tsü kyole; arühnü yusi tsü yuchiyeng, satan ro hütsü hitsipehre.

¹⁶ Aparü khürü tsü lungsüh yola longba majüh tsü kyole. Arühnü yusi tsü yuchide, hütsü künyangseh khyüchore.

¹⁷ Ta arüh chah hütsü ara mülichonü, anyahli mülire. Hütsünü khode hiba yusi nengdangnü chongcha mahkhang dhsümthse ronang, arühnü hütsü khüdupinü pehjüre.

¹⁸ Aparü khürü tsü zengtrung yola longba majüh tsü kyole. Hiri tsü sürünü yusi tsü yuchiro,

¹⁹ ta hiba akang nengdang lümtpanah, kuthsi müiba ko apa mükhyahmürah züronü yusi tsü khüpsehre ko asih müsire.

²⁰ Ta aparü khürü tsü alih asu la shucho majüh kyole. Arühnü yusi tsü yuchirü, khyüchorü, ko asih khürünü sangre, khürünü rohre ko khürünü thsihpi sihre.”

Loh Pohki Dsi Khüdu

²¹ Jisu-nü mütozah yocho, “Nyüh khüdunü dsi hiro loh pohki mahkhang yüpji pohki yohpürü do? Abinü hütsü avihpüsing la müvipürü ang?

²² Tuturü rang liro hütsü mishanung, ko tuturü haptipo liro hütsü khangthrunung.

²³ Khürü ayuchinung nangkhi tpehkhang abinü nyieng!”

²⁴ Abinü arüh te hisü yocho, “Nührünü tu yuchiro hütsüla lasih jüng! Yuzeng khüinü nühnü aparü yukharü, hütsüba sako yuzeng tsünü mahkhang dee alanü Tsingrangba-nü nü yu khanung.

²⁵ Sü lango liro abi khyang alaa jünung, ko sü tusü müliro abi chahnü abi licho azikyah tsü mii hitsinung.”

Zichiba Majühnü Yukitacho

²⁶ Ko Jisu-nü yocho, “Tsingrangba yanglih tsü hi kyole. Nyitsarü khüdunü aluh la mashure.

²⁷ Abinü aromang yüprü ko jesurü, ko hütsütade majüh tsü kahrüp zire, ta hütsü khüta zirünang abinü mümüdhe.

²⁸ Alihsu ajangjangthsa adong tsü zii ko asih sihsohre; akhudi makhuh hütsüpü angüm, ko achangkathsa angüm tsü asih liipinung.

²⁹ Khode fürü tsü nyinang, nyitsarüba tsünü ayavinü hütsü xanung dikehre, tunüo maxa kyang chihko.

Xehnyi Tsenü Yukitacho

³⁰ “Ihsanü Tsingrangba Yanglih tsü tu kyolepü yonung pü Jisu-nü tsingdhingcho. Ihsanü hütsü changnah yonung tu yukitaba bichinung?

³¹ Hi kyo lile, Nyüh khüdunü xehnyi jüh khüiba limih la azauba liro, hütsü alih la shure.

³² Azachah lipü hütsü zirü ko singdongti apüm tenü adiu kangre. Hütsünü ajengza amülülah chüro ko uzatinü ro hütsü khümki arüh süp shüre.”

³³ Jisu-nü nyitsarü te abi yusi hiri kyo yukitaba adrong bichinü; arühnü nyichehnungthsa arüh te thsingyucho.

³⁴ Abinü yukita müzehko arüh te müchocho, ta khode abi monoti te abi müleng licho, abinü lüpcho changnah yocho.

Jisu-nü Tsingxinyübong Zahsohcho

³⁵ Hütsü nyümong nyüzeh tside Jisu-nü amonoti te yocho, “Ihsanü kihdi khüulang tsü wünung.”

³⁶ Ko arühnü amülung tsü pehjücho; ko Jisu pümyaba kihtang la tsü monoti tsü küducho, ko arühnü abi arüh te nücho. Hütsüla kihtang apa mii licho.

³⁷ Dhrongyengnü tsingxinyübong arangcheh fücho, ko kihtang la tsü kiloh mülümyohcho, ko kihnü kihtang tsü ajengrü thsacho.

³⁸ Jisu tsü kihtang jongnah la athah ngakehnü yüpjocho. Monotinü abi khamüsu yocho. “Athsingyurü, Ihrü changnung nühnü müditpangrü ang?”

³⁹ Jisu-nü shemüsu nyübong khyang yuzengjo yocho, “Naying lieng! Ko abinü kiloh te yocho, Longlüm lieng! Hütsüde nyübong tsü zahcho, ko hütsüla alonglüm amülah licho.

⁴⁰ Hütsüpü Jisu-nü amonoti te yocho, Tuepü nührünü drücho? Ade yingcheh yudsi mülirü ang?”

⁴¹ Ta arüh dee drümüyang, khüdunü khüdu te yocho, “Nyübong ko kilohnü mii ayu nyinungthsa nyitsarü hi süo?”