LIPOH 7 - AMÜSA BAIBEL (BSI)

Kihmülüm

¹ Abüdongba-nü Noa te yocho, “Singkong la tsü nührü kukhirü atümung züdung; tunüo hiba shangla I nahtse te nüh du yuje ngure.

² Amüsa kanglungrü apüm ahung müipi lanü dhrela dhünyühnyeh, ta amümüsa kanglungrülü ahung müipi lanü dhrela khüdu-khüdu du nüyola nüng.

³ Uzasü ahung papa lanü dhrela dhünyühnyeh nüng. Limih la thali kanglungrü ko uza ahung papa suchehnung nengdang hita nguching.

⁴ Nyümong dhünyeh khanglang Ihnü limih la nyümong yüre ko romang yüre tsing rosohnung ko Ihnü thricho akang liba lüpcho changsohnung.”

⁵ Ko Abüdongba-nü mülacho apüm Noa-nü nguchicho.

⁶ Limih la kihmülüm rode Noa kang thsih dhüroh azirü licho.

⁷ Abi ko anitpü, atsurüti ko arüh nitpürüti kihmülüm lanü tsiphunung singkong la tsü züducho.

⁸ Kanglungrü ko uza amüsanye amümüsanye ahung apüm lanü atrüh khüdu ko apung khüdu,

⁹ Tsingrangba-nü mülacho roh-i Noa te singkong la tsü züducho.

¹⁰ Nyümong dhünyeh lipü kihmülüm tsü rocho.

¹¹ Noa kang thsih dhüroh azirü thsade, choo anyüula nyümong dhüredhünyeh nyümong, alih yonglang kihna kihsi apüm tsohphohcho, ninglang kihmülüm trahtri apüm khangthrucho,

¹² ko limih la nyümong yüre ko romang yüre tsing rocho.

¹³ Hütsü nyümong tsü Noa ko anitpü nyüh, arüh tsurü asang Shem, Ham ko Jafet ko arüh nitpürü nüpü singkong la tsü züducho.

¹⁴ Arüh yola kanglungrü ahung apüm, kuh la kangba ko rangmü la liba, azikyah ko amülah ko uza ahung apüm züducho.

¹⁵ Ko Tsingrangba-nü mülacho kyo, akang liba apüm lanü atrüh khüdu ko apung khüdu singkong la tsü züducho.

¹⁶ Hütsüpü Noa khanglang Abüdongba-nü kukhang tsü khangtijücho.

¹⁷ Nyümong yüre mütozah kihmülüm tsü limih la rocho ko kih tsü tingchonü singkong tsü alih tenü dhimüsucho.

¹⁸ Kih tsü alaa ting kürochonü singkong tsü kih michah mülingkeh kürocho.

¹⁹ Azongti mii tingtinungthsa kih tsü ting kürocho;

²⁰ Alaa alaa ting küronü akhang tenü khehap 15 alaa tingcho.

²¹ Limih la akang apüm, uza, kanglungrü ko nyitsarü apüm sücho.

²² Limih chah asah chichiba lüpcho sücho.

²³ Abüdongba-nü limih la akang liba apüm, amüi tsurü, kanglungrü ko uza apüm changsohcho. Anyingrü tsü Noa ko singkong la abi yola lirüti du thsacho.

²⁴ Kihmülüm tsü nyümong thsihpü dhünyang yingcheh münyehcho.