LIPOH 41 - AMÜSA BAIBEL (BSI)

Josef-nü Yangthsaba Melang Müchehcho

¹ Kang anyüh khupü khanglang, Farao-nü melang khüdu melangcho: Abi Nile yongkhi te yacho

² ko yongkhi la tsünü misü amükhyahnung ko anyünyeh dhünyeh chürocho ko zanu mükayacho.

³ Hütsüpü misü apa akohthsüh ko akongra dhünyeh chürocho. Arüh tsü ro apa misü shündhün yongkhi bekhümla tsü yacho,

⁴ ko akongra misüti tsünü anyünyehti tsü tsucho. Hütsüpü yangthsaba tsü jesucho.

⁵ Abi anyüpiu yüpseh tsicho ko melang apa khüdu melangcho. Dhing, madong khüdu chah mamüphung dhünyeh müzang nyi yacho.

⁶ Hütsüpü apa mamüphung dhünyeh abara ko lihpi nyübongnü trüpsehcho chürocho,

⁷ ko abara mamüphungti tsünü amüzang tsü münyücho. Hütsüpü yangthsaba tsü jesucho, ko hütsü abi melang thsacho.

⁸ Anyangnyü tsü abi müci mükyangcho, hütsünü Ijip la amongrü ko amüdherü atümung dsibülungcho. Abinü arüh te abi melang tsü yocho, ta sünüsü hütsü adüzü tsü müyochehcho.

⁹ Hütsüde yongkha shing bibanü yangthsaba te yocho, “Ihnü thsamehkopü Ihnü chünye nyengchore.

¹⁰ Nühnü hümdhse külüprü ayingba ihjü te nü rihlong chürocho ko anyahrü aziba kuh la ihjü arangyoh la yohpücho.

¹¹ Romang khüdu ihjüdingnü melang khüdu-khüdu melangcho ko melang tsü adüzü papa licho.

¹² Ibrirü za khüdu ihrü yola anyahrü anüchiba dikehrüthsa licho. Ihrünü abi te ihrü melang tsü yocho ko abinü hütsü adüzü ihrü te yocho.

¹³ Ko abinü yocho tsatsa tsü tikehcho: Nühnü I khyang Ipu nguchi thali jücho, ta hütsüba hümdhse külüpba tsü aku dengcho.”

¹⁴ Achotsü Farao-nü Josef dsinung mütheh abi arangyoh lanü norocho. Abinü abenbüh heh ajengki mülihpü, yangthsaba yanglang rocho.

¹⁵ Yangthsabanü yocho, “Ihnü melang khüdu melangko, ko hütsü sünüsü adüzü müyocheh. Ta nühnü melang adüzü müchehre pü Ihnü yuchire.”

¹⁶ Josef-nü lalingcho, “Adirü, Ihnü mah, ta Tsingrangba-nü aphishu adüzü jüre.”

¹⁷ Hütsüpü Farao-nü yocho, “Ih Nile yongkhi te yacho

¹⁸ ko yongkhi la tsünü misü amükhyahnung ko anyünyeh dhünyeh chürocho ko zanu mükayacho.

¹⁹ Hütsüpü misü apa akohthsüh ko akongra dhünyeh chürocho. Ihnü Ijip lih la misü hitari khodesü müngudhing.

²⁰ Misü akohthsüh ko akongrati tsünü anyünyehti tsü tsucho.

²¹ Ta arühnü hütsüri tsunye, hütsü sünüsü mümüdhecho, tunüo arüh akhudi kyo du licho. Hütsüpü Ih jesucho.

²² Adesü Ihnü madong khüdu chah mamüphung dhünyeh amüzang ko nyi yacho ngucho.

²³ Hütsüpü apa mamüphung dhünyeh abara ko lihpi nyübongnü trüpsehcho chürocho,

²⁴ ko abara mamüphungti tsünü amüzang mamüphungti tsü münyopehcho. Ko Ihnü melang tsü amongrü te yoko, ta arüh sünüsü Ite adüzü tsü müyocheh.”

²⁵ Achotsü Josef-nü yangthsaba te yocho, “Melang anyüding adüzü tsü khüdu du lile; Tsingrangba-nü tu nguchinung liro hütsü nüte yore.

²⁶ Misü anyünyeh dhünyeh tsü kang dhünyeh ko mamüphung dhünyeh tsüsü kang dhünyeh; anyüding tsü adüzü khüdu du.

²⁷ Akhanglang chüroba misü akongra dhünyeh ko lihpi nyübongnü trüpcho mamüphung abara dhünyeh tsü yangkong kang dhünyeh linung.

²⁸ Hütsü Ihnü nüte yocho kyo, Tsingrangba-nü nguchinung liba tsü nüte mishako.

²⁹ Kang dhünyeh Ijip lih apüm la thangchi linung.

