MARK 12 - AMÜSA BAIBEL (BSI)

Shükusih Luthsarünü Yukitacho

¹ Achotsü Jisu-nü arüh te yukitabanü chotacho: “Shikhe khüdu nyüh khüdunü shükusiluh thsacho, ko tbünü tbütipü anyehnung shukuh jucho, ko roshengvi khüdu thsacho. Hütsüpü anguchirü khyang luh tsü yuthsahsohnung jüpü shitsehnung tsicho.

² Khode shükusih khyübülungnung akyang chihcho, abinü maxacho lanü nohlüm khyünung kulirü khüdu luthsarü yang müthehcho.

³ Luthsarüti tsünü kulirü tsü rangcho, ko lahpü thali tbhüdeng tsisohcho.

⁴ Hütsüpü abüdongba tsünü kulirü apa khüdu müthehcho; anguchirü tsünü athah la lerohpehjücho ko ashah khyo bichicho.

⁵ Abüdongba tsünü apa kulirü khüdu müthehcho, ko arühnü abi müpsehcho; ko arühnü aparü adrong te hütsü roh-i bichinü lahcho ko khürü müpsehcho.

⁶ Adelü müthehnung tsü nyüh khüdu du nying licho, hütsü apu amüiba tsurü licho. Hütsüde achangkathsa anguchirü yang atsudhre tsü müthehcho. ‘Ihnü lümre arühnü abi khyanglü jengreng jünung.’

⁷ Ta luthsarü tsünü arühbürü chotacho, ‘Hiba hi atsudhre e. Rung, Ihsanü abi müpsehnung, ko abi kuthsi tsü Ihsa yo kangnung!’

⁸ Ko arühnü atsudhre tsü rangcho ko müpsehpü afü tsü shükusiluh khu hiwü pehcho.

⁹ “Hütsüde, shükusih abüdongba-nü tu nguchinung?” Abi ronung ko luthsarüti tsü müpsehnung ko shükusiluh tsü aparü luthsarü khyang jünung.

¹⁰ Nührünü Azengtacho hi mükhidhingcho ang: “‘Kuthsarütinü müdhsütahba lung tsü, apüm tenü ayingba kangcho.

¹¹ Hiba hi Abüdongba-nü nguchicho; Hi Ihsa nahte khütoh-i anyemüyangnungo!’”

¹² Jihudarü langnürünü Jisu rangnung müküpcho, tunüo abinü yukitaba tsü arüh nyümnü chochoepü arühnü nyichehcho. Tanye arühnü amülung drücho, hütsünü arühnü abi pehjüpü tsicho.

Alihmüthsü Jünung Atsingdhingba

¹³ Farisirü khürü ko Herod mülung lanü khürü yu tsingdhingnü abi xohsohnung müthehcho.

¹⁴ Arühnü abi yanglang ro tsingdhingcho, “Athsingyurü, bürünü tutu lümnye nühnü mülümxüpü yuje chorepü ihrünü müdhele. Nühnü nyitsarü jingkih tu müdhingre ta Tsingrangba lümcho thsingyure. Kaisar khyang alihmüthsü jünung tsü Ihsa yuzeng nyümrü mah-o? Ihrü te young. Ihrünü hütsü jünung athsalang a mah-o?”

¹⁵ Ta Jisu-nü arüh rah müdhenü arüh te lalingcho, “Tuepü nührünü Ih xohsohnung müküpro? I yanglang thsi khüdu hirung, ko Ih dhingsohng.”

¹⁶ Arühnü abi yang thsi khüdu hirojücho, ko abinü tsingdhingcho, “Hi sü tsah ko sü neng kehro?” Arühnü lalingcho, “Kaisar tsah ko neng.”

¹⁷ Achotsü Jisu-nü yocho, “Hütsükhang, tu Kaisar yo, hütsü Kaisar khyang jüng, ko tu Tsingrangba yo hütsü Tsingrangba khyang jüng.” Ko arühnü Jisu ngu nyemüyangcho.

Kangchehli Roba Nengdang Tsingdhingcho

¹⁸ Hütsüde asü lanü kangchehli müronungepü yoba Sadukirü khürü Jisu yanglang ronü yocho,

¹⁹ “Athsingyurü, hiba yuzeng hi Mosa-nü ihrü nengdang thrahcho: ‘Nyüh khüdu atsurü mülipü anitpü pehjü sopehkhang, hütsüvi ani tsünü chomitpü tsü khyünung ko azarü nümüsuba tsü amung asu tsurü roh-i khichinung.’

²⁰ Shikhe khüdu arüh jünirü dhünyeh licho; aziba tsü kukangcho ko azarü mülipü sopehcho.

²¹ Hütsüpü anyüuba tsünü khingkutpü tsü khyücho ko abisü azarü mülipü sopehcho. Hütsüroh-i tsü asanguba chahsü tikehcho,

²² hütsüta achangchi tikehcho: arüh jünirü dhünyehdingnü khingkutpü tsü khyücho ko azarü mülipü sopehcho. Achangkala khingkutpü tsüsü sopehcho.

