LIPOH 30 - AMÜSA BAIBEL (BSI)

¹ Ta Rachel-nü Jakob khyang azarü khüdusü münümüsujücho, hütsünü abükyünü afü nahmoh Jakob te yocho, “I khyang azarü khülo mahkhang Ih sünung.”

² Jakob-nü Rachel te zichüro yocho, “Ih Tsingrangba mah-o? Nüh azarü mülisohba tsü Abinüe.”

³ Abükyünü yocho, “Hila I kulilarü Bilha lile; abükyünü I khyang azarü nümüsusohnung abükyü te mükhong.”

⁴ Hütsüta abükyünü anii khyang Bilha jücho, ko abinü abükyü te mükhongcho.

⁵ Bilha afü müdeng kangcho ko Jakob khyang azarü khüdu nümüsujücho.

⁶ Hütsüde Rachel-nü yocho, “Tsingrangba-nü Ih khümko. Abinü I kihchicho yuchi I khyang azarü khüdu jüko” hütsünü abükyünü aneng Dan dsijücho.

⁷ Adesü Bilha fü müdeng kangcho ko Jakob khyang azarü khüdu nümüsujücho.

⁸ Rachel-nü yocho, “Ihfü Ihjü dee chitako, ta Ihnü kohko; hütsünü abükyünü aneng Naftali dsijücho.”

⁹ Khode Lea-nü abükyü sihkakopü müdhecho, abükyünü Jakob khyang akulilatpü Zilpa jücho.

¹⁰ Hütsüpü Zilpa-nü Jakob khyang azarü khüdu nümüsujücho.

¹¹ Lea-nü yocho, “Ih münguh liko” hütsünü abükyünü aneng Gad dsijücho.

¹² Adesü Zilpa-nü Jakob khyang azarü khüdu nümüsujücho,

¹³ ko Lea-nü yocho, “Ih khütoi künyangro! Adelü khingkurütinü Ite künyanglatpü pü dsinung” hütsünü abükyünü aneng Asher dsijücho.

¹⁴ Litoh maxa bekhyah Reuben-nü luhlang wücho ko mandrak ngu hütsü hilung atpa Lea khyang jücho. Hütsüde Rachel-nü Lea te yocho, “Yanglilüm nü tsurü yo mandrak tsü I khyangsü khürü khülo.”

¹⁵ Lea-nü yocho, “Inii khyüchonü mükükyürü mah-o? Adesü I tsurü yo mandrak mii khyüjünung müküprü mah-o?” Rachel-nü yocho, “Nühnü I khyang nü tsurü yo mandrak jükhang, shomülang Jakob te yüpnung kohle.”

¹⁶ Khode Jakob anyüzehlang luhlangnü lungcho, Lea-nü wü abi mütohnü yocho, “Shomülang nüh Ite yüpnungbae, tunüo nü nengdang I tsurü yo mandrak jüko.” Achotsü abinü hütsü romang abükyü te yüpcho.

¹⁷ Tsingrangba-nü Lea kihchicho lalingcho, ko abükyü fü müdeng kangcho ko Jakob khyang atsurü müngau nümüsujücho.

¹⁸ Lea-nü yocho, “Tsingrangba-nü I khyang I jiyü jüko, tunüo Ihnü Inii khyang I kulilarü jücho” hütsünü abükyünü atsurü neng Isakar dsijücho.

¹⁹ Lea adesü afü müdeng kangcho ko Jakob khyang atsurü adhüroh-u nümüsujücho.

²⁰ Abükyünü yocho, “Tsingrangba-nü I khyang jiyü atsa khüdu jüko. Adelü Inii nü Ih khyüchonung, tunüo abi khyang Ihnü adhrerü dhüroh nümüsujüko” hütsünü abükyünü aneng Zebulun dsijücho.

²¹ Akhanglang abükyünü khingkurü khüdu nümüsujücho, ko abükyü neng Dina dsijücho.

²² Hütsüpü Tsingrangba-nü Rachel lümchehcho, ko abükyü dangkhidangnang laling azarü lisohcho.

