LIPOH 33 - AMÜSA BAIBEL (BSI)

Jakob-nü Esau Shirücho

¹ Jakob-nü dhingmüthehde, Esau abi nyitsarü thsih müyü nüpü rochi ngucho, achotsü azarü tsü abinü Lea, Rachel ko ashamtpürü arüh khyang changnah jücho.

² Abinü abi ashamlarü ko atsurüti akhusohcho, hütsüpü Lea ko atsurüti ko Rachel e Josef nyüh akasohcho.

³ Hütsüpü apu akhupü wücho ko khode amung shirücho, abinü alih la dhünyehpili mükhukehcho.

⁴ Ta Esau-nü abi mütohnung shang wücho ko khyahripü abi chah müthsüpcho. Ko anyüding tracho.

⁵ Khode Esau-nü dhingmükangcho ko khingkurü azarüti ngucho, abinü tsingdhingcho, “Nü yola hiri sürüo?” Jakob-nü lalingcho, “Tsuzarüti hiri Tsingrangbarü achomangnü nü dikehrü khyang jücho lile.”

⁶ Hütsüde ashamlarüti ko arüh tsurütinü ro mükhukehcho;

⁷ hütsüpü Lea ko atsurüti rocho ko achangkathsa Josef e Rachel nyüh ro mükhukehcho.

⁸ Esau-nü tsingdhingcho, “Khang, Ihnü mütohba aparü mülungti tsü tu adüzüo?” Jakob-nü lalingcho, “Nüh kihchonung nengdang.”

⁹ Ta Esau-nü yocho, “Ini, Ih kükyo lile. Hütsü nüpu nengdang yohpüng.”

¹⁰ Jakob-nü yocho, “Yanglilüm doh, Ih nü jingte yanglih ngukhang, I jiyü khyüchojüng. I nengdang nü romih nguba tsü Tsingrangba romih ngucho roh-ie, ko nühnü Ih hitoi tsa khyüchoko.

¹¹ Hütsüeko Ihnü nü khyang hiroba jiyü hi yanglilümnü khyüchojüng; Tsingrangba-nü Ih khütang müi dhsütah lüpcho jüko.” Hütsüta Jakob-nü khütang kihchichonü Esau-nü hütsü khyüchocho.

¹² Esau-nü yocho, “Zahnü shemüsunung. Ih nü bekhu wüyanung.”

¹³ Jakob-nü yocho, “Azarüti tase müzehcho nühnü müdhele ko aza nüba san ko misü nengdangsü lümxüre. Nyümong khüdu minü arüh alaa kümkhang, atii shünü sünung.

¹⁴ Hütsüeko yanglilüm nüh akhu tsieng ko Ihnü khainü kanglungrü ko azarü nüpü Edom la nüh mü-iiphüde akohchonü dhsüdhsa ronung.”

¹⁵ Esau-nü yocho, “Khang Ihnü I nyitsarü khürü nü yola pehjünung.” Ta Jakob-nü yocho, “Tu thsanung! Ih nü chahnü achomang du ngunyüre.”

¹⁶ Achotsü hütsü nyümong Esau-nü Edom lang thalicho.

¹⁷ Ta Jakob-nü Sukot lang wücho ko apu nengdang kuh khüdu ko kanglungrü nengdang mütpahvi kyükehcho. Hütsünü hiba müdüm te Sukot pü dsicho.

¹⁸ Abi Mesopotamia langnü thalide, Jakob tsü Kanan la Shekem yangdi tsa rochicho ko yangdi shündhün luh la amüdongchah thsacho.

¹⁹ Abinü hütsüba luh tsü Shekem au Hamor tsurüti te taripi thsih khüdunü lihcho.

²⁰ Hütsüla abinü bholu khüdu külüpcho ko Israel Tsingrang nengla El dsicho.