MALAKI 2 - AMÜSA BAIBEL (BSI)

¹ Akohbong Abüdongba-nü bebürüti te yore, “Yuzeng hi nührü nengdang:

² Nührü nguchinü Ih dhiching. Ihnü yocho mühnyikhang, nü chah chokehcholanung. Nührü akang linung khyübülungcho chah Ihnü chokehcholanung. Nührünü yuzeng khükhah mübichichonü nührü chokehcholapehko.

³ Ihnü nührü tsurü khingchinung ko nührünü kangmübü jücho kanglungrü chühnü nührü romih la münohjünung, ko nührü I tenü khyümüinung.

⁴ Hütsüde yuzeng hi Ihnü nührü khyang jüchoepü müdhenung, hütsü khu Levi trah bebürüti te azengtacho müthsangnyangnung.

⁵ “I azengchotachola akang ko tsayeng linung Ihnü nyengchocho, ko arühnü I jengreng drünung nengdang Ihnü hi arüh khyang jücho. Amüdilü arühnü I jengreng drücho.

⁶ Arahkheh mah, arühnü tu yuje hütsü docho. Arüh Ite kehta licho; arühnü athsalang du tsü nguchicho mah, ta aparüsü amünyi nguchinung lanü yaticho.

⁷ Tsingrangba yuje lümlong donung tsü bebürü nguchi. I lümcho nyichonung nyitsarünü arüh yang wüng, tunüo arüh Akohbong Abüdongba yusi hirü.

⁸ “Ta ade nührü bebürütinü yujeba lang lanü za tsiko. Nührü adobanü azengtacho thsangnyangko.

⁹ Hütsünü Ihnü nührü Israelrü khyang münyüjüsohnung, tunüo nührünü I lümcho mükhyü ko nührünü I müyurü te dode, nührünü phülari mübichi.”

Nyitsarünü Yuje Müchocho

¹⁰ Ihsa apüm au khüdu mahrü do? Tsingrang khüdunü Ihsa mükülüpcho do? Khang tuepü Ihsa kahla azengtacho müyohpüro, ko Ihsa jümürü te Tsingrangba-nü azengtacho mükhimünguro?

¹¹ Judarünü azengtacho thsangnyangpü Jerusalem ko yucho apüm la adrünung nguchi nguchiko. Abüdongba-nü müiba amübükuh arühnü münyijüko. Adhrerünü yangpirü tsingrang mübürü khingkurü khyüko.

¹² Hiri nguchirüti Israel hung lanü Abüdongba-nü pehnung, ko khodesü ihrü yuchonü Abüdongba khyang mübübala müzehsohnung.

¹³ Adesü nührünü hi nguchire. Nührü nahshükih, tracho ko metrachonü Abüdongba bholu tingtisohre, tunüo nührü amübü abinü adelü mükhyüchore.

¹⁴ Tuepü abinü adelü nührü mükhyüchorünang tsingdhing. Tunüo nüh dhrezade khyüba nitpü te anyengchocho nühnü thsangnyangcho abinü müdhele. Abükyü tsü nü dhrelarü ko nühnü abükyü te yuje cho linung Tsingrangba jingte nühnü nyengchonye, nühnü nyengchocho thsangnyangko.

¹⁵ Tsingrangba-nü nüh abükyü te afü ko anbü khüdu mükangsohcho do? Hila abi lümcho tuo? Hütsü Tsingrangba tsurükhung sihchosohnung nengdang. Hütsüeko nührü sünüsü nitpürü te nyengchocho tüthsangnyang.

¹⁶ Israel Tsingrang Abüdongba-nü yore, “Ihnü kukhi zacho thrünyire.” “Nührü nitpürü te hiroh-i mütsa nguchicho Ihnü thrünyire. Nührü nitpürü te yuje chonung nyengchocho tüthsangnyang.”

Yukhaba Nyümong Amünyeh

¹⁷ Nührü yunü Abüdongba müthohsohko. Ta nührünü yore, “Ihrünü khüta müthohsohcho?” “Abüdongbanü amütsarü atümung atsaepü lümrepü yochonü; Yuje abinü arüh khyünyüre.” Mahkhang “Yuje choba Tsingrangba tsü khülo, pü tsingdhingre!”