MALAKI 1 - AMÜSA BAIBEL (BSI)

¹ Hi Abüdongba-nü Israelrü khyang Malaki khu jücho yusi.

Israel nengdang Abüdongba Amüi

² Abüdongba-nü amüyurü te yocho, “Ihnü lede nührü müicho.” Ta arühnü yore, “Nühnü ihrü khüta müicho?” Abüdongba-nü lalingre, “Esau e Jakob nyüh jüninyü, ta Ihnü Jakob ko abi chahnü trahchocho müicho,

³ ko Esau ko abi chahnü trahchocho thrünyicho. Ihnü Esau azong lih thsangnyangjücho ko rangmü kanglungrü khyang alih tsü pehjücho.”

⁴ Esau trah, Edomrünü “Ihrü sühdiyang thsangnyangjüko, ta ihrünü külüpchinung pü yokhang” hütsüde Abüdongba-nü lalingnung, “Thsalisohng, Ihnü thali tphünahjünung. Nyitsarünü arüh te, ‘Amütsa ko Abüdongba zichüroba yucho pü dsinung.’”

⁵ Israelrünü hi arüh nahtsenü ngunung, ko yonung, “Israel lih khupü mii Abüdongba tsü Akohbong.”

Abüdongba -nü Bebürü Yübücho

⁶ Akohba Abüdongba-nü bebürü te yore, “Atsurü khüdunü au jengreng drüre, ko kulirünü abüdongba jengreng drüre. Ih nührü au, tuepü I jengreng müdrüro? Ih nührü abüdongba lile, tuepü Ih müdrüro? Nührünü Ih mükhire, ta nührünü, ‘Ihrünü nüh khüta mükhicho’ pü yore.

⁷ Nührünü I bholu chah amümüsa tsuyongnung mübüre. Adesü nührünü yore, ‘Ihrünü nü jengreng khüta müdrücho?’ I bholu münyijücho nengdang Ihnü nührü te yonung.

⁸ Nührünü adhsangnang, anahtoh mahkhang ajingjah kanglungrü amübü jüba tsü amünyi mahrü do? Governor khyang hütsütari kanglungrü jodhing! Abinü künyangnü müinung do?”

⁹ Nührü bebürüti, ade Tsingrangba te Ihsa müisohnung tsingdhing. Abinü nührü te mülalingnung, ta hütsü nührü mülang thsanung.

¹⁰ Akohbong Abüdongba-nü “I bholu chah amükhyu michang tahkehba yatinung nengdang nührü yola nyüh khüdunü amübükuh trahtri khangtisohnyüre. Ih nührü te mükünyang; Ihnü nührü amübü mükhyüchonung.

¹¹ Nyüchüro langnü nyüzüdu chii I neng dhichire. Apümlang müchiji tah adekheng kangmübü I khyang jüre. Arüh atümungnü Ih dhichire!

¹² Ta nührünü I bholu tsü amii mühlepü chode ko münyicho tsuyongnung nührünü mübüde, I jengreng müdrüre.

¹³ ‘Hiri apümnü müthohkopü yore’ ko nührü naking hingkehre. Nührünü Ih mübünung afühcho mahkhang ajingjah ko adhsangnang kanglungrü hirore. Ihnü hütsüri khyüchonungepü lümrü do?

¹⁴ I khyang jünung nyengchocho kanglungrü yola atsa lipü amii müliba kanglungrü I khyang kangmübü jüba kihyochüba nyitsarü tsü chokehcholang! Tunüo Ih yangthsaba amülah, ko yucho apümnü Ih drüre.”