MARK 14 - AMÜSA BAIBEL (BSI)

Jisu Nyüm Arah

¹ Ade Phungkhu Thsüti ko Bhüpza müyohba Hümdhse thsüti chihnung nyümong anyüh licho. Bebü ayingti ko yuzeng adorütinü rangnü Jisu rangnung ko süsohnung nengdang lang yangchicho.

² Arühnü yocho, “Hütsü Ihsanü thsüti bekhyah münguchinungbae, mahkhang nyitsarütinü nyüm yamüsunung.”

Bethany la Jisu Müyühjücho

³ Jisu Bethany la mübhira chüroba Simon-rü kuh la pümcho. Ko Jisu yangtsu pümde, khingkurü khüdunü nard müdhsengnü külüpcho amii athsah axümlichi tuji alabaster füh khüdu jeng bipü rocho. Abükyünü hütsü müprüp Jisu thah chah tungkehjücho.

⁴ Hütsüla nyitsarü khürülü zichüro khüdunü khüdu te yocho, “Axümlichi kehba tuji tsü müzangnung tu adhsütah-o?

⁵ Hütsü denari thsih asang chah kehnü ipü ailümrü khyang jüba thsako!” Ko arühnü abükyü khatacho.

⁶ Ta Jisu-nü yocho, “Abükyü yah pehjüng! Tuepü abükyü longmüziro? Abükyünü Ite nguchi atsa nguchiko.

⁷ Ailümrü nührü te lede linung, ko nührünü tronyüde arüh trochehle. Ta Ihlü nührü te lede mülinung.

⁸ Abükyünü tu kohcho hütsü nguchiko; abükyünü Ih dhrürangnung becho müchie Ifü la axümlichi müyühjüko.

⁹ Ade, Ihnü nührü te yore, limih apümlang khüdederü yuse atsa thsingyunang, abükyünü tu nguchicho hütsü lümcheh chonung.”

Judas-nü Jisu Kihyochünung Nyengchocho

¹⁰ Hütsüpü Judas Iskariot, mono dhüreanyüh yola khüdu, bebü ayingti yang Jisu kihyochüjünung nengdang wücho.

¹¹ Abinü tu yocho hütsünü arüh künyangcho, ko abi khyang thsi jünung nyengchocho. Hütsünü Judas-nü arüh khyang Jisu khakhuchüjünung thsatsa yangchicho.

Jisu-nü Monoti te Phungkhu Thsüti Tsucho

¹² Bhüpza müyohba Hümdhse Thsüti adikeh nyümong, kangchehnung thsüti nengdang sanzati müpseh nyümong, monotinü abi te tsingdhingcho, “Kangchehnung thsüti tsunungthsa ihrünü nü nengdang khüde wü rungnümsohnyüro?”

¹³ Achotsü, Jisu-nü arüh yolanü nyüh anyüh müthehnü yocho: “Yangdi la tsü züdung, ko nyüh khüdu kih shinga hipü nühjünü mütohnung. Abi iiwüng

¹⁴ ko abi züduba kuh abüdongrü te tsü young: ‘Athsingyubanü yore, Ih ko I monoti Phungkhu Thsüti tsunung kuh chongshah tsü khüdeo?’

¹⁵ Hütsüde abinü arungnümcho amungthri chongsah amülah khüdu nührü te thongunung, hütsüla nührünü Ihsa nengdang adhangpi rungnüm.”

¹⁶ Monotinü pehjüpü yangdi lang tsü züducho, ko adhangpi Jisu-nü yocho roh-i ngucho; ko arühnü Phungkhu Thsüti tsü rungnümcho.

¹⁷ Khode nyüzehcho, Jisu-nü mono dhüreanyüh yola rocho.

¹⁸ Ko arüh tsingthsang chah yangtsu pümde, Jisu-nü yocho, “Ihnü nührü te yore, Nührü yola Ite yangtsurü khüdunü Ih kihyochüjünung.”

¹⁹ Monoti tsü longyüpehcho ko abi te khüdu khanglang khüdunü tsingdhingcho, “Hütsü Ih mah-o?”

²⁰ Jisu-nü lalingcho, “Hütsü nührü dhüreanyüh yola khüdu, sü hümdhse I tbhü la dhsangnang abi thsanung.

²¹ Nyitsarü Tsurü tsü Azengtachonü yocho roh-i abi sünung; tanye sünü Nyitsarü Tsurü kihyochonang, hütsüba nyitsarü nengdang khüta ahohah! Hütsüba nyitsarü tsülü müsurojungcho atsau thsako!”

