LIPOH 49 - AMÜSA BAIBEL (BSI)

Jakob Yuchang

¹ Jakob-nü atsurüti dsibülung yocho, “I mükang püm ko aronungla nührü chah tu tikehnung hütsü yonung:

² “Jakob tsurüti, shibülung ko nyieng. Nührü au Israel te nyieng.

³ “Reuben, nüh I tsurü aukhuba, nüh I tase ko I longde akhudiba tsurü. I tsurü atümung yola akhacheh-u ko re azehba.

⁴ Nüh shühchi khong yaba kihloh kyo, Ta nüh ayingba müthsanung, Tunüo nühnü I ashamtpü te yüpko ko nüu chongnong münyijüko.

⁵ “Simeon e Levi nyüh jüninyü, Arühnü arüh thsunohrü shühkhatohnungla bichire.

⁶ Arüh rang chotala Ih müzehnung, Mahkhang arüh lümtrümla mühzehnung, Tunüo arühnü zichüro nyitsarü müpsehko, Ko arüh künyangtade misüpungti letsuko.

⁷ Arüh zichürochola chokehcholaang, tunüo hütsü adrünung khüdu, Arüh rihlongla chokehcholaang, tunüo hütsü khütang akhürah. Ihnü arüh Israel jeng shupishuzasohnung. Ihnü arüh nyitsarüti yola tsishosohnung.”

⁸ “Juda, nü jünirütinü nüh senung. Nühnü nü rorüh ahongnü rangcho. Nü jünirütinü nü jingte mükhukehnung.

⁹ Juda tsü kihkhünying kyole, Abi nyihrü kyüsehpü abi kulang thalire, Müyungchüpü yüpjore. Sünüsü abi küdrüdrü mülongmüzire.

¹⁰ Juda-nü yangthsaba ja binung, Ko abi trahnü lede yangthsanung. Yuchotinü abi khyang roh-tüpnung, ko ajingte mükhukehnung.

¹¹ Abinü agadu za shükusih chah xohchingre, shükusih atsauba chah. Abinü abi shü yongkha amoh shüh la thsüre.

¹² Anah tsü yongkha yongchonü amoh, Aha tsü nyikih yongchonü athru.”

¹³ “Zebulun kihdi te linung. Abi kihbekhüm tsü kihkuh müdongchah kangnung. Abi lurü tsü Sidon chihnung.”

¹⁴ “Isakar tsü pümji anyüh kahla müyungchüpü yüpjoba gadu kyole.

¹⁵ Ta abinü kyahshangchah tsü tsa ngucho, Ko alih tsü akhyünyünung. Hütsünü abinü khe hinung arung mükhure. Ko ayurü kyo khing nguchire.”

¹⁶ “Dan tsü amüyurü michah yangthsanung. Arüh tsü Israel hung apa kyo linung.

¹⁷ Dan tsü langjüp mürü linung, Langjüp müyüh mürü thsanung, Hütsünü kuri thsühza mükyühnung, Hütsükhu hütsü chah pümba tsü akhanglang dhichahchüpehnung.”

¹⁸ Ih nüh anüchehba yingre, Abüdongba.

¹⁹ “Gad tsü fükhohrü mülungnü benung, Ta abinü ximüla arüh iinung.”

²⁰ “Asher lih lanü tsang bholo chüronung. Abinü yangthsarünü tsuba adekheng tsang chixinung.”

²¹ “Naftali tsü ayah atsa kehba, shangchi rachiba shümüshü.”

²² “Josef tsü kihna te rangmü gadu kyole, ko azong chah rangmü gaduza kyole.

²³ Abi rorütinü abi zi becho. Ko arüh singthsalu ko tbüdeng bipü abi iicho.

²⁴ Ta abi singthsalu drengdreng licho, Ko abi kheh khahkhah licho. Jakob Akohba Tsingrang ko Israel tsungtiba san nyahba nüh.

²⁵ Hi nüu Tsingrang sünü nüh troro, Akohba Tsingrang sünü nüh müwajüro Amilang tsing ko alih yonglangnü kih züchehsoba amüwa. Kanglungrü ko tsuzarü khütang müwajüba.

²⁶ Fürü ko yungpi amüwa, Jümü azong amüwa ko achangka müliba zong lanü akünyangnung kohroti. Hiri amüwa hi Josef thah chah lisohng. Amungrü tenü pathsa yohpüba chah lisohng.”

²⁷ “Benjamin tsü amünyo rangfü kyonung. Anyangnyü ko amalang abinü müpsehre ko tsukhangre.”

²⁸ Hiri hi Israel hung dhüreanyüh ko arüh müipite yuchangjüde aunü aphishu yu yochoti lile.

Jakob Sücho ko Merangcho

²⁹ Hütsüpü Jakob-nü atsurüti te yuzengjo yocho, “Adelü Ih tpurü yang asülang würe,

³⁰ nührünü Ih Kanan lih la, Mamre nyüchürolang Makpela la Hit-rü Efron luh la lungkhi la tsü Iurü yola dhrürang. Abraham-nü hiba luh ko lungkhi hi merangji thsanung Efron te lihcho.

³¹ Abraham ko anitpü Sara hütsüla dhrürangcho; hütsüla Isak ko anitpü Rebeka dhrürangcho; ko Ihnü hütsüla Lea-sü dhrürangcho.

³² Luh ko hütsüla lungkhi tsü Hit-rü te lihcho. Ih hütsüla dhrürang.”

³³ Khode Jakob-nü atsurüti te yu changkacho, abinü khülukehcho ko amüci longcho.