²³ Abükyü fü müdeng kangcho ko azarü khüdu nümüsucho. Abükyünü yocho,

²⁴ “Tsingrangba-nü I khyang azarü khüdu jo I ashah hitsijüko; ko abükyünü aneng Josef dsijücho, ko yocho, Abüdongba-nü adesü I khyang azarü apa khüdu jüngtü!”

Laban te Jakob-nü Rehtacho

²⁵ Josef suropü khanglang Jakob-nü Laban te yocho, “Ihrü lih yang thali tsisohng.

²⁶ Ihnü nüh dikeh shehcho I tsurü nitpürü I khyang jüng, ko Ih tsinung. Ihnü nüh khütoi dikehcho nühnü müdhele.”

²⁷ Laban-nü abi te yocho, “Ihnü hi yore: Abüdongba-nü nü khyanglangnü Ih müwajüchoepü zii khunü Ihnü müdhele.

²⁸ Nüyo amii Khütoinang young, Ihnü jünung.”

²⁹ Jakob-nü lalingcho, “Ihnü nüh khüta dikehcho ko I pohki nü santi khüta dhingyeh zikeh kangchonang nühnü müdhele.

³⁰ Ih müroede nüh san azikyah du licho, ta ade khütango kangko, ko Abüdongba-nü Ih khüdederü wüchonang müwajücho. Ta adelü Ipu kukhi nengdang nguchinung akyange.”

³¹ Laban-nü tsingdhingcho, “Ihnü nü khyang tu jünung?” Jakob-nü lalingcho, “Ihnü angang tu mükhyünung. Ko alümcho hi nühnü hekhang Ihnü mütozah nü san xükümnung.

³² Ihnü chünye nü santi apüm lanü dhingpü san anyah apüm lapha kehcho, ko xubongtüyah kehcho miza apüm throcheh Ih khyünung. Ihnü amii tsü hütsü du khyünung.

³³ Aronungla hütsü khu Ih yuje müchocho mülakhüti rangchehnung. Nühnü khode I shehcho dhingnung ronang, miza khürü xubongtüyah ko lapha mükehpü ko san khürü anyah tenü apa zehkhang, hütsü afühchoepü nühnü müdheing.”

³⁴ Laban-nü yocho, “Nyengchore. Nühnü yocho roh-i thsanung.”

³⁵ Ta hütsü nyümong Laban-nü miza amüdri ko lapha kehcho apung apüm, xubongtüyah kehcho atrüh apüm; ko san anyah apüm throcheh atsurü khyang jücho

³⁶ ko hiri santi tsü nüpü nyümong asang langtsehla Jakob tenü za tsisohcho. Ko Jakob-nü Laban san anyingcho tsü nyahcho.

³⁷ Jakob-nü Poplar, almond ko Plan singdongti chahnü ajengza axeng hirocho ko müdrimütrahnü aküp khohcho.

³⁸ Abinü singjengza hiri tsü santi bete arüh kih yongchah yohpüjücho. Abinü arüh tsü hütsüla yohpüjücho, tunüo kanglungrüti kih yongnung rode tungtacho.

³⁹ Hütsünü khode miza tsü singjengza yola tsü mütrünang, arühnü xubongtüyah kehcho, amüdrimütrah ko lapha kehpü mütrücho.

⁴⁰ Jakob-nü san ko miza pathsa yohpücho ko Laban miza anyah ko xubongtüyah kehchoti lahpi be pisohcho. Hütsüta abinü abi santi zikehsohcho ko Laban san tenü pathsa yohpücho.

⁴¹ Khode kanglungrü anyünyeh tungtacho, Jakob-nü kihyongla tsü arüh bete singjengza tsü yohjücho, ko hütsü michah tsü mütrüsohcho.

⁴² Ta re müzeh kanglungrü betelü singjengza tsü müyohjücho. Hütsüta tunyah mülipü re müzeh kanglungrü apüm Laban yo kangcho ko anyünyeh apüm Jakob yo kangcho.

⁴³ Hütsüta nguchi Jakob tsü khütang alirü kangcho. Abi san, kulirü, ut ko gadu khütang kangcho.