Abüdongba Thsüti

²² Arüh yangtsu yade, Jisu-nü hümdhse khyüpü anengse jücho, chenahcho ko amonoti khyang jücho. Abinü yocho, “Hi khyüng, hi I füe.”

²³ Hütsüpü abinü shing khüdu khyücho, Tsingrangba khyang anengse jücho, ko arüh khyang jücho; ko arüh atümungnü hütsü lanü yongcho.

²⁴ Jisu-nü yocho, “Hiba hi I shüh khüiba adrong nengdang khatohcho, I shüh khüinü Tsingrangba azengtacho shingkehre.

²⁵ Ihnü nührü te yore, Tsingrangba yanglih la cikih asi müyongde Ihnü khodesü hiba cikih thali müyongnung.”

²⁶ Hütsüpü arühnü khi khüdu thsapü Olive zonglang tsicho.

Peter-nü Münyengchonung Jisu-nü Yojungcho

²⁷ Jisu-nü arüh te yocho, “Nührü atümungnü Ih pehjüpü tsikhangnung, tunüo Azengtachonü yore, ‘Tsingrangba-nü san nyahba tsü müpsehnung, ko san apüm tsipitsizanung.’

²⁸ Ta Ih kangli ropü khanglang, Ih nührü müngu Galil lang wünung.”

²⁹ Peter-nü lalingcho, “Aparü atümungnü nüh pehjünye, Ihnülü nüh khodesü müpehjünung!”

³⁰ Jisu-nü Peter te yocho, “Ihnü nüte yore, shomülang hünanü anyüpili mükhongde, nühnü Ih asangpili münyengchonung.”

³¹ Peter-nü khüsha zii yocho, “Ih nüte asünung thsanye, hütsü khodesü Ihnü müyonung!” Ko mono aparü atümungnü hütsü roh-i du yocho.

Jisu-nü Gethsemane la Dangkhidangnangcho

³² Arühnü Gethsemane dsiba müdüm yang rocho, ko Jisu-nü amonoti te yocho, “Ih dangkhidangnangde nührü hila püm.”

³³ Abinü Peter, Jakob ko Johan abi te nücho. Abi chah khütang chongcha ko lümtoh rocho.

³⁴ Ko abinü arüh te yocho, “I lasih la alongri tsü dirachonü Ih asünung roh-i due. Hila Ite lümkang lieng.”

³⁵ Abinü azachah wüpü apu jangjangthsa alih la hapkehcho, ko kohkhang hütsü chongcha bekhyah tsü abi chah mütikehsohnung kihchicho.

³⁶ Abinü yocho, “Uwa, nü nengdanglü apüm akohnung du. Hiba chongcha shing hi I chahnü khyümüing. Ta I lümcho mah, nü lümcho thsaang.”

³⁷ Hütsüpü abi thali rode mono asang tsü yüpseh ngucho. Abinü Peter te yocho, “Simon, nüh yüpseh lirü ang? Nührünü rehtseh khüdu mii lümkang mülichehrü ang?”

³⁸ Ko abinü arüh te yocho, “Nührü athsadsüla mülongnung khengyeng ko dangkhidangnang. Anbülü longphile, ta shutsa la re müzeh.”

³⁹ Abinü anyüpili wünü yu sako tsü yo dangkhidangnangcho.

⁴⁰ Hütsüpü abi mono yanglang thali rocho ko arüh yüpseh ngucho; arühnü arüh nah trah mülichehcho. Ko arühnü abi te tu lalingnungnang mümüdhecho.

⁴¹ Khode abi asangpiu thali rocho, abinü arüh te yocho, “Nührü ade yingcheh kyahshangnü yüpjorü ang? Kükyüko! Bekhyah tsü chipehko: Dhing, Nyitsarü Tsurü münyirü kheh la khakhuchüjünung.

⁴² Shemüsung, Ihsanü wünung. Dhing, Ih kihyochübong tsü hila lile!”

Jisu Rangcho

⁴³ Jisu-nü choyade, Judas mono dhüreanyüh yola khüdu ro chihcho. Bebü ayingti, yuzeng dorüti ko azibarütinü müthehcho mülung amülah khüdu nohsheng ko singdümpi bipü abi yola rocho.

⁴⁴ Ihnü müthsüpba nyitsarü tsü nührünü yangchiba tsüe. “Abi rang ko dhingyeh notsieng.”

⁴⁵ Judas ro chihyeng, abinü Jisu yang wüpü yocho, “Athsingyurü” ko abi be müthsüpcho.

⁴⁶ Hütsüde arühnü Jisu rangcho ko rahcho.

⁴⁷ Ta hütsüla yarü yola nyüh khüdunü anohsheng tohcheh amungthriba bebüba kulirü nangku thsüp-pehjücho.

