LIPOH 48 - AMÜSA BAIBEL (BSI)

Jakob-nü Efraim ko Manase Nyüh Müwajücho

¹ Khü lipü Josef te au füdhsalepü yu jücho. Achotsü abinü atsunyü Manase ko Efraim nyüh nüpü abi shirünung wücho.

² Khode Jakob te atsudhre Josef abi shirünung roko pü yocho, abinü haririnü shemüsu achongnong chah pümcho.

³ Jakob-nü Josef te yocho, “Akohba Tsingrang-nü Kanan lih la Luz la Ite chüro ngu Ih müwajücho.

⁴ Abinü Ite yocho, ‘Nü chahnü trahchochonü yucho adrong kangsohnung Ihnü nüh müwajünung; ko Ihnü arüh khyang lede nengdang hiba lih hi jünung.’”

⁵ Jakob-nü mütozah yocho, “Josef, Ih hila müroede nü tsurü anyüh Ijip lih la suroba tsü Iyo lile; Efraim e Manase nyüh tsü I tsurü Reuben ko Simon nyüh tsatsae.

⁶ Hiko azarü apa likhang, arüh tsü Iyo roh-i mükhichinung; arüh ngunung thsiking tsü Manase ko Efraim nyüh khu ngunung.

⁷ Ihnü hi nütpa Rachel nenglanü nguchire. Ih Mesopotamia langnü rode, Kanan lih la Efrath chinyo rode abükyü süchonü I lasih dee dhsare. Ihnü hütsüla Efrath wüba langjüp abükyü dhrürangcho.” (Efrath tsü ade Bethlehem dsire.)

⁸ Khode Jakob-nü Josef tsurüti ngucho, abinü tsingdhingcho, “Azarü hiri sürüo?”

⁹ Josef-nü lalingcho, “Hiri Tsingrangba-nü Ijip la I khyang jücho I tsurüti lile.” Jakob-nü yocho, “Ihnü arüh müwajünung I yanglang norung.”

¹⁰ Adelü Jakob shichonü tsidsa müngucho. Josef-nü azarüti tsü abi yang norojücho ko abinü arüh wüp bemüthsüpcho.

¹¹ Jakob-nü Josef te yocho, “Ihnü nüh thali ngunung mülongdicho, ta ade Tsingrangba-nü nü tsurü mii ngusohre.”

¹² Hütsüpü Josef-nü arüh tsü Jakob phüm chahnü nüchocho ko abinü ajingte alih la mükhukehcho.

¹³ Josef-nü Efraim tsü Jakob fülilang ko Manase atsalang pümsohcho.

¹⁴ Ta Jakob-nü akheh khyümüla azabanye akheh tsalangnü Efraim thah chah ko akheh fülilangnü aziba Manase thah chah nyümkehcho.

¹⁵ Hütsüpü abinü Josef müwajücho: “Iu Abraham ko Isak-nü dikehba Tsingrang-nü hiri azarü müwajüng. Chünye nyümong chii Ih noroba Tsingrang-nü arüh müwajüng.

¹⁶ Dhsürü apüm lanü Ih khümcho noroba ninglang riwürünü arüh müwajüng. Hiri azarü khu I neng ko Iu Abraham ko Isak neng mütozah lisohng! Arüh chahnü tsuzarü khütang susohng!”

¹⁷ Josef-nü au tsalang kheh Efraim thah chah nyümkehcho ngu mükünyangcho; achotsü abinü au kheh tsü Efraim thah lanü khyükhu Manase thah chah nyümkehsohcho.

¹⁸ Abinü au te yocho, “Uwa, hütsüta mah. Aziba tsü hie, nü kheh tsalang abi thah chah nyümkehng.”

¹⁹ Aunü münyengcho yocho, “Ihnü müdhele, I tsudhre, Ihnü müdhele. Manase chahnü trahchocho lanüsü amülah chüronung, ta ani tsü abi tenü adiu kangnung, ko abi chahnü trahchochonü yucho amülah kangnung.”

²⁰ Hütsüta abinü hütsü nyümong arüh müwajü yocho, “Israelrünü amüwa choyohde nührü neng bichinung. Arühnü ‘Tsingrangba-nü Efraim ko Manase roh-i kangsohng’” pü chonung. Hütsüta Jakob-nü Efraim tsü Manase tenü akhu kangsohcho.

²¹ Hütsüpü Jakob-nü Josef te yocho, “Ih sünung thsacho nührünü ngule, ta Tsingrangba nührü te linung ko abinü nührü jümürü lih lang thali noronung.

²² Ihnü nü mungrü tenü alaa lihsu mükyah khüdu, I nohsheng ko I thsalunü Amor-rü khehlanü rohchocho nü khyang Shekem jüre.”