MALAKI 3 - AMÜSA BAIBEL (BSI)

¹ Akohba Abüdongba-nü lalingre, “I lang rungnümnung Ihnü I yusi hirü müthehnung. Hütsüde nührünü yingba Abüdongba dhrongyengnü Abi amübükuh la ronung. Nührünü nahmürahba yusi hirü ronung ko I azengtacho sobhonung.”

² Ta Abi roba nyümong sünü rangchonung? Abi rode sünü yachehnung? Abi idhse tahchehba michang kyo apho atsa kyo linung.

³ Abi taripi mülurü ko müdhsengchehrü kyo yukhanung ronung. Idhse nguchirünü taripi ko hon müdhsengchehcho kyo, Abüdongba yusi hirünü bebürüti müsachehjünung, ko arühnü Abüdongba khyang athsalang amübü jünung.

⁴ Hütsüde Judarü ko Jerusalemrünü papade hiroba roh-i amübü tsü Abüdongba-nü khyüchochehba thsanung.

⁵ Akohbong Abüdongba-nü yore, “Nührü yukhanung Ih ronung, ko Ihnü amongrü, nahtranahxengrü, arahkheh yuzi jürü, shehsherü amii kihyochürü, chomilarü, mürürü ko shuparü nyüpmüsehrü, ko I jengreng müdrürü atümung nyüm Ihnü mülangjünung.

Dhüre Nohlüm Jüba

⁶ “Ih Abüdongba, ko Ih mümülichire. Hütsüeko, nührü Jakob trah sehseh lü müchang.

⁷ Nührü jümürü kyo, nührü I yuzeng lanü ximüla tsiko ko mübichi. Ih yang thali rung, ko Ih nührü yang thalinung. Ta nührünü tsingdhingre, ‘Nü yanglang thali ronung ihrünü tu nguchinung?’

⁸ Ihnü nührü te tsingdhingre, Nyüh khüdunü Tsingrangba chahnü kengchonung athsalang do? Mah, ta nührünü I chahnü kengchore, ‘Khütapü?’ Ko nührünü yore. Dhüre nohlüm ko amübüla.

⁹ Nührü atümung chokehcholako, tunüo yucho apümnü I chahnü kengchoko.

¹⁰ Amübükuh la tsuyongnung kükyo linungthsa, nührü dhüre nohlüm ajeng hirung. Akohbong Abüdongba-nü yore, Ih thsadsüdhing, Ihnü ninglang kukhang khangthrupü amüwa thangchi jo a müjünang.

¹¹ Ihnü nührü tsahma kangzahnü müthsangnyangsohnung ko shükusishü mütsenglüp sihsohnung.

¹² Hütsüde lihküprünü nührü te akünyang pü dsinung, tunüo nührü lih tsü alinung atsa thsanung.

Tsingrangba-nü Yanglilümnung Nyengchocho

¹³ “Abüdongba-nü yore, “Nührünü Ih nyümra choko. Ta nührünü tsingdhingrü, ‘Ihrünü nüh nyüm tu chocho?’

¹⁴ Nührünü yocho, ‘Ih Tsingrangba dikehnung müdhsütah. Abinü yocho nguchinung mahkhang ihrü thsamehcho nengdang mülang pehjüng pü ngusohnung tu dhsütahro?

¹⁵ Ihsanü ngucho roh-i amüthseh nyitsarü künyang lire. Amütsarü tsü amüwa ngurü du mah, ta arüh nguchi amütsanü Tsingrangba thsadsüre, ta tu müthsare.’”

¹⁶ Hütsüde Abüdongba drürünü arüh-e arührü chotare, ko arüh chotacho Tsingrangba-nü nyire ko yuchire. Abi bete Abüdongba drürü ko jengreng jürü lümkehba vakha khüdula arüh neng thrahyohcho.

¹⁷ Abüdongba-nü yore “Arüh I nyitsarü thsanung.” “Ihnü nguchi nyümong arüh Ipu yo thsanung. Aunü abi dikehba atsudhre müicho roh-i Ihnü arüh müinung.

¹⁸ Hütsüde anyüpili, amüsarü ko amünyirü kahla, I dikehrü ko Ih müdikehrü kahla tu tikehnang I nyitsarütinü ngunung.”