⁴⁸ Hütsüde Jisu-nü arüh te yocho, “Ih yuzeng thsangnyangrü khüdu kyo Ih rangnung nohsheng ko singdümpi bipü ronungthsa kangcho ang?

⁴⁹ Amübükuh la Ih nührü te nyümong jingnyüh müthe thsingyu licho, ko nührünü Ih mürang. Ta Azengtacho tsü yuje tikehnungbae.”

⁵⁰ Hütsüde monoti atümungnü abi pehjüpü tsipehcho.

⁵¹ Dhrezarü khüdu, shü ajengpa müpipü Jisu khanglang iiwücho. Arühnü abisü rangnung müküpcho,

⁵² ta ashü mii pehjüpü atbhüdeng shangyoh tsicho.

Jisu Ashimükhong Bete

⁵³ Hütsüpü Jisu tsü bebü amungthriba kuh yang, bebü ayingti, yuzeng adorüti ko azibarüti shibülung lichola nowücho.

⁵⁴ Peter-nü bebü amungthriba kuhbe chiinü ahongkoh thü-thü iiwücho, ko hütsüla roshengrü yola mih henü pümcho.

⁵⁵ Bebü ayingti ko ashimükhong apümnü Jisu süsohnung nengdang abi nyüm yuzi khürü yangchicho, ta arühnü tusü müngucho.

⁵⁶ Adrongnü Jisu nyüm arahkheh yuzi jücho, ta arüh yuzi yube mütrümcho.

⁵⁷ Hütsüde khürünü shemüsu Jisu nyümnü yocho:

⁵⁸ “Ihrünü yuchinü abinü yocho, ‘Ihnü nyitsarünü thsacho amübükuh hi lohnyangpü, nyümong asang khanglang nyitsarünü müthsaba khüdu thsanung.’ ”

⁵⁹ Hütsüsü arüh yuzi mümüjangcho.

⁶⁰ Bebü amungthribanü arüh atümung bete shemüsu Jisu te tsingdhingcho, “Arühnü nüh nyüm yuzi jübala tsü nüh alalingba tu mülirü ang?”

⁶¹ Ta Jisu-nü ciisü müthsa ko tu müyocho. Anyüpiusü abi te tsingdhingcho: “Müwajübong Tsingrangba Tsurü Mesia tsü nüh mah-o?”

⁶² Jisu-nü lalingcho, “Ih-e.” “Ko nührü atümungnü Nyitsarü Tsurü akohba tsalang pümpü ninglang nyükhi la rocho ngunung!”

⁶³ Bebü amungthribanü afükhüm rehnah yocho, “Ihsanü yuzi alaa tu müdhsütah!

⁶⁴ Abinü Tsingrangba müthsamünyücho nührünü yuchiko. Nührü alümcho tuo?” Arüh atümungnü, abi thsamehko ko abi sünung alengepü mülangjücho.

⁶⁵ Khürünü Jisu chah müjü müchohkehjümüsucho, ko arühnü anah rümjücho ko abi chah xüpcho. Arühnü yocho, “Nü chah xüpba tsü süo?” Ko anyahrütinü abi nowücho ko tangnahcho.

Peter-nü Jisu Münyengchocho

⁶⁶ Peter ade yingcheh jowünü kekhüm la tsü pümde kulilarü khüdu rocho.

⁶⁷ Peter mih he püm ngu, abi chah dhingkeh yocho, “Nüh mii Nazaret-rü Jisu te lichoe.”

⁶⁸ Ta abinü hütsü münyengchocho, “Ihnü mümüdhe, nüh tu nengdang chorünang Ihnü münyicheh” ko kubelang chüducho. Hütsüde hüna khongcho.

⁶⁹ Kulilatpü tsünü hütsüla abi ngunü müshüm yarüte thali yocho, “Hivi hi arüh yola khüdue!”

⁷⁰ Ta anyüpiusü Peter-nü münyengchocho. Azachah lipü, shündhün yarütinü thali Peter mülangjünü yocho, “Nühsü arüh yola khüdu mah pü nühnü mürichehnung, tunüo nühsü Galil lanüe.”

⁷¹ Hütsütade Peter-nü yocho, “Ihnü yuje yuchüm yore! Ihnü arahkheh chokhang Tsingrangba-nü Ih chokehcholang! Nührünü yoba nyitsarü nengdang tsü Ihnü mümüdhe!”

⁷² Hütsüde hüna anyüpiu khongcho, ko Peter-nü Jisu-nü abi te khüta yocho hütsü lümchehcho, “Hünanü anyüpi mükhongde nühnü Ih mümüdhepü asangpili yonung.” Ko alasih thsangnyangnü tracho.