³⁰ Hütsü khanglang kang dhünyeh yangkong linung, ko thangchi liba kangti apüm nbüchü pehnung, tunüo yangkong tsünü limih kingkajünung.

³¹ Thangchi liba bekhyah tsü nbüchüpehnung, tunüo hütsü khanglang tikehnung yangkong tsü diranung.

³² Nü melang thali-thali melangba adüzü tsü Tsingrangba-nü chungpehko ko Abinü hütsü tunyah mülipü tikehsohnung.

³³ “Ade nühnü Ijip limih apüm xükümnung athsehdhsa ko lümlong ali nyitsarü khürü throung.

³⁴ Nühnü aparü ayingthsanungsü khürü throchehng, ko kang dhünyeh thangchi lide fürü nohlüm münga la khüdu khyübülungsohng.

³⁵ Hiri thangchi liba kangtila tsuyongba apüm khyübülung yangditila zahkehnung ko nyahnung yuzeng jüng.

³⁶ Ko fürü tsü Ijip la tikehnung liba kang dhünyeh yangkong shikhe tsü limih khyang chixinung rikisohng. Hütsüta nguchinü müyurüti tsü mükongsohnung.”

Josef Governor Kangcho

³⁷ Yangthsaba ko abi pohki thsazirütinü lümchung hi khyüchocho,

³⁸ ko arüh te yocho, “Ihsanü Tsingrangba anbü kehba nyitsarü Josef tenü atsau müngunung.”

³⁹ Yangthsabanü Josef te yocho, “Hi apüm Tsingrangba-nü nüte ngusohcho, hütsü khu apüm tenü nüh du anyicheh ko lümlong ali nyitsarü lile.

⁴⁰ Ihnü nüh I yanglih michah xükümsohnung ko I müyurü apümnü nüyu nyinung. I chitunglü nü tase linung.

⁴¹ Ihnü nüh Ijip yanglih apüm michah governor kangsohre.”

⁴² Hütsüpü yangthsabanü akheh lanü yangthsarü ashingsing kehba imüshi khyücheh Josef müyungzala yohjücho. Abinü abi khyang shü ariri müpisohcho, ko ahong la hon ixilih lahjücho.

⁴³ Abinü yangthsaba yo anyüuba nyübong akhüluba chah abi pümsohcho, ko abi bekhu anyahrüti tsehsoh arühnü züdecho, “Lang vijüng, Lang vijüng!” Hütsüta Josef tsü Ijip yanglih apüm michah governor kangsohcho.

⁴⁴ Hütsüpü yangthsabanü abi te yocho, “Ih yangthsabae, ta Ijip yanglih apüm la sünüsü nüyu müzehpü jing mahkhang kheh khüdusü dhimüsunung mükoh.”

⁴⁵ Abinü Josef khyang Ijiprü neng Zafenat Panea jücho;

⁴⁶ ko abi khyang Heliopolis yangdila bebürü Potifera tsulatpü Asenath anitpü thsanung jücho. Josef tsü Ijip yangthsaba dikehde abi kang sangre thsacho. Abinü yangthsaba kuh pehjüpü yanglih apümlang shitsehcho.

⁴⁷ Kang dhünyeh Ijip lih la thangchi pungrohirode,

⁴⁸ Josef-nü hütsüri khyübülung yangditila zahkehcho. Yangdi mükhu la hütsüba mükang luhti lanü fürü khyübülung zahkehcho.

⁴⁹ Fürü tsü drongrachonü adelü Josef-nü mükyahcho, tunüo hütsü kihdi la lihpi kyo licho.

⁵⁰ Yangkongba kang ro müchihde, Asenath chahnü Josef azarü anyüh licho.

⁵¹ Abinü yocho, “Tsingrangba-nü I chongcha ko Iu kukhi apüm nbüchüsohcho” hütsünü abinü atsurü aukhuba neng Manase dsicho.

⁵² Adesü abinü yocho, “Ih chongchaba lih la Tsingrangba-nü I khyang tsuzarü jücho” hütsünü abinü atsurü anyüuba neng Efraim dsicho.

⁵³ Kang dhünyeh Ijip thangchi liba shikhe changka rocho,

⁵⁴ ko Josef-nü yocho kyo, kang dhünyeh yangkongnung dikehcho. Limih pa apüm la yangkong licho, ta Ijip yanglih apüm la tsuyongnung licho.

⁵⁵ Khode Ijiprü kongnung dikehcho, arühnü yangthsaba te fürü ching züdecho. Hütsüde abinü arüh te Josef yanglang wüng, ko abinü tonang nyieng pü yuzengjücho.

⁵⁶ Yangkong tsü amütsau kang yanglih apüm jengcho, achotsü Josef-nü azahkehji kuh khangthru Ijiprü khyang fürü tsü icho.

⁵⁷ Limih apüm langnü Ijip lang Josef te fürü lihnung rocho, tunüo apümlang yangkong diracho.