MARK 1 - AMÜSA BAIBEL (BSI)

Baptijüba Johan-nü Thsingyucho

¹ Hiba Yuse atsa hi Tsingrangba Tsurü Jisu Khrista nengdang lile.

² Hi azikehrü Isaya-nü thrahcho kyo tikehcho: “Tsingrangba-nü yocho, ‘Ihnü I yusi hirü nü müngu nü lang rungnümnung müthehnung.’

³ Lipilih la nyüh khüdunü züdecho yuva, ‘Abüdongba nengdang lang tsü rungnüm; abi lang müchongkhüti külüpm.’ ”

⁴ Johan-nü lipilih la thsingyu ko baptijo rocho. “Nührü münyi lanü lasih thsamülang ko bapting” ko Tsingrangba-nü nührü münyi pehjünung.

⁵ Ko nyitsarü adrong Judea ko Jerusalem yangdi lanü Johan te nyinung wücho. Arühnü arüh münyi nyengchocho ko abinü Jordan yongkhi la arüh baptijücho.

⁶ Johan-nü ut nbüh khümcho, ko shuküpnü akih rümcho ko abi tsuyongnung tsü khengqu ko thsakukih thsacho.

⁷ Abinü yocho, “Nyüh khüdu sü I khanglang ronung liro abi I tenü dee adiuba lile. Ihnü mükhukeh abi jingkhüm yo lehchehnung mii müdekheng.

⁸ Ihnü nührü kih la baptijüre, ta abinü nührü Anbü Amüsa la baptijünung.”

Jisu Bapticho ko Thsadsücho

⁹ Tunyah mülipü Jisu Galil la liba Nazaret lanü rocho, ko Jordan la Johan-nü baptijücho.

¹⁰ Abi kih lanü chüroyeng, abinü ning khangthru ngucho ko Anbü mümüdhrü roh-i abi chah jürocho.

¹¹ Ko ninglangnü yuva khüdu rocho, “Nüh Ihnü müiba tsurü, nü chah I long kyangre.”

¹² Hütsüde tsünü Anbünü abi lipilih lang tsisohcho;

¹³ khüde nyümong yüre satan-nü thsadsü licho. Hütsüla rangmü kanglungrüsü licho, ta ninglang riwürünü ro abi trocho.

Jisu-nü Ngu Rangrü Nyüh Müyü Dsicho

¹⁴ Johan jingkhehka la rangyohpü, Jisu-nü Galil lanü wü Tsingrangba chahnü Yuse atsa thsingyucho.

¹⁵ Abinü yocho, “Becho chihko ko Tsingrangba Yanglih amünyeh lile; lasih thsamüla Yuse atsa chah yudsing!”

¹⁶ Jisu Galil kihdi khu tside, abinü ngurangrü nyüh anyüh, Simon ko ani Andria nyüh yojehnü ngu rang ngucho.

¹⁷ Jisu-nü arüh te yocho, “Ih iirung, ko Ihnü nührü nyitsarü rangrü kangsohnung.”

¹⁸ Ko hütsüde tsünü arüh yojeh pehjüpü abi iiwücho.

¹⁹ Ko azachah wüpü abinü aparü jüninyü, Zebede tsurü Jakob ko Johan kihtang la yojeh müthsüchi ngucho.

²⁰ Jisu-nü arüh ngudunü, abinü arüh dsicho, ko arühnü arüh au Zebede shehsherü te kihtang la pehjüpü Jisu iiwücho.

Amünyi nbünü rangcho nyüh khüdu

²¹ Jisu ko amonoti Kapernaum yangdi lang rocho, ko Sabath nyümong abinü Sinagog la docho.

²² Ko abinü thsingyuchobala arühnü nyemüyangcho, tunüo yuzeng adorü roh-isü mahpü abinü tase keh docho.

²³ Hütsüde tsü amünyi nbünü rangchoba nyüh khüdu Sinagog la tsü ro khongcho.

²⁴ “Ihrü te nüh tu nguchinyüro, Nazaret-rü Jisu? Nüh ihrü changsohnung hila rocho mah-o? Nüh sünang Ihnü müdhele. Nüh Tsingrangba Amüsa yusi hirü lile.”

²⁵ Jisu-nü anbü khyang yuzengjo yocho, “Tümümüp ko nyitsarü chah tsünü chürung!”

²⁶ Ko amünyi nbü tsünü dhi müpchi, khong abi chahnü chürocho.

²⁷ Ko nyitsarü atümung dee nyemüyang khüdunü khüdu te yocho, “Hi tuo? Adoba asi; Hiba nyitsarünü amünyi nbü khyangsü yuzeng jünung tase kehle; ko arühnü abi yu nyire!”

²⁸ Hütsüta Jisu nengdang yusi tsü Galil apümlang zahnü jengcho.

Jisu-nü Nyitsarü Adrong kyangjücho

²⁹ Jisu ko abi monoti, Jakob ko Johan nyüsü zeh, Sinagog pehjüpü Simon e Andria-rü kulang wücho.

³⁰ Ko Simon nitpü atpa rihminü füdhsa yüpjocho, ko Jisu ro chihyeng abi te abükyü nengdang yocho.

³¹ Abinü abükyü yang wü akhehnü marehpü tphahmüsucho ko rihminü abi pehjücho, ko abükyünü arüh dikehcho.

³² Anyüzehlang, Jisu yang arühnü füdhsarü ko amünyinü rangrü atümung norocho.

³³ Yangdi la lirü atümung kuh bete shibülungcho.

³⁴ Jisu-nü dhsara papanü dhsarü adrong kyangjücho ko amünyi nbü adrong iipehjücho. Abinü amünyi nbü khyang tusü müchosohcho, tunüo arühnü abi tsü sünang müdhecho.

Jisu-nü Galil la Thsingyucho

³⁵ Nyangnyü khüu mütoh, Jisu-nü suropü kuh tsü pehjücho. Abinü yangdila tsünü shehmüi anaying müdüm khüdula wü dangkhidangnangcho.

³⁶ Ta Simon ko abi shangrütinü abi yangchi wücho,

³⁷ ko arühnü abi ngude, arühnü yocho, “Atümungnü nüh yangchile.”

³⁸ Ta Jisu-nü lalingcho, “Ihsanü hi mükang yangdongti lasü wübae. Ihnü hütsüri lasü thsingyubae, tunüo hütsü nengdang Ih rocho.”

³⁹ Achotsü Galil apümlang Sinagog la thsingyunü amünyi nbü iipehjo rachicho.

Jisu-nü Nyitsarü Khüdu Kyangjücho

⁴⁰ Mübhira kehrü nyüh khüdu Jisu yang ro mükhukeh kihchicho, “Nühnü lümkhang, Ih müsachehjünung kohle.”

⁴¹ Jisu-nü müi lümnü, akheh müyungchü abi chah thahpo yocho, “Ihnü lümre, nüh müsachehng”

⁴² Hütsüde tsünü mübhira tsünü abi pehjücho, ko abi müsachehcho.

⁴³ Ko Jisu-nü abi te khahkhah yopü müthehcho.

⁴⁴ “Nyieng, sütesü hi nengdang tüyo. Ta bebüba yang wüng ko abi khyang dhingsohng; ko atümung bete nüh kyangko pü yuzithsanung nengdang, Mosa-nü mülacho amübü mübüng.”

⁴⁵ Ta nyitsarüba tsünü wünü apümlang hiba yusi tsü sobhocho. Hütsünü Jisu-nü yangdi lang tsü mishanü müzüduchehcho, tanye shecheh anaying chah licho, ko apümlangnü nyitsarü abi yang rocho.