LIPOH 9 - AMÜSA BAIBEL (BSI)

Tsingrangba-nü Noa te Zengtacho

¹ Tsingrangba-nü Noa ko atsurüti müwajüpü arüh te yocho, “Suchehng ko limih jeng lieng.

² Kanglungrü, uza ko nguh apümnü nührü drü linung. Arüh apüm nütase pohki linung.

³ Nührünü arüh tsunung kohle, ko singvarovasü tsung; Ihnü hiri apüm nührü khyang atsunung jüre.

⁴ Ta nührünü akang shuh shüh zeh tütsu; Ihnü hi yatire, tunüo akang tsü ashüh la zehle.

⁵ Khürünü nyitsarü akang khyükhang, abi khingchinung. Kanglungrü khürünü nyitsarü akang khyükhang hütsü süsohnung.

⁶ Sünü nyitsarü müpsehnang nyitsarünü abi müpsehsohnung; tunüo nyitsarü tsü Tsingrangba kyocho la thricho.

⁷ “Nührü adrong suchehnung, ko nührü trahvati alimih jeng linung.”

⁸ Tsingrangba-nü Noa ko atsurüti te yocho,

⁹ “Ihnü ade nüte, nü chahnü trahchochotite,

¹⁰ ko akang apüm, kanglungrü apüm, uza apüm nüyola singkong lanü chürorü apüm te azengtaba hi külüpre.

¹¹ Nüte azengtaba yu hinü külüpre: Adelü khodesü akang liba apüm kihmülümnü müchangjünung; ko khodesü kihmülümnü limih müchangjünung Ihnü nyengchore.

¹² Nüte ko akang liba apüm te müchangkaba azengtaba külüpcho amüdhethsa hi linung,

¹³ Ihnü nyükhila I singthsalu yohpüre. Hiba hi limih te Ih azengtaba amüdhethsa linung.

¹⁴ Khodederü ning tsü Ihnü nyükhinü shütisohnang, ko mürükengkeng chürosohnang,

¹⁵ Ihnü nüte ko kanglungrü apüm te adelü khodesü kihmülümnü müchangsohnung nyengchocho Ihnü lümchehnung.

¹⁶ Khode nyükhila mürükengkeng chüronang, Ihnü hütsü ngunung ko Ih ko akang liba apüm te müchangkaba azengtaba lümchehnung.

¹⁷ Akang liba apüm te nyengchoba amüdhethsa tsü hütsü linung.”

Noa ko Atsurüti

¹⁸ Singkong lanü chüroba Noa tsurüti tsü Shem, Ham ko Jafet. Ham tsü Kanan au thsacho.

¹⁹ Noa tsurü arüh asang tsü limih chah nyitsarü apüm jümürü lile.

²⁰ Noa tsü luthsarü licho ko akhudiba shükusiluh khyümba tsü abi thsacho.

²¹ Abinü yongkha yongcho ko müchapü atbhüdeng abi shükuh la yüpjocho.

²² Kanan au Ham-nü au tbhüdeng liba tsü ngu wünü amunge ani nyüh te yocho.

²³ Achotsü Shem e Jafet nyünü shü khüdu khyo khang chah thakeh bipü, au tbhüdeng liba tsü müngunung nengdang khanglangnü wünü au chah phakehjücho.

²⁴ Khode Noa müdsacho ko atsurü achangbanü abi chah tu nguchicho hütsü müdhecho,

²⁵ abinü yocho, “Kanan chah chokehchola küdung! Abi ajünirüti yurü kangnung.

²⁶ Abüdongba Shem Tsingrang seing! Kanan tsü Shem yurü kangnung.

²⁷ Tsingrangba-nü Jafet disohng! Abi chahnü trahchochoti Shem nyitsarü yola lisohng! Kanan tsü Jafet yurü kangnung.”

²⁸ Kihmülüm khanglang Noa kang 350 alaa licho

²⁹ ko kang 950 thsade abi sücho.