MARK 13 - AMÜSA BAIBEL (BSI)

Amübükuh Thsangnyangnung Nengdang Chocho

¹ Jisu amübükuh pehjüpü tsiyade, amono yola khüdunü yocho, “Dhing, athsingyurü! Lung ko kuh khüta anyemüyangnung!”

² Jisu-nü lalingcho, “Nührünü kuh amülülah hiri ngu mado ang? Hila lung khüdu mii ajojila müjonung; arüh apüm trümnahpehnung.”

Chongcha ko Dhsümthsedhsümloh

³ Jisu Olive zong la amübükuh dükeh pümde, Peter, Jakob, Johan ko Andria abi yanglang rangnü rocho.

⁴ Arühnü abi te tsingdhingcho, “Hi khode tikehnung ko hiri apüm tikehnung becho chii rode amüdhethsa tu linung ihrü te young.”

⁵ Jisu-nü arüh te yocho, “Müzahng ko sü khyangsü nührü tükiyohchüsoh.

⁶ Adrongnü ‘Ih abie’ ko I nengla cho ronung ko adrong kihyochünung.

⁷ Khode amünyeh ko ashula khata yusi yuchinang, müci türohcho. Hiri tikehriri, ta hütsü achangka mah.

⁸ Limih e limihrü khatanung, yanglih khüdunü khüdu mahnung. Apümlang alihyo zingnung, ko yangkongthsükong linung. Hiri tsü akhunga surode akhu mikhungcho kyo linung.

⁹ “Nührübürü jangjang kukeng. Nührü rangnung ko yukhajilang nowünung. Sinagog la nührü chah xüpnung; I nengdang arüh te yusi atsa yonung nengdangnü yangthsarü ko yukharü bete nührü yanung.

¹⁰ Ta achangka nyümong müroede, nyitsarüti atümung te yuse atsa tsü thsingyunungbae.

¹¹ Ko khode nührü rangpü yukhajilang nowünang, nührünü tu chonung mah-enü tu lüm tütpahnah; bekhyah achila nührü khyang tuturü jünang, nührünü hütsü choung. Tunüo nühnü choba yu tsü nü yu müthsanung; ta Anbü Amüsa chahnü ronung.

¹² Jünirünü jünirü ko aunü atsurü süsohnung nengdang khakhuchüjünung. Tsuzarünü tpurü nyüm shemüsunung ko arüh süsohnung.

¹³ I thsacholanü atümungnü nührü thrünyinung, ta sünü achangchi rangchonang abi khümchonung.

Athrünyinung Adrünung

¹⁴ “Nührünü ‘Athrünyinung Adrünung’ abi mülinung müdümla ya ngunung.” (Hi tunang akhirütinü nyichehng) Hütsütade sürü Judea la liro arüh azonglang tsieng.

¹⁵ Sü kumungchah liro abinü tu khyünungsü tüjowü.

¹⁶ Sü luh la liro abinü ashü khyünung kulang tüthali.

¹⁷ Hütsüri nyümongla khingkurü sürü fü müdengro ko akhunga liba atpati nengdang khüta adrünung thsanung!

¹⁸ Hiri thsahsüm la mütikehsohnung Tsingrangba te dangkhidangnang!

¹⁹ Hütsüri nyümongla achongcha tsü adikehti Tsingrangba-nü limih thripü chünye yingcheh müdhecho tenü amütsau thsanung. Mahkhang khodesü hütsü roh-i mütikehnung.

²⁰ Ta Abüdongba-nü hütsüri nyümong kyüpehjüko; hütsüta müthsarelang, süsü mükhümchobae. Athrochehrü khyanglangnü, abinü hütsüri nyümong kyüpehjücho.

²¹ “Hütsütade, khürünü nüte, ‘Dhing, Khrista hila lile, mahkhang, Dhing, abi hütsüla lilepü yokhang, hütsü tüyudsi!’

²² Tunüo arahkheh Khristanti ko arahkheh azikehrüti chüronung. Kohkhang, arühnü athrochehcho nyitsarüti miinü kihyochünung nengdang thsayahiya ko anyemüyangnung nguchinung.

²³ Nührü kukeng! Ihnü nührü te lüpcho tsehleh yoko.”

Nyitsarü Tsurü Roba

²⁴ “Hütsü achongcha nyümongti khupü nyü tsü müpehnung ko chonunü müvipehnung,

²⁵ ning chahnü chenghiti trümchonung, ko ningwümla liba taseti arüh lang lanü shehmüinung.

²⁶ Hütsütade Nyitsarü Tsurü nyükhi la tase amülah ko ahechi la ro ngunung.

²⁷ Hütsüde, abinü ninglang riwürüti limih jongnah müyülang Tsingrangba-nü throchehrüti alih changka khüulangnü khüulang chii nübülungnung müthehchünung.”

Ngurüsing khu Anyichoba

²⁸ “Ngurüsing chahnü nührü khyang anyichoba khüdu yonung. Khode ajengzati müyah kangnü anu chüro ava thümlangnang nührünü müyü amünyethsa lilepü müdhere.

²⁹ Hütsü kyo, khode nührünü hiri tikehcho ngunang, bekhyah tsü amünyethsa rolepü müdheing.

³⁰ Yutsatsa Ihnü nührü te yore, hiri atümung mütikehdelü hiba shang mükhutsinung.

³¹ Ning ko alih khutsinung, ta I yu mükhutsinung.”

Nyümong Mahkhang Bekhyah tsü Sünüsü Mümüdhe

³² “Ta hütsüba nyümong mahkhang bekhyah tsü khode ronungnang sünüsü mümüdhe. Au chah khu Ninglang riwürü nüsü mahkhang Atsurü nüsü mümüdhe.

³³ Khengyeng, kukeng, tunüo bekhyah tsü khode ronungnang nührünü mümüdhe.

³⁴ Hiba hi nyüh khüdunü kulirüti khyang tase jüpü, ko arüh palu palu nguchi changnah jüpü trahtri nyahba te nyahyanung yopü shitseh wücho kyonung.

³⁵ Hütsüeko, khengyeng, tunüo kuh abüdongba tsü khode ronungnang mümüdhe. Hütsü anyüzehlang mahkhang yürüpla mahkhang hünakhongla mahkhang anyangnyü thsanung kohle.

³⁶ Abi dhrongyengnü rokhang, abinü nührü yüpseh li müngusohnungbae.

³⁷ Ihnü nührü te tu yoro, hütsü nührü atümung te yore: Xengxeng lieng!”