MARK 11 - AMÜSA BAIBEL (BSI)

Jerusalem Lang Akoh Ngu Züducho

¹ Arühnü Jerusalem chii rode, Betfage ko Bethany yangdi amünyeh, Olive Zong lang rocho. Jisu-nü amonoti nyüh anyüh yu pisa yopü tsehleh müthehcho.

² “Nührü belang liba yang la tsü züdung. Nührünü hütsü chihyeng nyitsarünü khodesü müpümdhingcho gadu khüdu xohchingpo ngunung. Hütsü lehcheh hila norung.

³ Ko khürünü tuepü hütsü roh-i nguchiropü tsingdhingkhang, Abüdongba-nü hi dhsütahre, ko zah thali müthehnungepü young.”

⁴ Achotsü arühnü wücho ko trahtri khüdu chah yanglongla gadu khüdu xohchingpo ngucho. Arühnü hütsü lehchehchi yade,

⁵ shündhün yarü khürünü tsingdhingcho, “Nührü gadu hütsü lehchehba tsü tu nguchiro?”

⁶ Arühnü Jisu-nü yocho roh-i du lalingcho ko nyitsarütinü arüh tsisohcho.

⁷ Arühnü gadu tsü Jisu yanglang norocho, ko gadu chah tsü arüh shü phakehjüpü Jisu küdu pümsohcho.

⁸ Nyitsarü adrongnü langla arüh shü khyangjücho, ko khürünü rangmü lanü rangva khungsahnü langla khyangjücho.

⁹ Ko abelang ko akhanglang iirorütinü züdenü yocho. “Hosana! Abüdongba nengla sü roro abi müwajüng!

¹⁰ Tsingrangba-nü ihrü au David yanglih ronung liba tsü müwajüng! Tsingrangba seing!”

¹¹ Jerusalem chihpü abinü amübükuh lang wücho, ko apüm dhingmükangcho. Ta münupehcho tsü, abinü mono dhüreanyüh yola Bethany lang wücho.

Ngurüsing Chokehcholacho

¹² Nyümong khüu, arüh Bethany langnü thali rode, Jisu yangcho.

¹³ Abinü ashulanü ngurüsing khüdu ava dhülüm kehkonü ngucho, achotsü abinü asih keh a mahnangpü dhingnung wücho. Ta khode chii rocho, abinü ava du ngucho, tunüo hütsü akyang müthsacho.

¹⁴ Jisu-nü ngurüsing te tsü yocho, “Hikonülü sünüsü nü chahnü asih khodesü mütsunung!” Ko amonotinü hütsü yuchicho.

Jisu-nü Amübükuh Lang Wücho

¹⁵ Khode arühnü Jerusalem chihcho, Jisu-nü amübükuh lang wücho ko airü ko alihrü atümung iipehnung dikehcho. Thsi mülihrü tsingthsang ko mümüdhrü irü pümji mükhapehjücho,

¹⁶ ko abinü sü khyangsü amübü kekhüm khu tusü mühitsisohcho.

¹⁷ Hütsüpü abinü nyitsarüti te thsingyucho: “Hi Azengtacho la thrah lile, ‘I amübükuh tsü nyitsarü yucho atümung nengdang dangkhidangnang kuh pü dsinung.’ Ta hütsü nührünü aführü kumünyiji kangsohre!”

¹⁸ Bebü ayingti ko yuzeng adorütinü hi yuchicho ko Jisu süsohnung lang khürü yangchinung dikehcho. Arühnü abi drücho, tunüo amülung apümnü abinü thsingyuchola nyemüyangcho.

¹⁹ Khode nyüzeh rocho, Jisu ko amonotinü yangdi tsü pehjücho.

Ngurüsing Chahnü Anyichonung

²⁰ Nyangnyü khüu mütoh, arüh langla wüchi yade, arühnü ngurüsing tsü ayingshünü mülohpü ngucho.

²¹ Peter-nü tu tikehcho hütsü lümcheh Jisu te yocho, “Dhing, athsingyurü, Nühnü chokehcholaba ngurüsidongsü süko!”

²² Jisu-nü arüh te lalingcho, “Tsingrangba chah yudsing.”

²³ Ihnü ajüje nührü te yore, “Sürünü hiba zong te, nüh dhimüsung ko kihdi la longyohng pü yonang ko alasih la tu alümxü mülipü abinü tu yoro, hütsü tikehnungepü yudsinang, hütsü abi te nguchinung.

²⁴ Hichahnü Ihnü nührü te yore: khode nühnü lango tsingdhing dangkhidangnangnang, hütsü nühnü ngukopü yudsing, ko nühnü tu nengdang tsingdhingcho hütsü nü khyang jünung.

²⁵ Ko khode nühnü yamüsupü dangkhidangnangnang, khürü nyüm lango likhang mülang pehjüng, hütsüpü du ninglang liba nüu nüsü nü thsamehcho mülangpehjünung.”

²⁶ Nühnü bürü mülang müpehjükhang, ninglang liba nüu nüsü nü thsamehcho mülang müpehjünung.

Jisu Tase Nengdang Atsingdhingba

²⁷ Arühnü anyüpiu Jerusalem lang rocho. Ko Jisu amübükuh la rachi yade, bebü ayingti, yuzeng adorüti ko azibarüti abi yanglang ro

²⁸ abi te tsingdhingcho, “Hiri nguchinung nüh tu tase liro? Sünü nü khyang hiba tase jücho?”

²⁹ Jisu-nü arüh te lalingcho, “Ihnü atsingdhingba khüdu nührü te tsingnung, ko nührünü alalingba khüdu jüchehkhang, hiri nguchichehnungthsa Ih tu tase liro hütsü nührü te yonung.

³⁰ Johan-nü baptijüba tase tsü khüdenü rocho: Tsingrangba chahnü a nyitsarü chahnüo, Ite young?”

³¹ Arühbürü yola rehtamüsucho: “Ihsanü tu yonung? Ihsanü, ‘Tsingrangba chahnüepü yokhang, abinü yonung, Khang tuepü nührünü Johan chah müyudsicho?

³² Ta Ihsanü nyitsarü chahnüe khang’ (arühnü nyitsarü drücho, tunüo atümungnü Johan tsü azikehrüepü müdhecho.)

³³ Hütsüpü Jisu te arüh alalingba tsü, “Ihrünü mümüdhe.” Jisu-nü arüh te yocho, “Khang, Ihnüsü tu tasenü hiri nguchiro hütsü nührü te müyonung.”