MARK 2 - AMÜSA BAIBEL (BSI)

Dsidsi sürü Khüdu Kyangjücho

¹ Nyümong azachah lipü Jisu Kapernaum lang thalicho, ko abi kuh la lilepü sobhocho.

² Hütsünü nyitsarü khütango shibülungchonü kuh la ko kuhbenüsü müzuhcho; ko Jisu-nü arüh te yusi tsü thsingyucho.

³ Hütsütade dsidsi sonü füdhsarü nyüh khüdu Jisu yang nyüh müyünü dhipü rocho.

⁴ Ta sühdirachonü arühnü abi yang no müzüduchehcho. Hütsünü Jisu üde kumung rohphohpü nyitsarüba tsü yüpji chah tsünü dhichahchücho.

⁵ Arüh yudsi mülahcho ngu, Jisu-nü dsidsi sonü dhsaba te tsü yocho, “Itso, nü münyi pehjüko.”

⁶ Hütsüla yuzeng adorü khürü arüh lüm la tsingdhingnü pümcho.

⁷ “Abinü hita chonung müci mülahrü ang? Hi Tsingrangba müthsamünyüre! Tsingrangba dunü münyi pehjünung kohle!”

⁸ Khüdupinü Jisu-nü arühnü lümba tsü müdhecho, achotsü abinü arüh te yocho, “Nührünü tuepü hita lümro?

⁹ Hiba dsidsi süba te, ‘Nü münyi pehjüko, pü yonung amülaba a’ mahkhang, ‘Shemüsung, nü yüpji dhing, ko tsehng pü yonung amülabao’?

¹⁰ Khang, Ihnü nührü te yonung, Nyitsarü Tsurü hiba limih la münyi pehjünung tase kehle.” Hütsünü abinü dsidsi süba te yocho,

¹¹ “Ihnü nüte yore, Shemüsung, nü yüpji dhieng ko kulang wüng!”

¹² Arüh atümungnü dhingyade, nyitsarüba tsü shemüsucho, ayüpji dhicho ko dhsüdhsa tsicho. Arüh atümung dee nyemüyangcho ko Tsingrangba neng senü yocho, “Ihrünü hiroh-i khodesü müngudhing!”

Jisu-nü Levi Dsicho

¹³ Jisu-nü Galil kihdi bekhüm lang thali wücho. Ko amülung amülah abi yang rocho, ko abinü arüh te donung dikehcho.

¹⁴ Ko abi lahkhu tside, alihmüthsü dhrirü nyüh khüdu, Alfaeus tsurü Levi, abi dochungkuh la püm ngucho. Jisu-nü abi te yocho, “Ih iirung.” Levi-nü shemüsu abi iiwücho.

¹⁵ Akhanglang Jisu tsü Levirü kuh la yangtsu pümde, alihmüthsü dhrirü ko münyirü adrong Jisu ko monoti yola pümcho; tunüo arüh adrong abi yola zehcho.

¹⁶ Yuzeng adorü khürü sürü Farisirü thsacho, arühnü Jisu tsü alihmüthsü dhrirü ko münyirü te tsuyongrüta ngu, abi monoti te tsingdhingcho, “Tuepü abinü hitari yola tsuyongro?”

¹⁷ Jisu-nü hütsü yuchi lalingcho, “Tsayengrü nengdang akyangjürü müdhsütah, ta füdhsarü nengdang dhsütahre. Ih amüsarü nengdang mah, ta münyirü dsinung rocho.”

Kongcho Nengdang Atsingdhingba

¹⁸ Bekhyah khüdu baptijüba Johan ko Farisirüti kongnü licho. Nyitsarü khürünü Jisu te ro tsingdhingcho, “Tuepü baptijüba mono ko Farisirü monoti kongde, nü monotilü mükongro?”

¹⁹ Jisu-nü lalingcho, “kukangba thsütila shirü tsü kongnung athsalang mah-o? Hütsüta mah! Kuthriba arüh yola lidelü arüh kongnung mükoh.

²⁰ Ta khode arüh yolanü kuthriba tsü notsinang, hütsüde arüh kongnung nyümong tsü ronung.

²¹ “Shü asi ahi chah sünüsü mükhümkehre, tunüo asi tsü tsingnung ko shü athreh tsü rehphohnü, akhi adiuthring tpehsohre.

²² Mahkhang sünüsü cikih asi shuküp shinga ahi la müliire, tunüo cikih tsünü shuküp tsü tsohrüpnung, ko shinga e cikih anyüding müzangnung. Hütsü müli, cikih asi tsü shinga asi la liibae.”

Sabath Nengdang Atsingdhingba

²³ Sabath nyümong Jisu-nü luh lahkhu tsicho. Ko monotisü abi yola wüyade, arühnü fürü müyeh tsunung dikehcho.

²⁴ Hütsünü Farisirü-nü Jisu te yocho, “Dhing, Sabath nyümong nü monotinü hütsü roh-i nguchiba tsü ihrü yuzeng nyüm nguchire!”

²⁵ “David ko anyitsarüti dhsütah ko yangseh lide, abinü tu nguchicho nührünü khodesü mükhidhingcho do?

²⁶ Abinü Tsingrangba kuh la züducho ko Tsingrangba khyang mübücho hümdhse tsucho. Hiba hi Abiathar bebü amungthri thsade tikehcho. Ihrü yuzengnü, hitari tsuyongnung tsü bebürü dunü tsunungbae, ta David-nü hütsü tsucho ko anyitsarü khyangsü jücho.”

²⁷ Ko Jisu-nü yocho, “Sabath nyümong tsü nyitsarü tsanung nengdang külüpcho; Sabath nyümong nengdang nyitsarü mükülüp.”

²⁸ Hütsüeko Nyitsarü Tsurü tsü Sabath nyümong michahsü Abüdongba.