LIPOH 37 - AMÜSA BAIBEL (BSI)

Josef ko Amungrüti

¹ Jakob-nü mütozah au liba Kanan limih la du licho,

² ko Jakob kukhi yukheh tsü hiroh-i. Josef tsü kang dhüredhünyeh dhrezarü khüdu licho ko abinü au ashamlarü Bilha e Zilpa nyüh tsurüti yola san ko miza nyahcho. Abinü amungrünü nguchi amütsa nguchicho yusi au te yo licho.

³ Jakob-nü atsurü aparü atümung tenü Josef müicho, tunüo abi tsü abi ashilang surocho. Abinü bongri-fükhüm abi khyang xüjücho.

⁴ Khode amungrünü aunü arüh tenü abi alaa müicho müdhecho, arühnü ani te tsü yu mii akyühde müchota abi thrünyicho.

⁵ Romang khüdu Josef-nü melang khüdu melangcho ko hütsü arüh te yode, arühnü abi alaa thrünyicho.

⁶ Abinü yocho, “Ihnü hita melangko.

⁷ Ihsa atümung luh la mabhong bhong licho, ko I mabhong tsü müchongkhüti shemüsu yacho; hütsüde nührü mabhongti tsünü Iyo mabhong tsü mükangmüla yapü hütsüchah mükhukehcho.”

⁸ Hütsüde amungrütinü yocho, “Hütsü khu nüh yangthsaba kangpü ihrü michah yangthsanungepü lümrü mah-o?” Hütsüta amelang ko abinü arüh nengdang yocho khu tsünü arühnü abi alaa thrünyicho.

⁹ Hütsüpü Josef-nü melang apa khüdu melangcho amungrü te yocho, “Dhing, Ihnü nyü ko chonu ngucho, ko chenghi dhürekhehnü I chah mükhukeh ngucho.”

¹⁰ Abinü melang tsü autesü yocho ko aunü abi yübücho: “Melang hi tu khütario? Nütpa ihjü ko nü mungrütinü ro nüte mükhukehnung nühnü lümrü mah-o?”

¹¹ Josef amungrütinü abi nahmohcho, ta aunü khiyu hi alüm la yohpücho.

Josef Icho ko Ijip lang Notsicho

¹² Nyümong khüdu Josef amungrü Shekem lang au san nyahnung wüpü lide

¹³ Jakob-nü Josef te yocho, “Nü mungrü san xükümnung Shekem lang wü lile, ko hütsülang Ihnü nüh wüsohnyüre.” Josef-nü lalingcho, “Ih rungnüm lile.”

¹⁴ Aunü yocho, “Wüng ko nü mungrü ko santi khümcho tsa mülinang dhingpü lung Ite young.” Hütsüta aunü abi Hebron Ngah lanü wüsohcho.

¹⁵ Josef tsü Shekem chihpü arüh yangchi rachide nyüh khüdunü abi ngu abi te yocho, “Nüh tu yangchiro?”

¹⁶ Abinü yocho, “San nyahrü I mungrü yangchire. Arüh khüde rachirünang mümüdheo?”

¹⁷ Nyitsarüba tsünü yocho, “Arüh hilanü tsipehko. Arüh Dothan lang wünungepü arüh chotacho Ihnü yuchiko.” Achotsü Josef-nü amungrü khanglang iiwücho ko arüh Dothan la shirücho.

¹⁸ Arühnü abi ashulanü ngucho ko abi ro müchie, arühnü abi müpsehnung arah külüpcho.

¹⁹ Arühnü khüdunü khüdu te yocho, “Melang melangbong tsü tsehle.

²⁰ Rung, Ihsanü abi müpsehnung ko abi me tsü yongroh khüdula pehnung. Ko Ihsanü abi rangmü kanglungrünü mükahsehkopü yonung. Hütsüpü abi melang tsü tu kangnang dhingdhingnung.”

²¹ Reuben-nü hi yuchi abinü Josef khümchonyücho. Abinü yocho, “Ihsanü abi mümüpsehnung ko

²² yongroh la tsü dhiyohchonung, ta abi chah kheh tüthah.” Hi abinü abi khümcho au yanglang thali tsisohnung khyanglangnü yocho.

²³ Ko khode Josef amungrü rochicho, arühnü abi bongri-fükhüm tsü khohchehjücho.

²⁴ Hütsüpü arühnü abi nowü yongroh akung khüdula dhiyohchücho.

²⁵ Arüh yangtsu yade, arühnü Ishmaelrü Gilead lanü Ijip lang shitsehrü rochi ngucho. Arüh ut tsü sehyahba, moi ko axümlichi hicho.

²⁶ Juda-nü abi mungnirü te yocho, “Ihsanü Ihsa nirü rang müpsepehchonü Ihsa tu müjingchonung!

²⁷ Ihsanü abi hiri Ishmaelrü te inung. Abi chah Ihsa kheh müthahnung; tunüo abi Ihsa nirü, Ihsabürü shuh ko shüh lile.”

²⁸ Hütsü arühnü nyengchocho ko khode Midian-rü shithsabhülehrü tsü lahkhu tsicho, arühnü yongroh la tsünü Josef tphahcheh Ishmaelrü te taripi mükyü ngang icho ko arühnü abi Ijip lang notsicho.

²⁹ Khode Reuben yongroh lang tsü rocho ko hütsüla Josef müngucho, abinü alongrichonü ajengki rehnahcho.

³⁰ Abinü anirü yanglang ro yocho, “Azaba tsü hütsüla mühle! Ihnü tu nguchinung?”

³¹ Hütsüde arühnü miza khüdu müpsehcho ko hütsü shüh la Josef fükhüm dhsangcho.

³² Arühnü fükhüm tsü arüh au yanglang hiwü yocho, “Ihrünü hi nguchoe. Hi nü tsurü fükhüm mah-o?”

³³ Abinü hütsü dhingcheh yocho, “Ho, hi abi yoe! Rangmü kanglungrü khürünü abi mükahsehko. I tsurü Josef zangzang rehnapü linung.”

³⁴ Jakob-nü alongrichonü ajengki rohnahcho ko müyahshü müpipü bekhyah asheng meshücho.

³⁵ Atsurüti ko atsularüti atümungnü ro abi kihchocho, ta abi müci mükyang yocho, “Ihnü asülih chii I tsurü meshü wünung.” Hütsüta abinü mütozah atsudhre Josef meshücho.

³⁶ Hütsütade Ijip la, Midian-rünü Josef tsü Farao pohki adirü khüdu, yangthsaba kuh la anyahrü yola anüchiba Potifar khyang icho.