²³ Ade, kangli roba nyümong khode asürü atümung kangli ronang, abükyü tsü sü nitpü thsanung? Tunüo abükyü tsü arüh dhünyehdingnü khyüko.”

²⁴ Jisu-nü arüh te lalingcho, “Nührü khütoh-i thsamehro? Ko khütachonünang mümüdheo? Hi nührünü Azengtacho ko Tsingrangba zii mümüdhechonüe.

²⁵ Tunüo khode asürü kangchehli ronang, arüh ninglang riwürüti kyo linung ko kuh mükangnung.

²⁶ Ade, asürüti kangchehli rode: nührünü Mosa Vakha la singtrung tahba nengdangsü mükhidhingcho do? Hütsüla hita thrah lile; Tsingrangba-nü Mosa te yocho, ‘Ih Abraham Tsingrang, Isak Tsingrang ko Jakob Tsingrang.’

²⁷ Abi asürü Tsingrang mah, ta akang lirü Tsingrang lile. Nührü dee thsamehre.”

Yuzeng Adiuba

²⁸ Yuzeng adorü khüdu hütsüla licho, sünü yurehtaba tsü yuchicho. Jisu-nü Saduki-rüte tsü dee tsa lalingkopü müdhe abi yanglang ro tsingdhingcho: “Atümung tenü khüiba yuzeng ayingbao?”

²⁹ Jisu-nü lalingcho, “Ayingba tsü hi, ‘Nyieng Israelrü! Abüdongba Ihsa Tsingrang du tsü Abüdongrü khung lile.

³⁰ Nü lasih apümnü, nü nbü apümnü, nü lümlong apümnü ko nü tase apümnü Abüdongba nü Tsingrang müing.’

³¹ Anyüuba yuzeng ayingba tsü hi: ‘Nü kurümrü abürü roh-i müing.’ Hinyi tenü ayingba yuzeng apa mühle.”

³² Yuzeng adoba tsünü Jisu te yocho, “Tsale, athsingyurü! Nühnü yoba tsü yuje e, Abüdongba du tsü Tsingrangba ko abi chah khu apa Tsingrang mühle.

³³ Ko nyitsarünü abi lasih apümnü, abi lümlong apümnü ko tase apümnü Tsingrangba müibae, ko akurümrü abürü roh-i müibae. Ko kanglungrü ko apa mübünü Tsingrangba mübünung tenülü yuzeng anyüh hi nyinung alaa ayingba.”

³⁴ Abinü dee thsehdhsa lalingcho ngu Jisu-nü abi te yocho, “Nüh Tsingrangba Yanglih tenü ashu mah.” Hütsükotinü Jisu te atsingdhingba tsingdhingnung sünüsü müci mümülahcho.

Mesia Nengdang Tsingdhingcho

³⁵ Jisu-nü amübükuh la thsingyude, abinü tsingdhingcho, “Mesia tsü David hung lanü thsanungepü yuzeng adorünü khüta yochehro?

³⁶ Anbü Amüsanü jeng David-nü yocho: “Abüdongba-nü I Büdongba te yocho: Ihnü nü rorüh nü jing pohki müyohpüde I tsalangthring hila püm.”

³⁷ David apunüsü abi te Abüdongba pü dsicho; hütsükhang Mesia tsü khütapü David chahnü thsanung? Mülung amülah khüdu Jisu te künyang nyi licho.

Yuzeng Adorüti Nyüm Müzahsohcho

³⁸ Abinü arüh te thsingyude, abinü yocho, “Yuzeng adorüti sürü arüh jengki asheng khyüpü yanglongla rachinyüro ko salüm khyünyüro,

³⁹ sürünü Jihudarü amübükuh la ko thsütila pümji atsauba mükuro arüh nengdang müzahmükieng.

⁴⁰ Arühnü chomilarü nyüpmüseh arüh kuh zühjüre, ko atangnung anyahli dangkhidangnangre. Arüh amütsauba khingchinung!”

Chomitpü Amübü

⁴¹ Jisu-nü amübü thsi zahkehsing amünyeh pümpü nyitsarüti arüh thsi yohcho dhingcho. Alirü adrongnü thsi khütango yohcho;

⁴² hütsüde ailümrü chomilarü khüdunü paisa anyüh yohcho.

⁴³ Abinü amonoti müjang abi yang dsibülung arüh te yocho, “Ihnü nührü te yore, amübü thsi zahkehsingla tsü aparü atümung tenü chomitpü tsünü alaa yohko.

⁴⁴ Tunüo aparü tsü arüh lipü nyingcho lanü, ta hitpi, iilümseh, alicho apüm yohjüko, abükyü akang linung alicho apüm yohjüko.”