LIPOH 38 - AMÜSA BAIBEL (BSI)

Juda ko Tamar

¹ Hütsütade, Juda-nü ajünirüti pehjüpü jowünü Adullam yangdila nyüh khüdu anengnü Hira te licho.

² Hütsüla Juda-nü Kanan-larü khüdu anengnü Shua shirücho.

³ Abinü abükyü khyücho ko abükyünü azarü khüdu nümüsucho ko abi neng Er dsicho.

⁴ Adesü abükyü fü müdeng kangcho ko azarü khüdu nümüsucho ko aneng Onan dsicho.

⁵ Adesü abükyünü azarü khüdu nümüsucho ko aneng Shela dsicho. Azaba surode tsü Juda Akzib la licho.

⁶ Juda-nü atsurü aukhuba Er khyang anitpü anengnü Tamar khyüjücho.

⁷ Ta Abüdongba jingte Er akang saying tsa mülicho, hütsünü Abüdongba-nü abi süsohcho.

⁸ Achotsü Juda-nü Er ani Onan te yocho, “Wüng ko nü mung nitpü te mükhong. Nü mung chahnü majüh linungthsa nü mung nirü roh-i abükyü te nguching.”

⁹ Ta Onan-nü tsuzarü tsü abi yo müthsanungepü müdhe, khodederü abükyü te mükhongnang amung nengdang azarü mülisohnung shulüm, abaji tsü abinü alih la shopehsohcho.

¹⁰ Ta abinü nguchiba tsünü Abüdongba mükünyangsohcho, hütsünü Abüdongba-nü abisü süsohcho.

¹¹ Hütsüpü Juda-nü atsunyahlatpü Tamar te yocho, “Nüurü kulang thali wüng ko I tsurü Shela mülümjingde chomih lieng.” Amungrüti kyo Shela-sü süsohkhang mütsapü lümcho. Achotsü Tamar aurü kulang tsicho.

¹² Azachah lipü Juda anitpü sücho. Meshü pipü khanglang, abinü Adullam-rü amüyang Hira anyüding abi san nbüh müjüpchah Timna lang jowücho.

¹³ Hütsüde khürünü Tamar te Timna lang aku san nbüh müjüpnung wülepü yocho.

¹⁴ Achotsü abükyünü khyo yaba chomih jengki mülihcho ko aku müshüpü Timna lang wüba langla Enaim yangdi tbükhüm la pümcho. Tunüo Juda tsurü achangba Shela tsü adelü lümjingnye abükyü mükhyüsohcho tsü abükyünü müdhecho.

¹⁵ Khode Juda-nü abükyü ngucho, abinü abükyü tsü shutsa-irüepü lümcho, tunüo abükyü ku müshüpü licho.

¹⁶ Abinü lang jüpnü abükyü yang wünü yocho, “Angang khütoi khyüro?” (Abinü hütsü atsunyahlatpüepü mümüdhecho.) Abükyünü yocho, “Nühnü I khyang tu jünung?”

¹⁷ Abinü yocho, “Ihnü nü khyang I san lanü mizaza khüdu hirosohnung.” Abükyünü yocho, “Khang, nühnü miza tsü hiro müjüde anyengchotacho amüdhethsa I khyang lango jüng.”

¹⁸ Abinü yocho, “Ihnü amüdhethsa tu jünung?” Abükyünü yocho, “Nü neng shingba ko ayo, ko nü kheh la ja tsü jüng.” Abinü hütsüri abükyü khyang jücho. Hütsüpü anyüh mükhongcho ko abükyü afü müdeng kangcho.

¹⁹ Tamar-nü kulang thali wücho ko ajengki mülihpü chomih jengki thali khyücho.

²⁰ Juda-nü amüyang Hira khyang miza tsü bipü khingkutpü kheh la abi anyengchotaba kohro tsü khyünung wüsohcho, ta Hira-nü abükyü tsü müshirücho.

²¹ Abinü Enaim la khürüte tsingdhingcho, “Hila langjüp pümba shutsa-ilatpüsü khülo?” Arühnü yocho, “Khodesü hila shutsa-ilarü mühle.”

²² Abinü Juda yanglang thali wü yocho, “Ihnü abükyü müshirü. Hütsüla lirünüsü hütsüla khodesü shutsa-ilarü mülirepü yoko.”

²³ Juda-nü yocho, “Kohro tsü yohpüsohng! Mahkhang Ihsabürü münyüdong kangnung. Ihnü angang jünung müküpko, ta abükyü müshirü.”

²⁴ Choo asango khanglang khürünü Juda te yocho, “Nü tsunyahlatpü Tamar-sü shutsa-ilarü kang rachipü ade atsu zehle.” Juda-nü yuzengjücho, “Abükyü nochüdung ko trüpseh süsohng!”

²⁵ Abükyü notside, abükyünü aku yang yu hi yochücho. “Kohro hiri abüdongba-nü Ifü müdengsohko. Sü yonang hiri dhingdhing; neng shingji ayo kehpü ko hiba ja.”

²⁶ Juda-nü hütsüri dhingcheh yocho, “Abükyü athsalange. Ihnü I tsudhre Shela khyang abükyü khyüsohba thsako.” Hütsükolü Juda-nü abükyü te khodesü mümükhongcho.

²⁷ Khode abükyü zatbünung becho chihcho, abükyünü azarü arüp suronung müdhepehcho.

²⁸ Khode mikhung rocho, khüdu kheh akhu chürocho; arükutpünü she amohnü akheh la müthsüjüpü yocho, “Hi akhu chürochoe.”

²⁹ Ta abinü akheh thali tohyoh tsicho ko ani tsü akhu surocho. Achotsü arükutpünü yocho, “Nühnü hita nü lang khangthru chüroko.” Hütsünü abinü aneng Perez dsicho.

³⁰ Hütsüpü amung tsü akheh la she amoh müthsürang bipü aka chürocho ko abinü aneng Zera dsicho.